ଜଗତସିଂହପୁର: ଜିଲ୍ଲାର ତିର୍ତ୍ତୋଲ ଥାନା ଅନ୍ତର୍ଗତ ସାଇଲୋ ପଞ୍ଚାୟତ ବାଲିସାହି ଗ୍ରାମରେ ପୋଲିସକୁ ମାଡ ମାରିବା ଘଟଣା । ତିର୍ତ୍ତୋଲ ଥାନା ପୋଲିସ ଶୁକ୍ରବାର ଅଭିଯୁକ୍ତ ରମେଶ ବରାଳକୁ ଗିରଫ କରିଛି । ଅଭିଯୁକ୍ତ ନାମରେ ପୂର୍ବରୁ ଏକାଧିକ ଥାନାରେ ମାମଲା ଥିବା ସୂଚନା ମିଳିଛି ।
ଗତକାଲି(ଗୁରୁବାର) ଏକ ଚୋରି ଘଟଣାରେ ତିର୍ତ୍ତୋଲ ଥାନାର ଜଣେ ମହିଳା SIଙ୍କ ସମେତ 2 ପୋଲିସ କର୍ମଚାରୀ ତଦନ୍ତ ପାଇଁ ସନ୍ଧାନୀ କୁକୁର ସହ ସାଇଲୋ ଗ୍ରାମରେ ପହଞ୍ଚିଥିଲେ। ସନ୍ଧାନୀ କୁକୁର ସେହି ଗ୍ରାମର ରମେଶ ବରାଳ ନାମକ ଯୁବକଙ୍କ ଘରକୁ ଇସାରା ଦେଇଥିଲା । ପୂର୍ବରୁ ରମେଶ ନାମରେ 5ଟି ଚୋରି ମାମଲା ରହିଥିବାରୁ ପୋଲିସର ସନ୍ଦେହ ବଢିଯାଇଥିଲା । ପୋଲିସ ରମେଶର ଦ୍ବାରରେ ଡାକିବା ସମୟରେ ଅଭିଯୁକ୍ତ ରମେଶ ଗାଁ ଦାଣ୍ଡରେ ପୋଲିସ କର୍ମଚାରୀଙ୍କୁ ଗୋଡ଼ାଇ ଗୋଡ଼ାଇ ନିର୍ଘାତ ମାଡ଼ ମାରିଥିଲା ।
ଏଥିରେ ହାବିଲଦାର ସ୍ମୃତି ରଞ୍ଜନ ମହାପାତ୍ର ଗୁରୁତର ଆହତ ହୋଇଥିଲେ । ପୋଲିସକୁ ମାଡ଼ ମାରିବା ପରେ ଅଭିଯୁକ୍ତ ଫେରାର ହୋଇଯାଇଥିଲା । ଶୁକ୍ରବାର ତିର୍ତ୍ତୋଲ ଥାନା ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତ ରମେଶକୁ ଗିରଫ କରିଛି । ଅଭିଯୁକ୍ତ ପୂର୍ବରୁ ଚୋରି, ଡକାୟତି, ରାହାଜାନୀ ପ୍ରଭୁତି ମାମଲାରେ ସଂଶ୍ଲିଷ୍ଟ ଥିବା ପୋଲିସ କହିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
