ଜଗତସିଂହପୁର: ମହିଳା ନିଜ ଉଦ୍ୟମ ବଳରେ ଗିରି ଶୃଙ୍ଗ ଲଙ୍ଘିବାର କ୍ଷମତା ରଖେ । ଅସାଧ୍ୟକୁ ସାଧ୍ୟ କରିବାର ଦୃଢ ମନୋବଳ ରଖେ । ତଥାପି ନାରୀ ଜୀବନର ଅଧାରୁ ଅଧିକ ସମୟ କଟେ ରୋଷଶାଳରେ । ଚୂଲ୍ଲାର ନିଆଁ ଓ ଧୂଆଁ ସହ ଜଡିତ ନାରୀ ଜୀବନ । ହେଲେ ଏହି ଧୂଆଁ ଯେ ଶରୀର ପ୍ରତି କେତେ ହାନିକାରକ ତାହା କଳ୍ପନା ବାହାରେ । ଏମିତିରେ ନାରୀ ଜୀବନର ଏହି ଦୈନନ୍ଦିନ ସମସ୍ୟାକୁ ହୃଦବୋଧ କରି ସମାଧାନ ଖୋଜିବା ପାଇଁ ଅଣ୍ଟା ଭିଡିଥିଲେ ଜଗତସିଂହପୁର ଜିଲ୍ଲା ତରଡାପଡାର ଶୁଭରାଣୀ ମହାନ୍ତି ।
ବୟସ ପାଖାପାଖି 47 ହେବ । ଆଜି ବି ଆଗକୁ ବଢିବାର ଆଖିରେ ଆଖିଏ ସ୍ବପ୍ନ । ଏହି ନିଶା ହିଁ ତାଙ୍କୁ ସରକାରୀ ଚାକିରୀ ଛାଡି ମହିଳାମାନଙ୍କ ସୁବିଧା ପାଇଁ କିଛି ନୂଆ କରିବାର ପ୍ରେରଣା ଯୋଗାଇଥିଲା । ଆଉ ସ୍ବାମୀଙ୍କ ସହଯୋଗରେ 2013 ମସିହାରେ ଆରମ୍ଭ ହେଲା ‘Smokeless Stove Associates’ ବା ଧୂମହୀନ ଚୂଲ୍ଲା ଶିଳ୍ପ । ନାମ ରଖାଗଲା ‘ଶ୍ରୀ’ ଚୂଲ୍ଲା । ‘ସ୍ବଚ୍ଛ ଇନ୍ଧନ’ ଓ ‘ସ୍ବଚ୍ଛ ଭାରତ’ ନାରାକୁ ଆଧାର କରି ପ୍ରସ୍ତୁତ ହୋଇଥିବା ଏହି ଚୂଲ୍ଲାଟି ହେଉଛି 50 ପ୍ରତିଶତ ଜାଳେଣି ସଞ୍ଚୟକାରୀ ଓ 50 ପ୍ରତିଶତ ଧୂମହୀନ ।
ଅନାବଶ୍ୟକ ଜାଳେଣି କାଠ, ନଡିଆ କତା, ସଢେଇ ଓ ଘସିକୁ ନେଇ ପ୍ରସ୍ତୁତ ଏହି ଚୂଲ୍ଲାର ଏବେ ବଜାରରେ ଚାହିଦା କାହିଁରେ କେତେ । ଫଳରେ ଶୁଭରାଣୀଙ୍କ ସହ ଆତ୍ମନିର୍ଭରଶୀଳ ହୋଇପାରିଛନ୍ତି 20ରୁ ଉର୍ଦ୍ଧ୍ବ ମହିଳା । ଏଥିସହ ଶିଳ୍ପ ସହ ପରୋକ୍ଷରେ ଜଡିତ ହୋଇଛନ୍ତି ପ୍ରାୟ 50ରୁ ଉର୍ଦ୍ଧ୍ବ ଲୋକ । ପ୍ରାଥମିକ ପର୍ଯ୍ୟାୟରେ ଘରୋଇ ବ୍ୟାଙ୍କରୁ 10 ଲକ୍ଷର ସହାୟତା ଆଣି ଏହି ଶିଳ୍ପ ଆରମ୍ଭ ହୋଇଥିବା ବେଳେ ବର୍ତ୍ତମାନ 40 ଲକ୍ଷ ଟଙ୍କା ଓ ନିଜସ୍ବ ଉଦ୍ୟମରେ ସଫଳତାର ସହ ଆଗେଇ ଚାଲିଛି ବ୍ୟବସାୟ ।
ତେବେ କେବଳ ଜଗତସିଂହପୁର ନୁହେଁ ବରଂ ଜିଲ୍ଲା ବାହାରେ ବି ରହିଛି ଏହି ଚୂଲ୍ଲାର ବେଶ ଚାହିଦା । ଫଳରେ ନିଜେ ଆର୍ଥିକ ଭାବେ ସ୍ବାବଲମ୍ବୀ ହେବା ସହ ଅନ୍ୟ ମହିଳାଙ୍କ ପାଇଁ ମାର୍ଗଦର୍ଶୀ ସାଜିଛନ୍ତି ଶୁଭରାଣୀ ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
