ଜଗତସିଂହପୁର: ଆଳିପିଙ୍ଗଳ ବାଲିଘାଟରୁ ବେଆଇନ ବାଲି ଉଠାଇ ଶହଶହ ଟ୍ରକରେ ବାଲି ଗଚ୍ଛିତ ଥିବା ଅଭିଯୋଗ ହୋଇଛି । ଗଚ୍ଛିତ ଏହି ବେଆଇନ ବାଲିକୁ ଦିନ ଦ୍ବିପ୍ରହରେ ବେଧଡକ ଭାବେ ଚାଲାଣ କରାଯାଉଛି । କିନ୍ତୁ ସବୁ ଦେଖି ନୀରବଦ୍ରଷ୍ଟା ସାଜିଛି ପ୍ରଶାସନ ।
ନଦୀରେ ବନ୍ୟାଜଳ ପ୍ରବାହିତ ହେବା ଜାଣି ପୂର୍ବରୁ ଶହ ଶହ ଟ୍ରକରେ ବାଲିକୁ ଆଳିପିଙ୍ଗଳ ଜେଲ ସାମନାରେ ଥିବା ସରକାରୀ ଜମି, ସରକାରୀ ଆମ୍ବ ତୋଟା ଓ ଯଶବନ୍ତପୁର ରାସ୍ତା କଡରେ ରଖାଯାଇଥିଲା । ବାଲି ଏକ ଲଘୁଖଣିଜ ସମ୍ପଦ ହୋଇଥିବାବେଳେ ଏହାର ସୁରକ୍ଷା ଓ ସଂରକ୍ଷଣ ତହସିଲଦାର ଏବଂ ଜିଲ୍ଲା ପ୍ରଶାସନ ଉପରେ ନ୍ୟସ୍ତ ରହିଛି । କିନ୍ତୁ କିଛି ଦୁର୍ନିତିଗ୍ରସ୍ତ ଅଧିକାରୀଙ୍କ ପ୍ରରୋଚନାରେ ବାଲି ମାଫିଆ ସକ୍ରିୟ ହୋଇ ଉଠୁଛନ୍ତି । ବାଲି ମାଫିଆ ଅନ୍ୟ ଜଣକ ନାମରେ ଟେଣ୍ଡର ଆଣି ନିଜେ ସଦର ତହସିଲର ଆଳିପିଙ୍ଗଳ ଓ ମୁଣ୍ଡିଲ ବାଲିଘାଟକୁ ନିୟନ୍ତ୍ରଣ କରୁଛି । ମାତ୍ର ଏହି ଦୁର୍ନୀତି ଦ୍ବାରା ସରକାର ଲକ୍ଷ ଲକ୍ଷ ଟଙ୍କାର ରାଜସ୍ବ ହରାଉଛନ୍ତି ।
ସରକାରୀ ନିୟମ ଅନୁସାରେ ଘାଟରୁ ଯେତିକି ବାଲି ଉଠିବା କଥା ତା ଠାରୁ ଶହେ ଗୁଣ ଅଧିକ ବାଲି ଉତ୍ତୋଳନ କରାଯାଉଛି । ବିନା ଅନୁମତିରେ ଶହ ଶହ ଟ୍ରକ ବାଲି ଉଠାଯାଇ ରଖାଯାଉଥିଲେ ମଧ୍ୟ ସେମାନଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ।
ଏସମ୍ପର୍କରେ ଆମେ ଜଗତସିଂହପୁର ତହସିଲଦାର ମନୋଜ କୁମାର ଭୋଇଙ୍କୁ ପଚାରିଥିଲୁ । ମାମଲାର ତଦନ୍ତ କରାଯିବ ବୋଲି ସେ କହିଛନ୍ତି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
