ଜଗତସିଂହପୁର: ଜିଲ୍ଲାରେ ‘ବୁଲବୁଲ’ ଛାଡିଯାଇଛି ଦୁଃଖ। ଧୋଇ ନେଲା ଚାଷ, ଉଜାଡ଼ି ଦେଲା ସୁନାର ଫସଲ। ଭାଙ୍ଗି ଦେଇଛି ଚାଷୀର ମେରୁଦଣ୍ଡ। ‘ଫାଇଲିନ’, ‘ଫନି’ ପରେ ଅଣ୍ଟା ସଳଖି ପାରିନଥିବା ଚାଷୀ ଉପରେ ପୁଣି ବୋଝ ଉପରେ ନଳିତା ବିଡା ଲଦି ଦେଇଛି ‘ବୁଲବୁଲ’। ଯାହାକୁ ନେଇ ଚିନ୍ତାରେ ଚାଷୀକୂଳ।
‘ବୁଲବୁଲ’ ପ୍ରଭାବରେ ସମଗ୍ର ଜିଲ୍ଲାରେ ହୋଇଥିବା କ୍ଷୟକ୍ଷତିର ପ୍ରାଥମିକ ଆକଳନ କରିଛି ପ୍ରଶାସନ। ଜିଲ୍ଲାରେ ମୋଟ 29 ହଜାର 450 ହେକ୍ଟର ଚାଷଜମି ପ୍ରଭାବିତ ହୋଇଛି। ବିଶେଷ ଭାବରେ ପାରାଦୀପ ସଂଲଗ୍ନ ବାଲିତୁଠ, ପାରାଦୀପ ଗଡ, କୁଜଙ୍ଗ, ନାଉଙ୍ଗା ବ୍ଲକର ଡେରିକି, ତିରୁଣା, ଜମୁଙ୍ଗା, ସେହିପରି ବିରିଡ଼ି ବ୍ଲକର ଗେଲପୁର, ବରେଡ଼ିଆ, ଶିବପୁର, ଶଙ୍କରପୁର, ଅଲଣ୍ଡରେ ବ୍ୟାପକ ଭାବରେ ପନିପରିବା ସହିତ ପାନ ଓ ଧାନ ଚାଷ କ୍ଷତିଗ୍ରସ୍ତ ହୋଇଛି।
ପ୍ରବଳ ବର୍ଷା ଯୋଗୁଁ ଅନେକ ଅଞ୍ଚଳରେ ଧାନ ଗୁଡ଼ିକ ଅମଳ ଉପଯୋଗୀ ହୋଇଥିଲେ ମଧ୍ୟ କ୍ଷେତରେ ସେଗୁଡିକ ଶୋଇ ରହିଛି। ବିଲ ମଧ୍ୟରେ ପାଣି ନିଷ୍କାସିତ ହୋଇ ନଥିବାରୁ ଚିନ୍ତା ପ୍ରକଟ କରିଛନ୍ତି ଜିଲ୍ଲାର ଅଧିକାଂଶ ଚାଷୀ। ଜିଲ୍ଲା ପ୍ରଶାସନ ପକ୍ଷରୁ ଏଯାବତ ସଠିକ କ୍ଷୟକ୍ଷତିର ଆକଳନ କରାଯାଇ ପାରିନାହିଁ। ଜିଲ୍ଲାରେ ଶହ ଶହ ହେକ୍ଟର ପନିପରିବା ନଷ୍ଟ ହୋଇଛି। କୋବି, ବାଇଗଣ, ଝୁଡଙ୍ଗ, ବିନ୍ସ, ଟମାଟୋ, କୋଶଳା ଆଦି ପରିବା ନଷ୍ଟ ହେବ ସହ କୋଳଥ ଓ ବିରି ଗଛ ଉଜୁଡି ଯାଇଛି।
ଜଗତସିଂହପୁର ଜିଲ୍ଲା ରାଜ୍ୟର ଏକ କୃଷି ପ୍ରଧାନ ଜିଲ୍ଲା ଭାବେ ପରିଚିତ। ଏଠାରେ ପ୍ରାୟ 55 ପ୍ରତିଶତ ଲୋକ କୃଷି ଉପରେ ନିର୍ଭର କରିଥାନ୍ତି। ଜିଲ୍ଲାରେ ବାରମ୍ବାର ପ୍ରାକୃତିକ ବିପର୍ଯ୍ୟୟ ଚାଷ ଓ ଚାଷୀଙ୍କ ଉପରେ ଗଭୀର ପ୍ରଭାବ ପକାଉଛି। ତୁରନ୍ତ କ୍ଷୟକ୍ଷତିର ଆକଳନ କରାଯାଇ କ୍ଷତି ପୂରଣ ଦେବାକୁ ଦାବି ହୋଇଛି।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
