ଯାଜପୁର: ବୈତରଣୀ ନଦୀର ଜଳସ୍ତର କମିଥିଲେ ମଧ୍ୟ ଟଳିନି ବିପଦ । ସେପଟେ କ୍ଷତିଗ୍ରସ୍ତଙ୍କୁ ସହାୟତା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ ହୋଇଛି । ବ୍ରହ୍ମଚାରୀ ପାଟଣା ଠାରେ ସୃଷ୍ଟି ହୋଇଥିବା ଘାଇକୁ ଯୁଦ୍ଧକାଳୀନ ଭିତ୍ତିରେ ମରାମତି କରୁଛି ପ୍ରଶାସନ । ବନ୍ୟା ସମ୍ପୂର୍ଣ୍ଣ ଛାଡିବା ପରେ କ୍ଷୟକ୍ଷତିର ଆକଳନ କରାଯାଇ ସରକାରଙ୍କୁ ରିପୋର୍ଟ ଦିଆଯିବ ବୋଲି ଅତିରିକ୍ତ ଜିଲ୍ଲାପାଳ ସୂଚନା ଦେଇଛନ୍ତି ।
ବୈତରଣୀ ନଦୀରେ ଆସିଥିବା ବନ୍ୟା ଛାଡି ଯାଇଥିଲେ ମଧ୍ୟ ବିପନ୍ନଙ୍କ ଦୁଃଖ ବଢୁଥିବା ଦେଖିବାକୁ ମିଳିଛି । ଏବେ ମଧ୍ୟ ବନ୍ୟା ଜଳରେ ଏକର ଏକର ଚାଷ ଜମି ବୁଡି ରହିଛି । ବୈତରଣୀରେ ବନ୍ୟା ଏବଂ ଏହାର ଶାଖା କାଣୀ ନଦୀର ସୃଷ୍ଟି ହୋଇଥିବା ଘାଇ ଯୋଗୁଁ ବ୍ଳକର ୧୦ରୁ ଊର୍ଦ୍ଧ୍ବ ପଞ୍ଚାୟତବାସୀ କ୍ଷତିଗ୍ରସ୍ତ ହୋଇଛନ୍ତି । ବ୍ରହ୍ମଚାରୀ ପାଟଣା ଗସ୍ତ କରି ଜିଲ୍ଲାପାଳ ଓ ସ୍ଥାନୀୟ ବିଧାୟକ ଘାଇ ମରାମତି କାର୍ଯ୍ୟର ସମୀକ୍ଷା କରିଛନ୍ତି । ପ୍ରଶାସନ ପକ୍ଷରୁ ବିପନ୍ନ ମାନଙ୍କୁ ଚୁଡା, ଗୁଡ଼ ସହିତ ଗୃହପାଳିତ ପଶୁ ମାନଙ୍କ ପାଇଁ ଗୋ ଖାଦ୍ୟ ବଣ୍ଟନ କରାଯାଇଛି । ତେବେ ଘାଇ ମୁହଁ ମୁକୁଳା ଥିବାରୁ ପାଣିପାଗ ବିଭାଗର ପୂର୍ବନୁମାନକୁ ନେଇ ଭୟଭୀତ ଅଛନ୍ତି ଅଞ୍ଚଳବାସୀ । ସେପଟେ ବନ୍ୟା ଜନିତ କ୍ଷୟକ୍ଷତିର ଭରଣା ପାଇଁ ତୁରନ୍ତ ବନ୍ଦୋବସ୍ତ କରିବାକୁ ଦାବି ହୋଇଛି ।
ଇଟିଭି ଭାରତ, ଯାଜପୁର
