ଜଗତସିଂହପୁର: ଆସ୍ଥା ଓ ବିଶ୍ବାସର ପ୍ରତୀକ ମା' ଲକ୍ଷ୍ମୀ । କେଉଁ ଅନାଦି କାଳରୁ ମା' ଙ୍କ ଆରାଧନା କରିଆସୁଛନ୍ତି ନବାପାଟଣା ଗ୍ରାମବାସୀ । 8 ହଜାର ଜନସଂଖ୍ୟା ବିଶିଷ୍ଟ ଏହି ଗ୍ରାମରେ 18 ଟି ସାହି ରହିଛି । କୁମାର ପୂର୍ଣ୍ଣିମା ଆସିଗଲେ, କି ହିନ୍ଦୁ କି ମୁସଲମାନ, ସମସ୍ତେ ଏକାକାର ହୋଇ ଉଠନ୍ତି ମା'ଙ୍କ ଆରାଧନା କରିବାକୁ । ପ୍ରତ୍ୟେକ ସାହିରେ ମା'ଙ୍କ ମୂଣ୍ମୟୀ ମୂର୍ତ୍ତି ପୂଜା କରାଯାଏ ଭକ୍ତି ଓ ଭାବର ସହିତ ।
ଭକ୍ତର ପୂଜାପାଇଁ ଶ୍ରୀକ୍ଷେତ୍ରରୁ ଚାଲିଆସନ୍ତି ମା' ଲକ୍ଷ୍ମୀ । ସାତଦିନ ଧରି ସମ୍ପୂର୍ଣ୍ଣ ରୀତିନୀତିରେ ପୂଜା ପରେ ପୁଣି ଫେରିଯାଆନ୍ତି ବଡ ଦେଉଳକୁ । ଏପରି ଆସ୍ଥା ଓ ବିଶ୍ବାସ ରହିଛି ଗ୍ରାମବାସୀଙ୍କ ମନରେ । ଏହାକୁ ନେଇ ଘରେ ଘରେ ପିଠାପଣା ସାଙ୍ଗକୁ,ଝୋଟି ଚିତାରେ, ଆକର୍ଷଣୀୟ ହୋଇ ଉଠେ ଗାଁ ପରିବେଶ । ଶହେ ବର୍ଷ ପୁରାତନ ଏ ପୂଜା ହେଉଛି ଭାଇଚାରକୁ ଗୋଟିଏ ସୂତ୍ରରେ ବାନ୍ଧି ରଖିଥିବା ଜଗତସିଂହପୁର ଜିଲ୍ଲା ନବାପଟଣା ଗ୍ରାମର । କୁମାରୀ ଲକ୍ଷ୍ମୀଙ୍କ ପୂଜା ପାଇଁ ଜିଲ୍ଲା ବେଶ ସୁପରିଚିତ ।
ମୂଳାଷ୍ଟମୀ ପୂର୍ବ ଦିନ ମା'ଙ୍କ ମୂର୍ତ୍ତି ନିର୍ମାଣ ପାଇଁ ମାଟି ଅନୁକୂଳ କରାଯିବା ପରେ ନିର୍ମାଣ କରାଯାଏ ମୁଣ୍ମୟୀ ମୂର୍ତ୍ତି । ଏହାପରେ ଅତି ଯତ୍ନର ସହ କାରିଗର ମାନେ ପ୍ରାକୃତିକ ରଙ୍ଗରେ ମା' ଙ୍କୁ ରଙ୍ଗୀନ ରୂପରେ ସଜାଇଥାନ୍ତି । ରୂପା ତାରକସି ଓ ସୋଲ ମେଢରେ ସଜ୍ଜିତ ହୁଅନ୍ତି ମା' । ଏହି ଯାତ୍ରା ଦେଖିବା ପାଇଁ ଜିଲ୍ଲା ଓ ଜିଲ୍ଲା ବାହାରୁ ପ୍ରବଳ ଜନସମାଗମ ହୋଇଥାଏ । ଶହେ ବର୍ଷର ପ୍ରାଚୀନ ଲକ୍ଷ୍ମୀପୂଜା । ଏଠାରେ ମା'ଙ୍କୁ ଦର୍ଶନ କଲେ କୁଆଡେ ଦରିଦ୍ରତା ଦୂର ହେବା ସହ ସୁଖ ସମୃଦ୍ଧ ଲାଭ ହୋଇଥାଏ ବୋଲି ଶ୍ରଦ୍ଧାଳୁଙ୍କ ଦୃଢ ବିଶ୍ବାସ ରହିଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
