ଭୁବନେଶ୍ବର: ଦାମ ରାଉତଙ୍କ କଥା ହେଉଛି ଆଗ ମାଟି ପରେ ପାର୍ଟି । ଶେଷରେ ଦାମ ରାଉତ । ତାଙ୍କ ପାଇଁ ମାଟି ହେଉଛି ଏରସମା-ବାଲିକୁଦା । ସେଠାରେ ସମସ୍ତେ ତାଙ୍କ ଭାଇ ଓ ସଙ୍ଗାତ । ସେମାନଙ୍କ ସ୍ବାର୍ଥ ଓ ସେବା ଏକାନ୍ତ କାମ୍ୟ ବୋଲି କହିଛନ୍ତି ବରିଷ୍ଠ ବିଜେପି ନେତା ଦାମ ରାଉତ ।
ଦାମ ରାଉତ ନିର୍ବାଚନ ଲଢିବେ ନାହିଁ । ଏପରି ଖବର କିଛିଦିନ ଧରି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ହେଲେ ଏହାକୁ ଖଣ୍ଡନ କରି ଏପରି ମନ୍ତବ୍ୟ ଦେଇଛନ୍ତି ବିଜେପି ନେତା । ବିଜେପି ଦଳ ଓ ଏହାର ନେତାଙ୍କ ପ୍ରଶଂସା କରି ସେ କହିଛନ୍ତି ଯେ ଏହି ଦଳ ମାଧ୍ୟମରେ ସେ ନିଜ ଲୋକଙ୍କ ସେବା କରିବାର ସୁଯୋଗ ପାଇଛନ୍ତି ।
ତାଙ୍କ ବିରୋଧରେ ଭିଡିଓ ଭାଇରାଲ କରୁଥିବା ଲୋକଙ୍କ ବୃତ୍ତିଗତ ଧର୍ମ କିଛି ନାହିଁ । ଏସବୁ ଖବର ଗୁଜବ । ସେ ଆଗାମୀ ନିର୍ବାଚନ ଲଢୁଛନ୍ତି । ଏଥିପାଇଁ ଆସନ୍ତା 8ରେ ନାମାଙ୍କନ ଦାଖଲ କରିବା ନେଇ ସେ ସ୍ପଷ୍ଟ କରିଛନ୍ତି । ଏରସମା-ବାଲିକୁଦା ନିର୍ବାଚନମଣ୍ଡଳୀରୁ ଲଢିବେ ଓ ଭଲ ଭୋଟରେ ଜିତିବେ ବୋଲି ଦାମ ଦୃଢୋକ୍ତି ପ୍ରକାଶ କରିଛନ୍ତି ।
ନିଜ ଜନ୍ମମାଟି ହୋଇଥିବାରୁ ସେହି ସ୍ଥାନ ସେ ବାଛିଛନ୍ତି । ନବୀନଙ୍କୁ ଟାର୍ଗେଟ କରି ସେ କହିଛନ୍ତି ଯେ ରାଜ୍ୟ ସରକାରଙ୍କ ଦୁର୍ନୀତି ଓ ଭ୍ରଷ୍ଟାଚାର ବିରୋଧରେ ବିଜେପି ସ୍ବର ଉତ୍ତୋଳନ କରିଛି । ଏଥିପାଇଁ ଦଳର କେନ୍ଦ୍ରୀୟ ନେତୃବୃନ୍ଦଙ୍କୁ ସେ ପ୍ରଶଂସା କରିଛନ୍ତି । ଏହାସହ ବିଜେଡିକୁ କେବଳ ବିଜେପି ହିଁ ସମାଧି ଦେଇପାରିବ । ଆଗାମୀ ନିର୍ବାଚନରେ ରାଜ୍ୟରେ ପରିବର୍ତ୍ତନ ହେବ ବୋଲି ଦାମ କହିଛନ୍ତି । ନବୀନ ସରକାରଙ୍କୁ ଗାଦିଚ୍ୟୁତ କରିବାକୁ ସେ ବିଜେପି ଯାଇଥିବା କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
