ଗାଁରେ ବହିଲାଣି ନିର୍ବାଚନୀ ହାୱା, ଅସନ୍ତୁଷ୍ଟ କର୍ମୀଙ୍କ ନିକଟତର ବିଜେଡି ନେତା

ଜଗତସିଂହପୁରେ ଉଷ୍ମ ହେଲାଣି ରାଜନୈତିକ ପାଣିପାଗ। ଅସନ୍ତୁଷ୍ଟ କର୍ମୀ ମାନଙ୍କୁ ମନାଇବା ପାଇଁ ଗାଁ ମୁହାଁ ବିଜେଡି ନେତା। ଅଧିକ ପଢନ୍ତୁ

ଜଗତସିଂହପୁର: ପାଖେଇ ଆସୁଛି ବିଧାନସଭା ନିର୍ବାଚନ । ଏହା ପୂର୍ବରୁ ଜଗତସିଂହପୁରେ ଉଷ୍ମ ହେଲାଣି ରାଜନୈତିକ ପାଣିପାଗ । ପଞ୍ଚାୟତ ସ୍ତରରେ ଅସନ୍ତୁଷ୍ଟ କର୍ମୀମାନଙ୍କୁ ମନାଇବା ପାଇଁ ପ୍ରୟାସ ଆରମ୍ଭ କଲେଣି ନେତା । ଜଗତସିଂହପୁର ନିର୍ବାଚନ ମଣ୍ଡଳୀର ଜଗତସିଂହପୁର ଓ ନାଉଗାଁ ବ୍ଲକର ଅନେକ ପଞ୍ଚାୟତରେ ଶାସକ ବିଜୁ ଜନତା ଦଳ ମଧ୍ୟରେ ଅନ୍ତର୍ଦ୍ୱନ୍ଦ ଏବେ ତୀବ୍ର ହେବାରେ ଲାଗିଛି । ଏହାକୁ ପ୍ରଶମିତ କରିବା ପାଇଁ ସ୍ଥାନୀୟ ବିଧାୟକ ପ୍ରଶାନ୍ତ କୁମାର ମୁଦୁଲି ଗାଁ ଗାଁରେ କର୍ମୀ ସମ୍ମିଳନୀ କରି ଅସନ୍ତୁଷ୍ଟକୁ ସନ୍ତୁଷ୍ଟ କରିବା ପାଇଁ ପ୍ରୟାସ ଆରମ୍ଭ କରିଛନ୍ତି ।

ଜଗତସିଂହପୁର ବ୍ଲକ ଅନ୍ତର୍ଗତ ମଧୁସୂଦନପୁର ଶାସନ ପଞ୍ଚାୟତରେ ଶାସକ ବିଜେଡି ଏବେ ଦୁଇ ଭାଗରେ ବିଭକ୍ତ ହୋଇଛି । ଗତ ପଞ୍ଚାୟତ ନିର୍ବାଚନରେ ବିଜେଡିର ଦୁଇଗୋଷ୍ଠୀ ସମାନ୍ତରାଳ ଭାବେ ପ୍ରାର୍ଥୀ ଦେଇଥିଲେ । ପଞ୍ଚାୟତର ଯୁବନେତା ଦୀପ୍ତି ରଞ୍ଜନ ନନ୍ଦ ପ୍ରାର୍ଥୀ ଦେଇଥିବା ବେଳେ ବିଧାୟକଙ୍କ ଦୂର ସମ୍ପର୍କୀୟ ଅକ୍ଷୟ କୁମାର ରାୟଙ୍କ ପତ୍ନୀଙ୍କୁ ପ୍ରାର୍ଥୀ କରାଯାଇଥିଲା । ଫଳରେ ଏହି ପଞ୍ଚାୟତରେ ଭୋଟ ବିଭାଜିତ ହୋଇଥିଲା । କିନ୍ତୁ ବିଧାୟକ ପ୍ରଶାନ୍ତ ମୁଦୁଲିଙ୍କ ଦୂର ସମ୍ପର୍କୀୟ ନିର୍ବାଚନରେ ହାରି ଯାଇଥିଲେ ।

ଏହି ପଞ୍ଚାୟତରେ ବିଜେଡି ମଧ୍ୟରେ ଗୋଷ୍ଠୀ କନ୍ଦଳ ଦେଖାଦେଇଥିବାରୁ ଉନ୍ନୟନ ମୂଳକ କାର୍ଯ୍ୟରେ ବାଧା ସୃଷ୍ଟି ହୋଇଛି । ବିଜେଡିର ଗୋଷ୍ଠୀ କନ୍ଦଳକୁ ପ୍ରଶମିତ କରିବା ପାଇଁ ଜିଲ୍ଲା ପରିଷଦ ଅଧ୍ୟକ୍ଷ ମନୋଜ ଭୋଇଙ୍କୁ ଦାୟିତ୍ୱ ଦିଆ ଯାଇଥିବା ଜଣାପଡ଼ିଛି । ଜିଲ୍ଲାର ଛାମୁଆ ନେତାମାନେ ଏବେ ଗାଁ ଗାଁ ବୁଲି ଦଳ ମଧ୍ୟରେ ଥିବା ବିବାଦକୁ କିଭଳି ପ୍ରଶମିତ କରାଯିବ ସେ ନେଇ ଉଦ୍ୟମ ଆରମ୍ଭ କରିଛନ୍ତି । ଅପର ପକ୍ଷରେ ବିଧାୟକଙ୍କ ଉପରେ ଅସନ୍ତୁଷ୍ଟ କର୍ମୀମାନେ ଏବେ ପୂର୍ବତନ କାଜୁ ନିଗମ ଅଧ୍ୟକ୍ଷ ଅମରେନ୍ଦ୍ର ଦାସଙ୍କ ଶିବିରରେ ପହଞ୍ଚୁଥିବା ଦେଖିବାକୁ ମିଳୁଛି । ଯାହାକୁ ନେଇ ପ୍ରଶାନ୍ତଙ୍କ ପାଇଁ ଅଡ଼ୁଆ ବଢିଛି । ବିଜେଡିର ଯୁବନେତା ଦୀପ୍ତି ରଞ୍ଜନ ନନ୍ଦଙ୍କୁ ମନାଇବା ପାଇଁ ଜିଲ୍ଲା ପରିଷଦ ଅଧ୍ୟକ୍ଷ ମନୋଜ ଭୋଇ ଓ ଜଗତସିଂହପୁର ବ୍ଲକ ଉପାଧ୍ୟକ୍ଷ ରତି ରଞ୍ଜନଙ୍କୁ ଦାୟିତ୍ୱ ଦିଆଯାଇଥିବା ଚର୍ଚ୍ଚା ହେଉଛି।

ଇଟିଭି ଭାରତ, ଜଗତସିଂହପୁର