ପାରାଦ୍ୱୀପ: ପାରାଦ୍ବୀପ ମାଛଧରା ବନ୍ଦରରେ ଆଜି(ଶନିବାର) ପୁଣି ଅଘଟଣ ଘଟିଛି । ମାଛଧରା ବନ୍ଦରର ଜେଟି ଉପରୁ ଖସିପଡି ଜଣେ 16 ବର୍ଷୀୟ ନାବାଳକର ମୃତ୍ୟୁ ଘଟିଛି । ବରଫ ଗୁଣ୍ଡ ଗୋଟାଇବାକୁ ଯାଇଥିବା ସମୟରେ ଏହି ଅଘଟଣ ଘଟିଥିବା ଜଣାପଡିଛି । ସୂଚନା ଅନୁଯାୟୀ, ନେହେରୁ ବଙ୍ଗଳା ଫିସୋରି କଲୋନୀରେ ରହୁଥିବା ପ୍ରତାପ ନାଥଙ୍କ ପୁଅ ଜୀବନ ନାଥ ମାଛଧରା ବନ୍ଦରର 4 ନମ୍ବର ଜେଟିରୁ ବରଫ ଗୁଣ୍ଡ ଗୋଟାଇବାକୁ ଯାଇଥିଲେ ।
ଏହି ସମୟରେ ହଠାତ୍ ଜେଟିରୁ ପାଣିକୁ ଖସି ପଡ଼ିଥିଲେ । ସ୍ଥାନୀୟ ଲୋକେ ଓ ମତ୍ସଜୀବୀମାନେ ସଙ୍ଗେ ସଙ୍ଗେ ତାଙ୍କୁ ବୋଟ ଯୋଗେ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ପତ୍ତା ପାଇନଥିଲେ । ପରେ କୁଜଙ୍ଗ ଅଗ୍ନିଶମ ବିଭାଗ ଓ ମେରାଇନ ପୋଲିସକୁ ଖବର ଦିଆଯିବା ପରେ ଉଦ୍ଧାରକାରୀ ଦଳ ସମୁଦ୍ରରୁ ମୃତଦେହ ଉଦ୍ଧାର କରିଛନ୍ତି ।
ଦୁଇ ଦିନ ତଳେ ଏହି ମାଛଧରା ବନ୍ଦରରେ ଜଣେ ବୁଡି ପ୍ରାଣ ହରାଇଥିବାବେଳେ, ଆଜି ପୁଣି ଜଣେ ନାବାଳକଙ୍କ ମୃତ୍ୟୁ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି । ତେବେ ବାରମ୍ବାର ସମାନ ଅଘଟଣ ଘଟୁ ଥିବାବେଳେ ସ୍ଥାନୀୟ ଲୋକ, ମତ୍ସ୍ୟଜୀବୀଙ୍କୁ ଏଥିପ୍ରତି ସତର୍କ ରହିବାର ଆବଶ୍ୟକତା ପଡିଛି । ତା' ସାଙ୍ଗକୁ ପ୍ରଶାସନ ସୁରକ୍ଷା ସାଙ୍ଗକୁ ସଚେତନତା ବୃଦ୍ଧି ଦିଗରେ ଧ୍ୟାନ ଦେଲେ ଏପରି ଅଘଟଣକୁ ଏଡାଯାଇପାରେ ବୋଲି କୁହାଯାଉଛି ।
ଇଟିଭି ଭାରତ, ଜଗତସିଂହପୁର
