ଜଗତସିଂହପୁର: ସହର ଉପକଣ୍ଠ ସିଦ୍ଧ ବାରଙ୍ଗ ପୀଠରେ ଶ୍ରୀକ୍ଷେତ୍ର ମହୋତ୍ସବ ପାଳିତ ହୋଇଯାଇଛି । ପ୍ରତ୍ୟେକ ବର୍ଷ ଏହି ଦିନରେ ହଜାର ହଜାର ଶ୍ରଦ୍ଧାଳୁ ନିଜେ ରୋଷେଇ କରି ମହାପ୍ରଭୁଙ୍କୁ ଅର୍ପଣ କରିଥାନ୍ତି । ହଜାର ହଜାର ଶ୍ରଦ୍ଧାଳୁ ଏହି ଉତ୍ସବରେ ଯୋଗ ଦେଇ ମହାପ୍ରଭୁଙ୍କ ଆଶିଷ ଲାଭ କରିଛନ୍ତି । ଏହି କାର୍ଯ୍ୟକ୍ରମରେ ଓଡ଼ିଶାର ସୁନାମ ଧନ୍ୟ କଳାକାରମାନେ ଭଜନ ପରିବେଷଣ କରିଥିଲେ ।
ଲୋକ କଥା ଅନୁସାରେ, ପଞ୍ଚସଖା ଯୁଗର ଅନ୍ୟତମ ସାଧକ ସିଦ୍ଧ ବାରଙ୍ଗ ମହାପ୍ରଭୁଙ୍କ ପରମ ଭକ୍ତ ଥିଲେ । ସେ ଯୋଗ ବଳରେ ପ୍ରତ୍ୟେକ ଦିନ ପୁରୀ ଯାଇ ମହାପ୍ରଭୁଙ୍କ ଦର୍ଶନ କରି ଫେରୁଥିଲେ । ଦିନେ ସିଦ୍ଧ ବାରଙ୍ଗ ଅସୁସ୍ଥତା କାରଣରୁ ମହାପ୍ରଭୁଙ୍କ ଦର୍ଶନ ପାଇଁ ଯାଇପାରି ନଥିଲେ । ମହାପ୍ରଭୁଙ୍କ ଶ୍ରୀ ଜଗନ୍ନାଥଙ୍କ ଦର୍ଶନ ନ ପାଇବାରୁ ସେଦିନ ସେ ଜଳ ସ୍ପର୍ଶ କଲେନାହିଁ । ଫଳରେ ମହାପ୍ରଭୁ ନିଜେ ଆସି ଏହିଠାରେ ବାରଙ୍ଗଙ୍କୁ ଦର୍ଶନ ଦେଇଥିଲେ। ସେହିଦିନ ଠାରୁ ଉକ୍ତ ପୀଠରେ ଶ୍ରୀକ୍ଷେତ୍ର ମହୋତ୍ସବ ପାଳିତ ହୋଇ ଆସୁଛି ।
ପ୍ରତ୍ୟେକ ବର୍ଷ ଏହି ଦିନରେ ହଜାର ହଜାର ଶ୍ରଦ୍ଧାଳୁ ନିଜେ ରୋଷେଇ କରି ମହାପ୍ରଭୁଙ୍କୁ ଅର୍ପଣ କରିଥାନ୍ତି । ଜାତି ଧର୍ମ ବର୍ଣ୍ଣ ନିର୍ବିଶେଷରେ ପ୍ରସାଦ ସେବନ କରିବାର ବିଧି ରହିଛି । ଅନ୍ୟପଟେ ଶ୍ରୀକ୍ଷେତ୍ର ମହୋତ୍ସବରେ ପ୍ରବଳ ଜନସମାଗମକୁ ଦୃଷ୍ଟିରେ ରଖି ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା ।
ଇଟିଭି ଭାରତ, ଜଗତସିଂହପୁର
