ଜଗତସିଂହପୁର: ଚିକିତ୍ସା ପାଇଁ ମେଡିକାଲକୁ ଆସିଥିବା ମହିଳାଙ୍କୁ ମିଳିଲା ନାହିଁ ଶଯ୍ୟା । ମେଡିକାଲ ବାରଣ୍ଡାରେ ବସିଥିବା ବେଳେ ମହିଳା ଜଣଙ୍କୁ ଧକ୍କା ଦେଇ ବାହର କଲେ ସୁରକ୍ଷାକର୍ମୀ । ଏଭଳି ଅଭାବନୀୟ ଘଟଣା ଘଟିଛି ଜିଲ୍ଲା ମୁଖ୍ୟ ଚିକିତ୍ସାଳୟରେ ।
ସୂଚନା ଅନୁଯାୟୀ ମହିଳା ଜଣଙ୍କ ଭିକ୍ଷା ବୃତ୍ତି କରୁଥିବା ବେଳେ ଗତକାଲି ତାଙ୍କ ଶିଶୁଙ୍କ ପାଇଁ ଜଣେ ଦୋକାନୀଙ୍କୁ ଖାଦ୍ୟ ମାଗିଥିଲେ । ହେଲେ ଦୋକାନୀ ଜଣଙ୍କ ତାଙ୍କୁ ଖାଦ୍ୟ ବଦଳରେ ମାଡ ମାରିଥିଲେ । ଫଳରେ ମହିଳା ଜଣଙ୍କ ଆହତ ହୋଇ ଗତ ସନ୍ଧ୍ୟାରେ ମୁଖ୍ୟ ଚିକିତ୍ସାଳୟକୁ ଆସିଥିବା ବେଳେ ଚିକିତ୍ସା ପାଇଁ ଡାକ୍ତର ତାଙ୍କୁ ମେଡିକାଲରେ ୫ଦିନ ରହିବାକୁ ପରାମର୍ଶ ଦେଇଥିଲେ । କିନ୍ତୁ ବେଡ଼ ନ ମିଳିବାରୁ ମେଡ଼ିକାଲ ବାରଣ୍ଡାରେ ରହିଥିଲେ । ଏହି ସମୟରେ ତାଙ୍କ ଶିଶୁ ପରିସ୍ରା କରି ଦେବାରୁ ସୁରକ୍ଷାକର୍ମୀ ଉଭୟ ମା ଓ ଶିଶୁକୁ ଧକ୍କା ଦେଇ ହସ୍ପିଟାଲରୁ ବାହାର କରିଦେଇଥିଲେ ।
ମହିଳା ଜଣକ ଏହି ଘଟଣା ନେଇ ଅଭିଯୋଗ କରିବା ପରେ ଏହାର ତଦନ୍ତ କରାଯାଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଦିଲ୍ଲୀପ କୁମାର ପଣ୍ଡା କହିଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
