ଯାଜପୁର: କଥାରେ ଅଛି ଯାହାକୁ ରଖିବେ ଅନନ୍ତ କେ କରିପାରେ ବଳବନ୍ତ । ସେଭଳି କିଛି ଘଟଣା ସାମ୍ନାକୁ ଆସିଛି ଯାଜପୁରରୁ । ଢେଙ୍କାନାଳର ଜଣେ ନାବାଳକ ବ୍ରାହ୍ମଣୀ ନଦୀରେ ଭାସି ଯାଇଥିଲେ । ହେଲେ ଉଦ୍ଧାର ହେଲେ ଯାଜପୁରରୁ । ତାହା ପୁଣି ଜୀବନ୍ତ । ନଦୀରେ ଦୁଇ ଘଣ୍ଟାର ସଂଘର୍ଷ ପରେ ନାବାଳକଙ୍କୁ ଜୀଅଁନ୍ତା ଉଦ୍ଧାର କରିଛନ୍ତି ଯାଜପୁର ଏଣ୍ଡଳାବର କିଛି ନାବିକ ଓ ସମାଜସେବୀ ।
ଘଟଣାରୁ ପ୍ରକାଶ କି, ମଙ୍ଗଳବାର ସକାଳ ପ୍ରାୟ 10ଟା ସମୟରେ ଯାଜପୁର ଧର୍ମଶାଳା ବ୍ଲକ ଏଣ୍ଡଳବାର ଅଭିମନ୍ୟୁ ଦାଶଙ୍କ ନିକଟକୁ ଢେଙ୍କାନାଳ ଜିଲ୍ଲାର ପଥର କଣି ଗ୍ରାମରୁ ଏକ କଲ୍ ଆସିଥିଲା । ସେପଟୁ ଜଣେ ବ୍ୟକ୍ତି କହିଥିଲେ ଆମରେ ଜଣେ ପିଲା ବ୍ରାହ୍ମଣୀ ନଦୀର ବନ୍ୟାଜଳରେ ଭାସି ଯାଉଛି । ସେ ଏହି ଖବର ଶୁଣି ଗ୍ରାମର କିଛି ସମାଜସେବୀ ଓ ନାବିକଙ୍କୁ ଜଣାଇଥିଲେ । ଏହାପରେ ଏଣ୍ଡଳବାର ବ୍ରାହ୍ମଣୀ ନଦୀ କୂଳରେ ଥିବା ନାବିକ ଓ ସମାଜସେବୀ ଅପେକ୍ଷା କରି ରହିଥିଲେ । ଦୀର୍ଘ ଦୁଇ ଘଣ୍ଟା ପରେ ନଦୀ ଭିତରୁ ଏକ ହାତ ହଲାଇବାର ଦେଖିବାକୁ ପାଇଥିଲେ ଏବଂ ସଙ୍ଗେ ସଙ୍ଗେ ପାଖରେ ଥିବା ଡଙ୍ଗାକୁ ନେଇ ନଦୀ ଭିତରକୁ ଚାଲି ଯାଇଥିଲେ । ସେଠାରୁ ସେମାନେ ୫ କିଲୋମିଟର ଦୂର ବାଲିକୁଦିଆ ନଦୀ କୂଳରୁ ନାବାଳକକୁ ଜୀବିତ ଅବସ୍ଥାରେ ଉଦ୍ଧାର କରିଥିଲେ ।
ପିଲାଟି ଢେଙ୍କାନାଳ ଜିଲ୍ଲାର କାମାକ୍ଷାନଗରସ୍ଥିତ ପଣ୍ଡୁଆ ଗ୍ରାମର ସୁଶାନ୍ତ ବାରିକଙ୍କ ପୁଅ ଅଲ୍ହା ବାରିକ(17) । ସେ ତାଙ୍କ ମାମୁଁ ଘର ପଥରକଣିରେ ରହୁଥିଲେ । ନାବଳକଟି ଆଜି ନଦୀକୁ ଗାଧୋଇବା ପାଇଁ ଯାଇଥିବା ବେଳେ ବନ୍ୟା ଜଳରେ ଭାସି ଆସିଥିଲେ ।
ଏଣ୍ଡଳବା ଗ୍ରାମର ନାବିକ ଧକେଇ ବେହେରା, ମଦନ ବେହେରା, ବାବୁଲି ମଲ୍ଲିକ,ଗୋବିନ୍ଦ ତରାଇ, ସନ୍ତୋଷ ବେହେରା, କବି ତରାଇ, ରବି ତରାଇ ନାଉରି ଭାଇମାନେ ମିଶି ବାଳକକୁ ଜୀବିତ ଅବସ୍ଥାରେ ଉଦ୍ଧାର କରିଛନ୍ତି । ଏନେଇ କିଛି ସମାଜସେବୀ ଓ ସାମ୍ବାଦିକ ଜେନାପୁର ଥାନାକୁ ଖବର ଦେଇଥିଲେ । ଏଥିସହ ତୁରନ୍ତ ଆମ୍ବୁଲାନ୍ସ ଯୋଗେ ଦାନଗଦି ସ୍ବାସ୍ଥ୍ୟକେନ୍ଦ୍ରକୁ ପଠାଇ ପିଲାଟିର ଘର ଲୋକଙ୍କୁ ଜଣାଇଥିଲେ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
