ଜଗତସିଂହପୁର: ଫେବୃଆରୀ 14, 2019 । ପ୍ରେମର ଏହି ଦିନରେ ଘୃଣା ଓ ଆତଙ୍କିରାଜରେ ଥରି ଉଠିଥିଲା ଜମ୍ମୁ କଶ୍ମୀରର ପୁଲୱାମା ସହର । କ୍ଷଣିକରେ ସ୍ତବ୍ଧ ହୋଇଯାଇଥିଲା ଦେଶ ଓ ଭାରତୀୟଙ୍କ ପାଇଁ ଦିନଟି ପାଲଟିଗଲା କଳା ଦିବସ । ଆତଙ୍କୀ ଆକ୍ରମଣର ଶିକାର ହୋଇଥିଲେ ଭାରତୀୟ ଯବାନ । ଆଖି ପିଛୁଳାକେ ନୀରବି ଯାଇଥିଲେ ଭାରତମାତାର 40 ସୁଯୋଗ୍ୟ ସନ୍ତାନ । ଆଉ ଏହି ବୀର ଯବାନଙ୍କ ମଧ୍ୟରେ ଥିଲେ ଓଡିଶା ମାଟିର ଗର୍ବ, ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ପାରି ଶିଖର ଗାଁର ବୀର ଓଡିଆ ପୁଅ ପ୍ରସନ୍ନ ସାହୁ ।
ଏହା ଭିତରେ ପୁଲୱାମା ଆତଙ୍କୀ ଆକ୍ରମଣକୁ ପୁରିଛି ବର୍ଷେ । ତଥାପି ଆତ୍ମୀୟଙ୍କ ଆଖିରୁ ଶୁଖିନି ଲୁହ। ଗୁମୁରି ଗୁମୁରି କାନ୍ଦୁଛି ଗାଁ ମାଟି। ଖୋଜୁଛି ତାର ବୀର ସନ୍ତାନକୁ । ସେପଟେ ବର୍ଷକ ତଳୁ ବାପାଙ୍କୁ ହରାଇ, ଆଜି ବି ବାପାଙ୍କୁ ବୀରତ୍ବ ସଲାମ ଜଣାଇ ଝୁରି ହେଉଛି ଝିଅ ରୋନି।
ସେପଟେ ଗ୍ରାମବାସୀଙ୍କ ମନରୁ ବି ଆଜି ଯାଏଁ ଲିଭିନି ପ୍ରସନ୍ନଙ୍କ ସ୍ମୃତି । ଗାଁ ମନ୍ଦିର ପୁନରୁଦ୍ଧାର କରିବାର ତାଙ୍କର ଶେଷ ଇଚ୍ଛା ପୂରଣ ହେବା ଆଗରୁ ହିଁ ଚିରଦିନ ପାଇଁ ନୀରବି ଯାଇଛନ୍ତି ସେ । ତେବେ ଶହୀଦ ପ୍ରସନ୍ନଙ୍କ ପ୍ରଥମ ଶ୍ରାଦ୍ଧ ବାର୍ଷିକୀରେ ଗ୍ରାମବାସୀ ଏକ ତିନି ଦିନିଆ କାର୍ଯ୍ୟକ୍ରମରେ ଆୟୋଜନ କରିଛନ୍ତି । ଏଥିରେ ସ୍କୁଲ ଛାତ୍ରଛାତ୍ରୀଙ୍କ ପାଇଁ କ୍ରୀଡା ପ୍ରତିଯୋଗିତା ରହିଥିବା ବେଳେ ଉଦ୍ଦେଶ୍ୟ ରହିଛି ଆଗାମୀ ଭବିଷ୍ୟତଙ୍କ ପାଖରେ ପ୍ରସନ୍ନଙ୍କ ମହତ ଉଦ୍ଦେଶ୍ୟ ଓ ଆଦର୍ଶ ପହଞ୍ଚାଇବା ।
ତେବେ ଆଗକୁ ଶହୀଦଙ୍କ ସମ୍ମାନାର୍ଥେ ଏକ ‘ଶହୀଦ ପ୍ରସନ୍ନ ସାହୁ ସ୍ମୃତି କମିଟି’ ଗଠନ କରାଯିବାର ଯୋଜନା ରହିଛି । ଏହି ଯୋଜନାରେ ଗାଁରେ ପ୍ରସନ୍ନଙ୍କ ପ୍ରତିମୂର୍ତ୍ତି ସ୍ଥାପନ ସହ ରକ୍ତଦାନ ଶିବିର ଆୟୋଜନ କରାଯିବାର କାର୍ଯ୍ୟକ୍ରମ ରହିଛି।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
