ଜଗତସିଂହପୁର: ପ୍ରେମ ଜନିତ ଘଟଣାକୁ କେନ୍ଦ୍ରକରି ଯୁବକ ଜଣକ ନିଜ ଦେହରେ ପେଟ୍ରୋଲ ଢାଳି ନିଆଁ ଲଗାଇଦେଇଥବା ଅଭିଯୋଗ ହୋଇଛି । ତେବେ ଗୁରୁତର ଅବସ୍ଥାରେ ଯୁବକକୁ ନାଉଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି । । ଯୁବକ ଜଣକଙ୍କ ପ୍ରାୟ 80 ପ୍ରତିଶତ ପୋଡି ହୋଇଯାଇଥିବା ଡାକ୍ତର କହିଛନ୍ତି ।
ସୂଚନାଯୋଗ୍ୟ ଯେ, ଢେଙ୍କାନାଳ ଜିଲ୍ଲା ଭୁବନ ଗ୍ରାମର ବିପିନ ସାହୁ ନାମକ ଜଣେ ଯୁବକ ଦୀର୍ଘଦିନ ଧରି ନାଉଗାଁ ଅଞ୍ଚଳର ବାଲିଚନ୍ଦ୍ରପୁର ଗ୍ରାମରେ ଘରଭଡା କରି ରହିଥିଲେ । ସେଠାରେ ଜୈନିକ ଯୁବତୀଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା । ଏହି ଘଟଣା ବିଷୟରେ ଝିଅ ଘର ଲୋକ ଜାଣିବା ପରେ ଏହି ପ୍ରେମ ସମ୍ପର୍କକୁ ବିରୋଧ କରିଥିଲେ। ଏହାକୁ ନେଇ ମଧ୍ୟ ଘଟଣା ଥାନାରେ ପହଞ୍ଚିଥିଲା । ତେବେ ଗତକାଲି(ବୁଧବାର) ବିଳମ୍ବିତ ରାତିରେ ପ୍ରେମିକ ନିଜଘରେ ପେଟ୍ରୋଲ ଢାଳି ନିଜ ଦେହରେ ନିଆଁ ଲଗାଇଦେଇଥବା ସ୍ଥାନୀୟ ଲୋକେ ଖବର ଦେଇଥିଲେ । ପ୍ରଥମେ ନାଉଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରେ ଅବସ୍ଥା ଗୁରୁତର ହେବାରୁ କଟକ ବଡ଼ମେଡିକାଲ ସ୍ଥାନାନ୍ତରିତ କରାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
