ଯାଜପୁର: 2019 ସାଧାରଣ ନିର୍ବାଚନକୁ ନେଇ ଚଳଚଞ୍ଚଳ ସାରା ରାଜ୍ୟ । ଏଥର ଓଡ଼ିଶାରେ ୪ଟି ପର୍ଯ୍ୟାୟରେ ନିର୍ବାଚନ ହେବାକୁ ଯାଉଥିବା ବେଳେ, ଯାଜପୁରରେ ଚଳିତ ମାସ ୨୯ ତାରିଖରେ ହେବ ମତଦାନ। ଯାହାକୁ ନେଇ ସରଗରମ ସମଗ୍ର ଜିଲ୍ଲା ରାଜନୀତି । ଏଥର ବାଜି ମାରିବ କିଏ ତାକୁ ନେଇ ଆରମ୍ଭ ହୋଇଗଲାଣି ଅଙ୍କକଷା।
ରାଜ୍ୟ ରାଜନୀତିରେ ସବୁବେଳେ ଚର୍ଚ୍ଚାରେ ଥିବା ୫୩ନଂ କୋରେଇ ବିଧାନସଭା ଆସନରେ ମଧ୍ୟ ପ୍ରାର୍ଥୀ ଘୋଷଣା କରିଛନ୍ତି ୩ ପ୍ରମୁଖ ଦଳ । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କୌଣସି ଦଳ ଗତ କରିଥିବା ପ୍ରାର୍ଥୀଙ୍କୁ ଏଥର ଟିକେଟ ଦେଇନାହିଁ । ତିନିଜଣ ନୂଆ ମୁହଁ ଏଥର ନିର୍ବାଚନରେ ମୈଦାନରେ ଅବତୀର୍ଣ୍ଣ ହୋଇଛନ୍ତି ।
ଗତଥର କଂଗ୍ରେସରୁ ପ୍ରାର୍ଥୀ ହୋଇଥିବା ବିଶ୍ବଜିତ ନାୟକ ଏଥର ବିଜେପି ଟିକେଟ ନିର୍ବାଚନ ଲଢୁଛନ୍ତି । ସେହିପରି କଂଗ୍ରେସ ଏଥର ବ୍ୟାସନଗରର ପୂର୍ବତନ ପୌରାଧ୍ୟକ୍ଷା ବନ୍ଦିତା ପରିଡାଙ୍କୁ ପ୍ରାର୍ଥୀ କରିଛନ୍ତି । ସବୁଠାରୁ ଚର୍ଚ୍ଚାର ପରିସର ମଧ୍ୟରେ ରହିଛନ୍ତି ବିଜେଡି । ଗତ 2014 ନିର୍ବାଚନରେ ଅଭିନେତାରୁ ରାଜନେତା ପାଲଟିଥିବା ଆକାଶ ଦାସ ନାୟକଙ୍କୁ ପ୍ରାର୍ଥୀ କରିଥିଲା ବିଜେଡି । ଚଳିତ ଥର ବିଜେଡିରୁ ପ୍ରାର୍ଥୀ ହୋଇଛନ୍ତି ପୂର୍ବତନ ଜିଲ୍ଲା ପରିଷଦ ଉପାଧ୍ୟକ୍ଷ ଅଶୋକ ବଳ ।
ମହିଳା କଂଗ୍ରେସର ରାଜ୍ୟ ଉପ-ସଭାନେତ୍ରୀ ଥିବା ବନ୍ଦିତା ପରିଡାଙ୍କୁ କଂଗ୍ରେସ ଏଠାରୁ ପ୍ରାର୍ଥୀ କରିଛି । ୨୦୦8ରେ ବ୍ୟାସନଗର ପୌର ପରିଷଦ ଦଖଲ କରି ପୌରାଧ୍ୟକ୍ଷା ଆସନକୁ ହାତେଇଥିବା ବନ୍ଦିତାଙ୍କ ଉପରେ ଆସ୍ଥା ପ୍ରକଟ କରିଛନ୍ତି କଂଗ୍ରେସ ହାଇକମାଣ୍ଡ । କଂଗ୍ରେସ ନେତା ରାମଚନ୍ଦ୍ର ଖୁଣ୍ଟିଆଙ୍କ ପରେ କୋରେଇ ରାଜନୀତିରେ ବେଶ ସକ୍ରିୟ ରହିଛନ୍ତି ବନ୍ଦିତା । ସେ ଜଣେ ମହିଳା ହୋଇଥିବା ବେଳେ ମହିଳାଙ୍କ ସୁରକ୍ଷା ପ୍ରତି ଗୁରୁତ୍ବ ଦେବା ସହ ସ୍ଥାନୀୟ ବେକାରୀ ସମସ୍ୟା ଏବଂ ଚାଷୀଙ୍କ ସମସ୍ୟାକୁ ପ୍ରସଙ୍ଗ କରି ନିର୍ବାଚନ ମୈଦାନକୁ ଓହ୍ଲାଇଛନ୍ତି । ଅନ୍ୟପଟେ ପ୍ରତିଥର ବିଜେଡି ତାର ପ୍ରାର୍ଥୀ ପରିବର୍ତ୍ତନ କରିବା ଦ୍ବାରା ଲୋକେ ବିଜେଡି ଉପରେ ଆସ୍ଥା ହରାଇ କଂଗ୍ରେସକୁ ଜିତାଇବେ ବୋଲି ଆଶା ପ୍ରକଟ କରିଛନ୍ତି ବନ୍ଦିତା ।
ସେପଟେ ୨୦୧୪ ସାଧାରଣ ନିର୍ବାଚନରେ ପ୍ରଥମ ଥର ପାଇଁ କଂଗ୍ରେସ ଟିକେଟରୁ ଲଢିଥିବା ବିଶ୍ବଜିତ୍ ନାୟକଙ୍କୁ ଚଳିତ ଥର ପ୍ରାର୍ଥୀ କରିଛି ବିଜେପି । ସେ ୨୦୧୪ ରେ କଂଗ୍ରେସ ଟିକେଟରୁ ଲଢି ୩୧ ହଜାର ୯୯ଟି ଭୋଟ୍ ପାଇ ବିଜେଡିର ଆକାଶ ଦାସ ନାୟକଙ୍କ ଠାରୁ ପରାସ୍ତ ହୋଇଥିଲେ ସେ । ଗତ ପଞ୍ଚାୟତ ନିର୍ବାଚନରେ ବ୍ୟକ୍ତିଗତ ଭାବେ ବିଭିନ୍ନ ପଞ୍ଚାୟତରେ ପ୍ରାର୍ଥୀ ଦେଇ କୋରେଇ ବ୍ଳକ ଅଧ୍ୟକ୍ଷ ପଦ ଦଖଲ କରିଥିଲେ ବିଶ୍ବଜିତ୍ । ପରେ ସେ ସାମିଲ ହୋଇଥିଲେ ବିଜେପିରେ ଏବଂ ଦଳ ପାଇଁ ବନିଯାଇଥିଲେ ଆସେଟ୍ । ଏବେ ତାଙ୍କୁ ପ୍ରାର୍ଥୀ କରାଯିବା ପରେ କୋରେଇରେ ବିଜେପି ଜିତିବା ନେଇ ସେ ଦୃଢୋକ୍ତି ପ୍ରକାଶ କରିଛନ୍ତି । ଏଥିସହ କଂଗ୍ରେସ ଓ ବିଜେଡି ଲୋକଙ୍କ ଆଶା ଆକାଂକ୍ଷା ଠାରୁ ବହୁ ଦୂରରେ ରହିଥିବା ବେଳେ ବିଜେପି ଓ ମୋଦି ସରକାର ପ୍ରତି ଲୋକଙ୍କ ଆସ୍ଥା ବଢିଥିବା କହିଛନ୍ତି ବିଶ୍ବଜିତ ।
ଏଥର ବିଜେଡି କୋରାଇ ଭୋଟରଙ୍କ ସାମ୍ନାରେ ନୂଆ ମୁହଁ ରଖିଛି । ଅଭିନେତାରୁ ରାଜନେତା ବନିଥିବା କୋରାଇ ବିଧାୟକ ଆକାଶ ଦାସ ନାୟକଙ୍କୁ ଏଥର ମିଳିଲାନାହିଁ ଟିକେଟ୍ । ବିଜେଡି ସୁପ୍ରିମୋ ନବୀନ ପଟ୍ଟନାୟକ ଯୁବନେତା ଅଶୋକ ବଳଙ୍କୁ ତାଙ୍କ ସ୍ଥାନରେ ପ୍ରାର୍ଥୀ କରିଛନ୍ତି । ଛାତ୍ରନେତାରୁ ରାଜନୀତିରେ ପାଦ ଥାପିଥିବା ଅଶୋକଙ୍କ ଉପରେ ଆସ୍ଥା ପ୍ରକଟ କରିଛନ୍ତି ବିଜେଡି ସୁପ୍ରିମୋ । ପୂର୍ବତନ ମନ୍ତ୍ରୀ ତଥା ସାଂସଦ ସ୍ବର୍ଗତ କଳ୍ପତରୁ ଦାସଙ୍କ ନେତୃତ୍ବରେ ରାଜନୀତିକୁ ଆସିଥିବା ଆଶୋକ ୨୦୦୭ରେ ଜିଲ୍ଲା ପରିଷଦ ଉପାଧ୍ୟକ୍ଷ ହୋଇଥିଲେ ।
ଦୀର୍ଘଦିନ ବିଜେଡିରେ ରହି ରାଜନୀତି କରିବା ପରେ ୨୦୧୪ରେ କୋରେଇରୁ ବିଜେଡି ଟିକେଟ ପାଇଁ ଆଶାୟୀ ଥିଲେ । ମାତ୍ର ୨୦୧୪ରେ ଆକାଶଙ୍କୁ ଦଳ ପ୍ରାର୍ଥୀ କରିବା ପରେ ସେ ଦଳ ଛାଡି ବିଜେପିରେ ସାମିଲ ହୋଇଥିଲେ । ତେବେ କିଛିଦିନ ବିଜେପିରେ ରହିବା ପରେ ପୁନର୍ବାର ବିଜେଡିକୁ ପ୍ରତ୍ୟାବର୍ତନ କରିଥିଲେ । ବର୍ତମାନ ସେ ଦଳର ରାଜ୍ୟ ସାଧାରଣ ସମ୍ପାଦକ ରହିଥିବା ବେଳେ ପଡୋଶୀ କେନ୍ଦୁଝର ଜିଲ୍ଲା ଆନନ୍ଦପୁରର ପର୍ଯ୍ୟବେକ୍ଷକ ମଧ୍ୟ ରହିଛନ୍ତି । ଦୀର୍ଘ ବର୍ଷ ଧରି କୋରେଇ ବିଜେଡିର ଗଡ ରହିଆସିଥିବା ବେଳେ ନବୀନ ପଟ୍ଟନାୟକଙ୍କ ନେତୃତ୍ବରେ କୋରେଇରେ ବହୁ ବିକାଶ ହୋଇଛି । ଥର ମଧ୍ୟ ଲୋକେ ବିଜେଡିକୁ ପୂର୍ବଭଳି ଭରଷା କରିବେ ବୋଲି କହିଛନ୍ତି ଅଶୋକ।
ବିଜେଡି, ବିଜେପି ଓ କଂଗ୍ରେସ ଏହି ତିନୋଟି ପ୍ରମୁଖ ଦଳ ପାଇଁ ସେମାନଙ୍କ ଦଳୀୟ ପ୍ରାର୍ଥୀ ହେଉଛନ୍ତି ନୂଆମୁହଁ । ସେମାନଙ୍କ ମଧ୍ୟରେ ତ୍ରିକୋଣୀୟ ମୁକାବିଲା ହେବାକୁ ଯାଉଥିବା ବେଳେ କୋରେଇରେ ଭୋଟର କାହା ମୁଣ୍ଡରେ ସୁନା କଳସ ଢାଳିବେ ତାହା ଆଉ ମାତ୍ର ଦିନ କେଇଟା ପରେ ଜଣାପଡିବ।
ଯାଜପୁରରୁ ଜ୍ଞାନରଞ୍ଜନ ଓଝା, ଈଟିଭି ଭାରତ
