ଯାଜପୁର: କବିତା ସଂକଳନ ଗୋଧୂଳି ଗୀତ ପାଇଁ ବୀଣାପାଣି ପଣ୍ଡାଙ୍କୁ ମିଳିବ ଓଡିଶା ସାହିତ୍ୟ ଏକାଡେମୀ ପୁରସ୍କାର । ଯାଜପୁର ଟାଉନ ଅଞ୍ଚଳର ବୀଣାପାଣି ଦୀର୍ଘ ବର୍ଷ ଧରି ସାହିତ୍ୟ ରଚନା କରି ଅନେକ ପ୍ରଶଂସା ସାଉଁଟି ପାରିଛନ୍ତି । ପୂର୍ବରୁ ସେ ନିଜ ନିଜ ଆକାଶ, କିଛି ବ୍ୟଥା କିଛି ନୀରବତା, କାକର ବୁନ୍ଦାରେ ସୂର୍ଯ୍ୟ, ଆଦି ଏକାଧିକ କବିତା ସଂକଳନ ରଚନା କରି ସାହିତ୍ୟିକ ମହଲରେ ପରିଚିତ ହୋଇପାରିଛନ୍ତି ।
ଏଥିପାଇଁ ତାଙ୍କୁ ଓଡିଶା ଲେଖିକା ସଂସଦ ପୁରସ୍କାର, ସୁଚାରିତା ପୁରସ୍କାର,କାଦମ୍ବିନୀ ପୁରସ୍କାର ଭଳି ଅନେକ ମର୍ଯ୍ୟାଦା ଜନକ ପ୍ରତିଷ୍ଠିତ ସାହିତ୍ୟ ଅନୁଷ୍ଠାନ ପକ୍ଷରୁ ସ୍ୱୀକୃତି ମିଳିଛି । ଶୁକ୍ରବାର ବୀଣାପାଣିଙ୍କ ନାଁ ଘୋଷଣା ହେବା ପରେ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଏଥିପାଇଁ ସେ ସମସ୍ତଙ୍କୁ ଧନ୍ୟବାଦ ମଧ୍ୟ ଦେଇଛନ୍ତି ।
ଶୁକ୍ରବାର ସ୍ଥାନୀୟ ସଂସ୍କୃତି ଭବନ ସମ୍ମିଳନୀ କକ୍ଷରେ ସଭାପତି ହରିହର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକାରୀ ପରିଷଦ ବୈଠକରେ 2015-16 ବର୍ଷ ପାଇଁ ଓଡିଆ ସାହିତ୍ୟ ଏକାଡେମୀ ପୁରସ୍କାର ତାଲିକା ଘୋଷଣା ହୋଇଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
