ଜଗତସିଂହପୁର: ଜିଲ୍ଲାର ପ୍ରମୁଖ ଶିକ୍ଷା ଅନୁଷ୍ଠାନ ସ୍ୱାମୀ ବିବେକାନନ୍ଦ ସ୍ୱୟଂ ଶାସିତ ମହାବିଦ୍ୟାଳୟର ଅବସ୍ଥା ବିପର୍ଯ୍ୟସ୍ତ ହୋଇପଡିଛି । ଜିଲ୍ଲା ପ୍ରଶାସନ ପକ୍ଷରୁ ଉକ୍ତ ମହାବିଦ୍ୟାଳୟକୁ ନିର୍ବାଚନରେ ବ୍ୟବହାର କରାଯାଇଥିଲା । ଏଠାରେ ଷ୍ଟ୍ରଙ୍ଗରୁମ କରାଯାଇ ଇଭିଏମ ମେସିନ ସୁରକ୍ଷିତ ରଖାଯିବା ସହିତ ସୁରକ୍ଷାକର୍ମୀ ମାନଙ୍କୁ ରଖାଯାଇଥିଲା । କିନ୍ତୁ ନିର୍ବାଚନର 3 ମାସ ପରେ ବି ପ୍ରଶାସନ କଲେଜ ପରିସରରୁ ଆବର୍ଜନା ଉଠାଇବା, ସହ କୌଣସି କ୍ଷେତ୍ରରେ ମରାମତି କରିନାହିଁ ।
ଜିଲ୍ଲା ପ୍ରଶାସନ ତରଫରୁ ମହାବିଦ୍ୟାଳୟର ଝରକା ଗୁଡ଼ିକୁ ଇଟାରେ ବନ୍ଦ କରାଯିବ ସହିତ ବିଭିନ୍ନ ସ୍ଥାନରେ ଖୋଳି ଦିଆଯାଇଛି, ଫଳରେ 7 ଦିନ ହେବ କଲେଜ ଖୋଲିଥିଲେ ମଧ୍ୟ ପାଠପଢ଼ା ହୋଇପାରୁନାହିଁ । ନିର୍ବାଚନ ପାଇଁ ଜିଲ୍ଲା ପ୍ରଶାସନ ସ୍ବତନ୍ତ୍ର ବିଦ୍ୟୁତ ସଂଯୋଗ ନକରି କଲେଜର ବିଜୁଳି ବ୍ୟବହାର କରିଥିବାରୁ ଚଳିତ ମାସରେ 55 ହଜାର ଟଙ୍କା ରୁ ଅଧିକ ବିଲ ଆସିଥିବା କଲେଜ କର୍ତ୍ତୃପକ୍ଷ କହିଛନ୍ତି ।
କଲେଜ ରୁମରୁ 10 ଟି ଫ୍ୟାନ କାଢ଼ି ନିଆଯାଇଥିବା ବେଳେ 500 ରୁ ଅଧିକ ଟେବୁଲ ଡେସ୍କକୁ ଉପର ମହଲାରୁ ତଳକୁ ଫିଙ୍ଗି ଦିଆଯାଇ ନଷ୍ଟ କରିଦିଆଯାଇଛି । ଏସମ୍ପର୍କରେ ଆମେ ତତ୍କାଳୀନ ଜିଲ୍ଲାପାଳ ଗୁହା ପୁନମ ତାପସ କୁମାରଙ୍କ ସହିତ ଯୋଗାଯୋଗ କରିଥିଲୁ ,କିନ୍ତୁ ସେ କିଛି କହିବାକୁ ମନା କରିଦେଇଛନ୍ତି । ମୋଟାମୋଟି ଭାବେ ଇଲେକ୍ସନକୁ ନେଇ ଜିଲ୍ଲା ପ୍ରଶାସନ ଜିଲ୍ଲାର ପ୍ରମୁଖ ଅଗ୍ରଣୀ ଶିକ୍ଷାନୁଷ୍ଠାନକୁ ନଷ୍ଟ କରିବା ଓ ଏହା ଫଳରେ ଶିକ୍ଷା ଦାନ ପ୍ରଭାବିତ ହେବାକୁ ନେଇ ଅସନ୍ତୋଷ ଦେଖା ଦେଇଛି।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
