ଯାଜପୁର: ଖଣି ଖାଦାନରେ ଭରା ଯାଜପୁର ଜିଲ୍ଲାର ସୁକିନ୍ଦା ଅଞ୍ଚଳ । ଆଉ ଏହି ଖଣି ଉପତ୍ୟାକାର କାଳିଆପାଣି ଖଣି ଅଞ୍ଚଳ ଦେଇ ପ୍ରବାହିତ ହେଉଛି ଡମଶାଳା ନାଳ । ଦିନେ ଏହି ନାଳ ପାଣି, ଲୋକଙ୍କ ପିଇବା ଠୁ ଆରମ୍ଭ କରି ନିତ୍ୟ ବ୍ୟବହାର ତଥା ଚାଷ କାମରେ ଉପଯୋଗ କରାଯାଉଥିଲା । ହେଲେ ଧିରେ ଧିରେ ଖଣିର ବର୍ଜ୍ୟ ବସ୍ତୁରେ ଏହା ବିଷାକ୍ତ ହେବା ସହ ପୋତି ହୋଇଯାଉଛି ।
ତେବେ 2018 ମସିହାରେ ଏହାର ପୁନଃରୁଦ୍ଧାର ନାଁରେ କେବଳ ନାଳ ଭିତରେ ଥିବା ମାଟି ଗୋଡି ଉଠାଇ ଦୁଇ କଡରେ ଢଳାଯାଇଥିଲା । ଯାହା ବର୍ଷା ପରେ ପୁଣି ନାଳରେ ଭର୍ତ୍ତି ହୋଇଯାଇଥିବା କୁହାଯାଉଛି ।
ସାରୁଆବିଲର ମହାଗିରି ପାହାଡରୁ ବାହାରି ଥିବା ଏହି ଡମଶାଳା ନାଳକୁ ପୁଣି ଥରେ ଲୋକଙ୍କ ଜଳଉତ୍ସ ସଜାଇବା ପାଇଁ 2018 ମସିହାରେ ସରକାର ଅଣ୍ଟା ଭିଡିଥିଲେ । 4 କୋଟି ଟଙ୍କାରେ ନାଳର ପୁନଃରୁଦ୍ଧାର ଓ ଉନ୍ନତିକରଣ କରାଯିବ ବୋଲି ଭିତ୍ତିପ୍ରସ୍ତର ମଧ୍ୟ ପଡିଛି ।
ହେଲେ ଏହାର ସୁଫଳ ସ୍ଥାନୀୟ ଲୋକେ ପାଇନଥିବାବେଳେ ଦୁଇବର୍ଷ ପୂର୍ବେ ନାଳର ଯେଉଁ ଅବସ୍ଥା ଥିଲା ସେହିପରି ହିଁ ରହିଥିବା ଦେଖିବାକୁ ମିଳିଛି । ସେପଟେ ଏନେଇ ଜଳସେଚନ ବିଭାଗ କୋର୍ଟକୁ ସ୍ଥାନୀୟ ବିଡିଓ ବଲ ଫିଙ୍ଗିଥିବାବେଳେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରି ଆବଶ୍ୟକ ପଦକ୍ଷେପ ନେବେ ବୋଲି କହିଛନ୍ତି ।
କୋଟି କୋଟି ଟଙ୍କା ଖର୍ଚ୍ଚ କରାଯାଇ ନାଳର ପୁନଃରୁଦ୍ଧାର, ନାମକୁ ମାତ୍ର ହୋଇଥିବା ନାଳକୁ ଦେଖିଲେ ସ୍ପଷ୍ଟ ବାରି ହୋଇଯାଉଛି । ତେବେ ଏତେ ଟଙ୍କା କିପରି ଖର୍ଚ୍ଚ ହୋଇଛି ତାହା ତଦନ୍ତ ସାପେକ୍ଷ ବୋଲି ଦାବି ହେଉଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
