ଭୁବନେଶ୍ବର: ଯାଜପୁର ଜିଲ୍ଲା ଧର୍ମଶାଳା ଥାନା କଣ୍ଟିଗାଡଡିଆ ନାବାଳିକା ଗଣଦୁଷ୍କର୍ମ ମାମଲାରେ ପୋଲିସ ପ୍ରଶାସନ ଉପରେ ବର୍ଷିଛି ବିଜେପି । ଆଜି ଏକ ସାମ୍ବାଦିକ ସମ୍ମିଳନୀରେ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ସମ୍ପୃକ୍ତ ପୋଲିସ ଅଧିକାରୀଙ୍କୁ ନିଲମ୍ବିତ କରିବାକୁ ଦାବି କରିଥିବା ବେଳେ ରାଜ୍ୟ ସରକାରଙ୍କ ପାରିବାପଣିଆ ଉପରେ ପ୍ରଶ୍ନ କରିଛନ୍ତି ।
ଗରିବ ପରିବାରର ଜଣେ ନାବାଳିକାକୁ ଅପହରଣ କରି ବନ୍ଧୁକ ମୁନରେ ଆଖିରେ ପଟି ବାନ୍ଧି, ନିଶା ଦେଇ କଟକ,ସୁକିନ୍ଦାରେ ଦୁଷ୍କର୍ମ କରାଯାଇଛି । ମୁଖ୍ୟ ଅଭିଯୁକ୍ତଙ୍କ ଘରେ ମଧ୍ୟ ପୀଡିତାକୁ ଦୁଷ୍କର୍ମ ହୋଇଛି। ଅଭିଯୁକ୍ତ ପିଣ୍ଟୁର ଭାଇ ଓ ଭାଉଜ ଧର୍ମଶାଳା ଥାନାରେ ପୋଲିସ ଅଧିକାରୀ ଅଛନ୍ତି । ସେମାନଙ୍କ ଘରେ ମଧ୍ୟ ନାବାଳିକାର ଦୁଷ୍କର୍ମ ହୋଇଛି । ତେଣୁ ପିଣ୍ଟୁର ଭାଇ ଭାଉଜଙ୍କୁ କାହିଁକି ଗିରଫ କରାଯାଉନି ବୋଲି ପ୍ରଶ୍ନ କରିଛନ୍ତି ଲେଖାଶ୍ରୀ ।
ଯାଜପୁର ସାଂସଦ ଜଣେ ମହିଳା, ହେଲେ ସେ କାହିଁକି ଚୁପ ବସିଛନ୍ତି ? ପୋଲିସ ଜାଣତରେ ଏଭଳି ସମ୍ବେଦନଶୀଳ ଘଟଣା ଘଟିଛି। ତେଣୁ ଯାଜପୁର ଏସପି, ପୋଲିସ ପ୍ରଶାସନ ଉପରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛି ବିଜେପି । ରାଜ୍ୟ ବିଜେପିର ଏକ ଟିମ ଗତକାଲି ଘଟଣାସ୍ଥଳକୁ ଯାଇ ତଥ୍ୟ ସଂଗ୍ରହ କରିଛି। ସ୍ମିତାରଣୀ ଘଟଣା ପରେ ଯାଜପୁର ଜିଲ୍ଲାରେ ଏହା ଆଉ ଏକ ଦୁର୍ଭାଗ୍ୟଜନକ ଘଟଣା ବୋଲି କହିଛି ବିଜେପି । ପୋଲିସ ସାହସରେ ଏଭଳି କାଣ୍ଡ ଘଟାଇଛନ୍ତି ଦୁର୍ବୃତ୍ତ । ଏଘଟଣାରେ ପୋଲିସ ୪ ଜଣଙ୍କୁ ଗିରଫ କରିଥିବାବେଳେ ଅନ୍ୟ ଅଭିଯୁକ୍ତଙ୍କୁ ଏପର୍ଯ୍ୟନ୍ତ ଗିରଫ କରାଯାଇନାହିଁ । ଏହା ପଛରେ ଏକ ରାକେଟ କାମ କରୁଛି କି ବୋଲି ପ୍ରଶ୍ନ କରିଛନ୍ତି ଲେଖାଶ୍ରୀ ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
