ଯାଜପୁର:ବିଞ୍ଝାରପୁରରେ ପିହୁ ଅପହରଣ ପରେ ଏବେ ଜିଲ୍ଲାରେ ଆଉ ଏକ ଶିଶୁ ପୁତ୍ର ନିଖୋଜ ଘଟଣା ସାମ୍ନାକୁ ଆସିଛି। ଚଣ୍ଡିଖୋଲ ସୁଙ୍ଗୁଡା ନିକଟ ରସୁଲିପୁର ଆଦିବାସୀ ବସ୍ତିରୁ 4 ବର୍ଷର ଶିଶୁପୁତ୍ର ଚିଣ୍ଟୁ ନିଖୋଜ ହୋଇଥିବା ଅଭିଯୋଗ ହୋଇଛି।
ଗତ ଗୁରୁବାର ବାହାରେ ବୁଲା ବୁଲି କରୁଥିବା ବେଳେ ଅପରାହ୍ନରେ ସେ ନିଖୋଜ ହୋଇ ଯାଇଛି । ଏନେଇ ପରିବାର ଲୋକେ ବହୁ ଆଡେ ଖୋଜା ଖୋଜି ପରେ ଶିଶୁପୁତ୍ର ନ ମିଳିବାରୁ ଧାନମଣ୍ଡଳ ଫାଣ୍ଡିରେ ଲିଖିତ ଅଭିଯୋଗ କରିଛନ୍ତି। ଫାଣ୍ଡି ଅଧିକାରୀ ଓ ବଡଚଣା ପୋଲିସ ମିଳିତ ଭାବେ ତଦନ୍ତ ଆରମ୍ଭ କରିଛନ୍ତି। ଘଟଣାକୁ 3 ଦିନ ବିତିଯାଇଥିଲେ ସୁଦ୍ଧା ପୋଲିସ ଶିଶୁପୁତ୍ରକୁ ଉଦ୍ଧାର କରିବାରେ ସକ୍ଷମ ହୋଇ ପାରିନି ।
ରାମ ଜଜ ଦିନ ମଜୁରିଆ ଭାବେ ପରିବାର ଚଳାଉଥିବା ବେଳେ ପୁଅ ନିଖୋଜ ପରେ ପରିବାର ଲୋକେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ରାଜ୍ୟରେ ଗୋଟିଏ ପରେ ଗୋଟିଏ ଶିଶୁ ନିଖୋଜ ହେବା ଘଟଣା ରାଜ୍ୟରେ ଶିଶୁଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ପୋଲିସ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିବା ବେଳେ ଖୁବଶୀଘ୍ର ଶିଶୁ ପୁତ୍ରକୁ ଉଦ୍ଧାର କରାଯିବ ବୋଲି ଥାନା ଅଧିକାରୀ କହିଛନ୍ତି।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
