ଜଗତସିଂହପୁର: ଜିଲ୍ଲାରେ ଗତ ସୋମବାର ଠାରୁ ଲକଡାଉନ ଘୋଷଣା ହେବା ପରେ ଅତ୍ୟାବଶ୍ୟକୀୟ ସାମଗ୍ରୀର କଳାବଜାରୀ ହେଉଥିବା ଦେଖିବାକୁ ମିଳିଛି । କିଛି ଅସାଧୁ ବ୍ୟବସାୟୀ ଡାଲି, ସୋରିଷ ତେଲ, ଅଟା, ସୁଜି ଆଦି ସାମଗ୍ରୀକୁ କୃତ୍ରିମ ଅଭାବ କରାଇ ମୂଲ୍ୟ ବୃଦ୍ଧି କରୁଛନ୍ତି । ଯଦ୍ବାରା ଖାଉଟିଙ୍କ ମୁଣ୍ଡରେ ପଡିଛି ଚଡକ ।
ଅପରପକ୍ଷରେ ବୋଝ ଉପରେ ଲଳିତା ବିଡା ସଦୃଶ ସହରରେ ଆଳୁର କୁତ୍ରିମ ଅଭାବ ଦେଖାଦେଇଛି । ସାଧାରଣ ଖାଉଟି ଲମ୍ବା ଲାଇନରେ ଛିଡା ହୋଇ କିଲୋ ପ୍ରତି 30ରୁ 40ଟଙ୍କା ଦରରେ ଆଳୁ ପାଇଁ କିଣିବାକୁ ବାଧ୍ୟ ହେଉଛନ୍ତି । ତେବେ ସହରକୁ ପର୍ଯ୍ୟାପ୍ତ ପରିମାଣରେ ଆଳୁ ଗାଡି ଅସୁନଥିବାରୁ ଆଳୁର ମୂଲ୍ୟ ବୃଦ୍ଧି ପାଉଛି ବୋଲି କହିଛନ୍ତି ଆଳୁ ବ୍ୟବସାୟୀ ।
କିନ୍ତୁ ଏସମ୍ପର୍କରେ ଜିଲ୍ଲା ଯୋଗାଣ ବିଭାଗ ପାଖରେ ଖବର ନଥିବା କୁହାଯାଇଛି । ସେପଟେ ଜିଲ୍ଲାରେ ନିତ୍ୟ ବ୍ୟବହାର୍ଯ୍ୟ ଖାଦ୍ୟ ସାମଗ୍ରୀର ଦରଦାମ ନିୟନ୍ତ୍ରଣ ଉପରେ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
