ପାରାଦ୍ଵୀପ: କୋଭିଡ 19 କଟକଣା ଓ ଅମ୍ଫାନ ସତ୍ତ୍ୱେ ପାରାଦ୍ଵୀପ ବନ୍ଦର କାର୍ଗୋ ହ୍ୟାଣ୍ଡଲିଂ(ପଣ୍ୟ କାରବାର)ରେ ରେକର୍ଡ କରିଛି । ଚଳିତ ୨୦୨୦/୨୧ ଆର୍ଥିକ ବର୍ଷରେ ପାରାଦ୍ଵୀପ ବନ୍ଦର ୧୧୪.୫୫ ମିଲିୟନ ମେଟ୍ରିକ୍ ଟନ୍ ପଣ୍ୟ କାରବାର କରିବାରେ ସଫଳ ସୋଇଛି । ଗତ ୨୦୧୭/୧୮ ଆର୍ଥିକ ବର୍ଷରେ ୧୦୨.୦୧ ମିଲିୟନ ମେଟ୍ରିକ୍ ଟନ୍ ପଣ୍ୟ କାରବାର କରି ରେକର୍ଡ କରି ଥିବାବେଳେ, ୨୦୧୮/୧୯ ଆର୍ଥିକ ବର୍ଷରେ ୧୦୯.୨୭ ଓ ୨୦୧୯/୨୦ ଆର୍ଥିକ ବର୍ଷରେ ୧୧୨.୬୯ ମିଲିୟନ ମେଟ୍ରିକ୍ ଟନ୍ ପଣ୍ୟ କାରବାର କରିଥିଲା ପାରାଦ୍ଵୀପ ବନ୍ଦର ।
ଏଥି ସହିତ ଚଳିତ ବର୍ଷ ଅନ୍ୟ ମେଜର ପୋର୍ଟକୁ ପଛରେ ପକାଇ ସବୁଠାରୁ ଅଧିକ ବ୍ଲକ କାର୍ଗୋ ହ୍ୟାଣ୍ଡଲିଂ କରିବା ସହିତ ସବୁଠୁ ଅଧିକ ରେଲୱେ ଲୋଡିଂ କରିଛି ପାରାଦ୍ଵୀପ ବନ୍ଦର । କେବଳ ମାର୍ଚ୍ଚ ମାସରେ ୧୧.୫ ମିଲିୟନ ମେଟ୍ରିକ୍ ଟନ୍ କାର୍ଗୋ ହ୍ୟାଣ୍ଡଲିଂ କରିଛି ପାରାଦ୍ଵୀପ ବନ୍ଦର । ଗତ ଆର୍ଥିକ ବର୍ଷରେ ୬୮୦ କୋଟି ଟଙ୍କା ଲାଭ କରି ଥିବାବେଳେ, ଚଳିତ ବର୍ଷ ୭୪୦ କୋଟି ଟଙ୍କା ଲାଭ କରିଛି ପାରାଦ୍ଵୀପ ବନ୍ଦର । ପାରାଦ୍ଵୀପ ବନ୍ଦରର ଏଭଳି ନିୟମିତ ରେକର୍ଡର ଶ୍ରେୟ ବନ୍ଦରର କର୍ମଚାରୀ, ବନ୍ଦର ବ୍ୟବହାରକାରୀ ସଂସ୍ଥା, ଓଡ଼ିଶା ରାଜ୍ୟ ସରକାର ଓ କେନ୍ଦ୍ର ଜାହାଜ ଚଳାଚଳ ମନ୍ତ୍ରାଳୟକୁ ଦେଇଛନ୍ତି ବନ୍ଦର ଅଧ୍ୟକ୍ଷ ବିନିତ କୁମାର । ଏ ସମ୍ପର୍କିତ ଏକ ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ବନ୍ଦର ଉପାଧ୍ୟକ୍ଷ ଆଶିଷ କୁମାର ବୋଷ, ପାରାଦ୍ଵୀପ ବନ୍ଦର ଚିକିତ୍ସାଳୟର ମୁଖ୍ୟ ଚିକିତ୍ସାଧିକାରୀ ଡ. ପ୍ରହ୍ଲାଦ ପଣ୍ଡା, କ୍ୟାପଟେନ ଅତୁଲ୍ୟ ମହାପାତ୍ର, ଟ୍ରାଫିକ ମ୍ୟାନେଜର ଏସକେ ମିଶ୍ର ପ୍ରମୁଖ ଉପସ୍ଥିତ ଥିଲେ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
