ଯାଜପୁର: କଲେଜ ଛାତ୍ରଙ୍କୁ ଯୌନ ନିବେଦନ କରି ଗିରଫ ହେଲେ ଅଧ୍ୟାପକ । ଯାଜପୁର ଚିତାଳୋ କଲେଜର ଅଧ୍ୟାପକ ନିରଞ୍ଜନ ପଣ୍ଡାଙ୍କ ବିରୋଧରେ ଖୋଦ କଲେଜ ଛାତ୍ର ଆଣିଛନ୍ତି ଏଭଳି ସାଙ୍ଘାତିକ ଅଭିଯୋଗ ।
ଅଭିଯୋଗ ମୁତାବକ ଅଧ୍ୟାପକ ଜଣକ ବିଭିନ୍ନ ଛାତ୍ରଙ୍କୁ ଫୋନ, ହ୍ବାଟ୍ସଆପ ମାଧ୍ୟମରେ ପ୍ରେମ ନିବେଦନ କରିବା ସହିତ ନିଜ ରୁମକୁ ଡକାଇଥାନ୍ତି । ଛାତ୍ରମାନଙ୍କୁ ଅଧ୍ୟାପକ ରାତିରେ ରୁମରେ ରହିବା ପାଇଁ ବାଧ୍ୟ କରନ୍ତି । ଅମାନ୍ୟ ହେଲେ ପରିକ୍ଷାରେ ମାର୍କ କମାଇଦେବାର ଧମକ ଦେଇଥାନ୍ତି । ଏପରିକି ଅଧ୍ୟାପକ ଏବଂ ଛାତ୍ରଙ୍କ ମଧ୍ୟରେ ହୋଇଥିବା ଫୋନ ବାର୍ତ୍ତାଳାପ ଏବଂ ମୋବାଇଲ ସ୍କ୍ରିନସଟ ଏବେ ଭାଇରାଲ ହୋଇଛି ।
ତେବେ ଅଧ୍ୟାପକଙ୍କ ଏଭଳି କାରନାମା ବିରୋଧରେ ଅଭିଯୋଗ କରିବା ପରେ ଛାତ୍ରଙ୍କୁ ମାଡ ମରାଯାଇଥିବା ଅଭିଯୋଗ ହୋଇଛି । ଏନେଇ କେତେକ ଛାତ୍ର ଯାଜପୁର ଥାନାରେ ଲିଖିତ ଅଭିଯୋଗ କରିବା ପରେ ଯାଜପୁର ପୋଲିସ ଘଟଣାର ତଦନ୍ତ କରି ଅଭିଯୁକ୍ତ ଅଧ୍ୟାପକ ନିରଞ୍ଜନଙ୍କୁ ଗିରଫ କରିଛି । ନିରଞ୍ଜନଙ୍କ ବିରୋଧରେ ଭାରତୀୟ ଦଣ୍ଡବିଧାନ ଆଇନର ଧାରା ୨୯୪, ୩୫୪ ବି ,୫୦୬ ରେ ମାମଲା ରୁଜୁ କରିଛି ପୋଲିସ । ସେପଟେ ଅଭିଯୁକ୍ତ ଅଧ୍ୟାପକ ଜଣକ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
