ଜଗତସିଂହପୁର: ବନ୍ୟା ପ୍ରଭାବିତ ଅଞ୍ଚଳ ବାଲିକୁଦା-ଏରସମା ନିର୍ବାଚନ ମଣ୍ଡଳୀରେ ଏବେ ଗରମାଗରମ ରାଜନୀତି । ଗୋଟିଏ ପଟେ ଦଳଡିଆଁ ନେତା ବିଜେପିରୁ ଡ. ଦାମୋଦର ରାଉତ ଓ ବିଜେଡିର ରଘୁନନ୍ଦନ ଦାସ ଅନ୍ୟପଟେ କଂଗ୍ରେସ ବରିଷ୍ଠ ନେତା ଡ. ଲଲାଟେନ୍ଦୁ ମହାପାତ୍ର । 3ଦଳର ହେଭିୱେଟ ନେତାଙ୍କ ଭିତରେ ଚାଲିଛି କଡା ଟକ୍କର । ତେବେ ଏନେଇ ଡ. ଲଲାଟେନ୍ଦୁ କଣ ଆଶା ରଖିଛନ୍ତି ସେନେଇ ପଚାରି ବୁଝିଛନ୍ତି ଆମ ଜଗତସିଂହପୁର ପ୍ରତିନିଧି ।
‘କଂଗ୍ରେସର ସ୍ଥିତି ସୁଦୃଢ ରହିଛି । ଲୋକଙ୍କ ବିଶ୍ବାସ ଓ ଭରସା ଏଠି ବହୁତ ରହିଛି । କାରଣ ଅନ୍ୟ ଦୁଇ ପ୍ରମୁଖ ପ୍ରାର୍ଥୀ ଦଳବଦଳ କରି ଚୟନ ହୋଇଛନ୍ତି । ହେଲେ କଂଗ୍ରେସ ବିଶ୍ବସ୍ତ । ଏଣୁ ଏଠାରେ ଦଳ ଜିତିବା ନିଶ୍ଚିତ’ ବୋଲି ଦୃଢୋକ୍ତି ବାଢିଛନ୍ତି ଡ. ଲଲାଟେନ୍ଦୁ ।
ହେଭିୱେଟ ଦାମୋଦରଙ୍କ ସହ ଟକ୍କରକୁ ନେଇ କଣ ରହିଛି ରଣନୀତି ପ୍ରଶ୍ନର ଉତ୍ତରେ ସେ କହିଛନ୍ତି ଯେ, ହେଭି ନୁହେଁ, ଲାଇଟୱେଟ ହେଲେଣି ଦାମ । ବିଜେପିରେ ସେ, ବିଜେଡିରେ ତାଙ୍କ ପୁଅ । ସେହିପରି ବିଜେପିରେ ଏତେ ଦିନ ରହି ବି ଦଳ ଛାଡିଥିବା ରଘୁନାଥ ମଧ୍ୟ ଦଳର ନୀତି ଆଦର୍ଶ ନୁହେଁ, ନିଜ ସ୍ବାର୍ଥ ପାଇଁ ଲଢୁଛନ୍ତି । ଏଣୁ ଏଭଳି ନୀତିହୀନ ନେତା ନୁହେଁ, ବିଶ୍ବସ୍ତ ପ୍ରାର୍ଥୀଙ୍କୁ ଚୟନ କରିବେ ବାଲିକୁଦା ଭୋଟର ।
ପାଣି ସମସ୍ୟା, ଡାକ୍ତରଖାନା ରହିଛି ହେଲେ ଡାକ୍ତର ନାହାନ୍ତି, ପର୍ଯ୍ୟଟନ ସ୍ଥଳୀ ନାହିଁ, ସରକାରୀ ଯୋଜନା ଜନତାଙ୍କ ପାଖରେ ପହଞ୍ଚି ପାରିନାହିଁ । ଏଭଳି ବିଭିନ୍ନ ମୁଦ୍ଦାକୁ ନେଇ ନିର୍ବାଚନ ମୈଦାନକୁ ଓହ୍ଲାଇଛି ବୋଲି କହିଛନ୍ତି ଲଲାଟେନ୍ଦୁ ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
