ଯାଜପୁର: ବିଧାନସଭା ନିର୍ବାଚନ ପାଇଁ ଗତ କିଛିଦିନ ଧରି ରାଜଧାନୀର ସବୁଦଳର କାର୍ଯ୍ୟାଳୟରେ ଟିକେଟ୍ କସରତ ଚାଲିଥିଲା । ଏବେ ପ୍ରାୟ ଟିକେଟ୍ କସରତ ସରିବା ପରେ ଟିକେଟ୍ ପାଇଥିବା ପ୍ରୀର୍ଥୀ ନିର୍ବାଚନ ମଣ୍ଡଳୀ ମୁହାଁ ହୋଇଛନ୍ତି ।
ରାଜନୈତିକ ଜୀବନରେ ପ୍ରଥମ ଥର ନିର୍ବାଚନ ଲଢିବା ପାଇଁ ସୁଯୋଗ ପାଇଥିବା ବିଜେଡି ନେତା ତଥା କୋରେଇ ବିଧାନସଭା ପ୍ରାର୍ଥୀ ଅଶୋକ ବଳ ପ୍ରାର୍ଥୀ ଘୋଷିତ ହେବାପରେ ପ୍ରଥମ ଥର ବ୍ୟାସନଗର ସହରରେ ପହଞ୍ଚିଥିଲେ । ଅଶୋକ ବଳ ଦୀର୍ଘ ଦିନ ଧରି ବିଜେଡି ରାଜନୀତିରେ ଅଛନ୍ତି । ସେ 2007 ମସିହାରେ ପ୍ରଥମ ଥର ଯାଜପୁର ଜିଲ୍ଲା ଜିଲ୍ଲାପରିଷଦ ଉପାଧ୍ୟକ୍ଷ ହୋଇଥିଲେ । ଅନେକ ଦିନ ଧରି ବିଜେଡି ରାଜନୀତିରେ ରହିବାପରେ ଗତ 2017 ମସିହାରେ ବିଜେପିରେ ଯୋଗଦେଇଥିଲେ । କିନ୍ତୁ କିଛିଦିନ ପରେ ପୁଣି ବିଜେଡିକୁ ଫେରି ଆସି ଆନନ୍ଦପୁର ନିର୍ବାଚନ ମଣ୍ଡଳୀର ପର୍ଯ୍ୟବେକ୍ଷକ ଦାୟିତ୍ଵ ତୁଲାଇଥିଲେ ।
ଚଳିତ ବିଧାନସଭା ନିର୍ବାଚନରେ ଦଳ ଅଶୋକଙ୍କୁ ପ୍ରାର୍ଥୀ ଘୋଷଣା କରିବା ପରେ ଆଜି ଏକ ବିରାଟ ମୋଟର ସାଇକେଲ ଶୋଭାଯାତ୍ରାରେ ଅଶୋକ କୋରେଇ ନିର୍ବାଚନ ମଣ୍ଡଳୀର ରସୁଲପୁର, ପାଣିକୋଇଲି ଦେଇ ବ୍ୟାସନଗର ରେ ପହଞ୍ଚିଥିଲେ ।
ବ୍ୟାସନଗରରେ ପହଞ୍ଚିବା ପରେ ଅଶୋକ କହିଛନ୍ତି ଏହି ନିର୍ବାଚନ ମଣ୍ଡଳୀ ହେଉଛି ଅଣକଂଗ୍ରସର ଗଡ ଏବଂ ଆଗାମୀ ଦିନରେ ଦଳ ପୁଣିଥରେ ବିଜୟ ଲାଭ କରିବ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
