ଜଗତସିଂହପୁର: ମାତ୍ର ଦୁଇଜଣ କାଉନସିଲ୍ରରେ ବିଜେପି ହାତେଇଲା ଜଗତସିଂହପୁର ପୌରପରିଷଦର ଉପାଧ୍ୟକ୍ଷ ପଦ । ରାଜ୍ୟର ଅନ୍ୟ ପୌରପରିଷଦ ଭଳି ଆଜି (ଗୁରୁବାର) ଜଗତସିଂହପୁର ପୌରପରିଷଦର ଉପାଧ୍ୟକ୍ଷ ପଦ ପାଇଁ ମଧ୍ୟ ନିର୍ବାଚନ ହୋଇଥିଲା । ଏଥିରେ ଭାରତୀୟ ଜନତା ପାର୍ଟି(BJP) ରାଜେନ୍ଦ୍ର ବିଶୋଇଙ୍କୁ ପ୍ରାର୍ଥୀ କରିଥିବା ବେଳେ ବିଜୁ ଜନତା ଦଳ(BJD) ମନୋଜ ମହାନ୍ତିଙ୍କୁ ପ୍ରାର୍ଥୀ କରିଥିଲା । ତେବେ 21ଟି ୱାର୍ଡ ବିଶିଷ୍ଟ ଜଗତସିଂହପୁର ପୌରପରିଷଦର ସଦ୍ୟ ସମାପ୍ତ ନିର୍ବାଚନରେ ବିଜେଡି 9ଟି କାଉନସିଲର ଥିବା ବେଳେ କଂଗ୍ରେସର 7, ବିଜେପିର 2 ଓ 3 ଜଣ ସ୍ବାଧୀନ ନିର୍ବାଚିତ ହୋଇଥିଲେ।
ତେବେ ଶାସକ ବିଜେଡିକୁ ଜଣେ ସ୍ବାଧୀନ କାଉନସିଲର ସମର୍ଥନ ଦେଇଥିବା ବେଳେ ବିଜେପି ପ୍ରାର୍ଥୀ ରାଜେନ୍ଦ୍ର ବିଶୋଇଙ୍କୁ କଂଗ୍ରେସର 7 କାଉନସିଲରଙ୍କ ସମେତ ଦୁଇ ସ୍ବାଧୀନ କାଉନସିଲର ସମର୍ଥନ କରିଥିଲେ। ଫଳରେ ଜଗତସିଂହପୁର ପୌର ଉପାଧ୍ୟକ୍ଷ ପଦବୀ କଂଗ୍ରେସ ସମର୍ଥନରେ ବିଜେପି ବିଜୟୀ ହୋଇଥିବା ଜଣାପଡିଛି। ବିଜେଡିକୁ କ୍ଷମତା ଠାରୁ ଦୂରେଇ ରଖିବା ପାଇଁ ଜଗତସିଂହପୁର ପୌର ପରିଷଦରେ କଂଗ୍ରେସ-ବିଜେପି ମେଣ୍ଟ କରାଯାଇଥିବା ଦେଖିବାକୁ ମିଳିଛି । ରାଜନୀତିର ଏହି ରୋଚକ ସମୀକରଣକୁ ନେଇ ଜିଲ୍ଲା ତଥା ସାରା ରାଜ୍ୟରେ ରାଜନୈତିକ ମହଲରେ ଚର୍ଚ୍ଚା ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
