ଜଗତସିଂହପୁର: ସରିଲା ଶାରଦୀୟ ଦୁର୍ଗା ପୂଜା । ଆଉ ଏବେ ଜଗତସିଂହପୁର ସହରରେ ଜମିଛି କୁଢ କୁଢ ପଲିଥିନ ଓ ପ୍ଲାଷ୍ଟିକ । ଦୂର୍ଗନ୍ଧରେ ଫାଟି ପଡୁଛି ପୂରା ପରିବେଶ ।
ଜିଲ୍ଲାପାଳଙ୍କ କାର୍ଯ୍ୟାଳୟ ପରିସର, ବସଷ୍ଟାଣ୍ଡ, ନେହୁର ମାର୍କେଟ, ଗାନ୍ଧୀଛକ, ଗୋପାଳ ସାଗର ଆଦି ସ୍ଥାନରେ ବ୍ୟାପକ ଭାବରେ ଆବର୍ଜନା ଜମା ହୋଇରହିଛି ।
ଅକ୍ଟୋବର 2 ତାରିଖରୁ ପଲିଥିନି ବ୍ୟବହାର ଉପରେ କଟକଣା ଜାରି କରାଯାଇଥିଲେ ହେଁ ବହୁଳ ପରିମାଣରେ ପ୍ଲାଷ୍ଟିକ ଓ ପଲିଥିନ ବ୍ୟାଗ ବ୍ୟବହାର କରାଯାଇ ରାସ୍ତା କଡରେ ଫିଙ୍ଗି ଦିଆଯାଉଥିବା ଦେଖିବାକୁ ମିଳିଛି । ପୌରସଂସ୍ଥା ପକ୍ଷରୁ ବିଶେଷ ଭାବରେ ସଫେଇ କରାଯାଉ ନଥିବାରୁ କୁଢ଼ କୁଢ଼ ଆବର୍ଜନା ପଡିରହିବା ସହ ଦୁର୍ଗନ୍ଧରେ ନାକ ଫାଟି ପଡୁଛି । ଫଳରେ ପରିବେଶ ପ୍ରଦୂଷିତ ହେବାସହ ଲୋକମାନେ ଯିବା ଆସିବାରେ ଅସୁବିଧାର ସମ୍ମଖୀନ ହେଉଛନ୍ତି ।
ଖୋଦ ଜିଲ୍ଲାପାଳଙ୍କ କାର୍ଯ୍ୟାଳୟ ପଡିଆ ମଧ୍ୟ ଏଥିରୁ ବାଦ ପଡିନି । ରାବଣ ପୋଡି ଉତ୍ସବରେ ଅବ୍ୟବହୃତ ବର୍ଜ୍ୟବସ୍ତୁ ଏବେବି ପଡି ରହିଛି । ତେବେ ଦେଖିବାକୁ ବାକି ରହିଲା କେବେ ପୌରପାଳିକାର ନଜର ପଡୁଛି ଓ କେବେ ଆବର୍ଜନା ସଫା ହେଉଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
