ଜଗତସିଂହପୁର: ଜଗତସିଂହପୁର ଜିଲ୍ଲାରେ ଆସନ୍ତାକାଲି ଦ୍ୱିତୀୟ ପର୍ଯ୍ୟାୟ ଭୋଟ ଗ୍ରହଣ କରାଯିବ । ଏହାକୁ ନେଇ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ସ୍ଥାନୀୟ ସ୍ୱାମୀ ବିବେକାନନ୍ଦ ସ୍ବୟଂ ଶାସିତ ମହାବିଦ୍ୟାଳୟରୁ ସମସ୍ତ ପୁଲିଙ୍ଗ ପାର୍ଟିକୁ ବିଭିନ୍ନ ବୁଥକୁ ପଠାଇ ଦିଆଯାଇଛି । ଜଗତସିଂହପୁର ସଦର ବ୍ଲକର 30ଟି ପଞ୍ଚାୟତରେ 487ଟି ବୁଥ କରା ଯାଇଥିବା ବେଳେ ଆସନ୍ତାକାଲି 1ଲକ୍ଷ 21 ହଜାର 130 ଜଣ ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରିବେ ।
ତେବେ ଜଗତସିଂହପୁର ବ୍ଲକରେ 30 ପଞ୍ଚାୟତ ସମେତ 4ଟି ଜିଲ୍ଲା ପରିଷଦ ଜୋନ ରହିଛି । ସେହିପରି 4ଟି ଜିଲ୍ଲା ପରିଷଦ ଜୋନ ପାଇଁ 16ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଥିବାବେଳେ 30ଟି ସରପଞ୍ଚ ପଦ ପାଇଁ 131 ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଛନ୍ତି । ସେହିଭଳି 30ଟି ସମିତି ସଭ୍ୟ ପଦ ପାଇଁ 102 ଜଣ ପ୍ରତିଦ୍ବନ୍ଦିତା କରୁଥିବା ବେଳେ 487ଟି ୱାର୍ଡ ମେମ୍ବର ପଦ ଲାଗି 902 ଜଣ ନିର୍ବାଚନୀ ମୈଦାନକୁ ଓହ୍ଲାଇଛନ୍ତି ।
ଅନ୍ୟପଟେ ଜଗତସିଂହପୁର ବ୍ଲକରେ ମୋଟ 487ଟି ବୁଥ ମଧ୍ୟରୁ 62ଟି ବୁଥ ଉତ୍ତେଜନା ପ୍ରବଣ ବୁଥ ଭାବେ ଚିହ୍ନଟ କରାଯାଇଛି । ତେବେ ଦ୍ବୀତୀୟ ପର୍ଯ୍ୟାୟ ମତଦାନ ଲାଗି ସମସ୍ତ ପ୍ରସ୍ତୁତି ସରିଛି ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚାନା ଦିଆଯାଇଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
