ଜଗତସିଂହପୁର: ତ୍ରିର୍ତ୍ତୋଲ ବ୍ଲକ ଗରମ ପଞ୍ଚାୟତ ଅନ୍ତର୍ଗତ ବନଦୁର୍ଗା ଗାଁର ଧୋବିଲତା ଆଉ ନାହାନ୍ତି। ଧୋବିଲତା ଓ ତାଙ୍କ ମାନସିକ ଅନଗ୍ରସର ପୁଅ ସୁକାନ୍ତ ଜେନାଙ୍କ ସମ୍ପର୍କରେ ଗଣମାଧ୍ୟମରେ ବାରମ୍ବାର ଖବର ପ୍ରକାଶ ପାଉଥିଲା । କିନ୍ତୁ କୌଣସି ପ୍ରଶାସନିକ ଅଧିକାରୀ କି ଜିଲ୍ଲା ସ୍ବାସ୍ଥ୍ୟ ବିଭାଗ ଅଧିକାରୀଙ୍କ ସେଠାରେ ପାଦ ପଡିନଥିଲା। ଔଷଧ ବିନା ଯନ୍ତ୍ରଣାରେ ଛଟପଟ ହୋଇ ଗତକାଲି ରାତିରେ ଧୋବିଲତାଙ୍କର ମୃତ୍ୟୁ ହୋଇ ଯାଇଛି।
ମା'ଙ୍କ ପରେ ଏବେ ତାଙ୍କ ପୁଅ ମୃତ୍ୟୁ ସହ ସଂଗ୍ରାମ କରୁଛନ୍ତି । ସୂଚନାଯୋଗ୍ୟ ଯେ, ଧୋବିଲତା ସ୍ତନ କର୍କଟ ରୋଗରେ ପୀଡିତ ଥିଲେ । ତାଙ୍କର ଏକମାତ୍ର ପୁଅ ମାନସିକ ରୋଗରେ ପୀଡିତ। ଆର୍ଥିକ ସ୍ଥିତି ଭଲ ନଥିବାରୁ ଉଭୟ ମା' ଓ ପୁଅ ଔଷଧ ଖାଇ ପାରିନଥିଲେ। ଔଷଧ ବିନା ଧୋବିଲତାଙ୍କର ମୃତ୍ୟୁ ହୋଇଛି ।
ତେବେ ଏସମ୍ବନ୍ଧରେ ଜିଲ୍ଲା ସ୍ବାସ୍ଥ୍ୟ ବିଭାଗ ମୁଖପାତ୍ର ବସନ୍ତ କୁମାର ବାରିକ ଜାଣିଲାପରେ ପଦକ୍ଷେପ ଗ୍ରହଣ କରିଛନ୍ତି । ଆସନ୍ତା 25 ତାରିଖରେ ମାନସିକ ଅନଗ୍ରସର ସୁକାନ୍ତଙ୍କୁ କଟକ ପଠାଯିବ ବୋଲି କହିଛନ୍ତି ଜିଲ୍ଲା ସ୍ବାସ୍ଥ୍ୟ ବିଭାଗ ମୁଖପାତ୍ର । ଏଥିସହ କହିଛନ୍ତି ଯେ, କଟକରୁ ଫେରିବା ପରେ ବି ସୁକାନ୍ତଙ୍କ ଦାୟିତ୍ବ ତାଙ୍କ ବିଭାଗ ବହନ କରିବ ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
