ବ୍ରହ୍ମପୁର: ମାତ୍ର ଅଧା ଇଞ୍ଚ ଉଚ୍ଚତା ବିଶିଷ୍ଟ ମା’ ଦୁର୍ଗାଙ୍କର କ୍ଷୁଦ୍ରତମ ପ୍ରତିମା ପ୍ରସ୍ତୁତ କରି ୱାର୍ଲଡ ରେକର୍ଡରେ ସ୍ଥାନ ପାଇଛନ୍ତି ବ୍ରହ୍ମପୁରର ଯୁବଶିଳ୍ପୀ ଦିଲୀପ । ସହରର ଯୁବ କ୍ଷୁଦ୍ରକାଷ୍ଟ ଶିଳ୍ପୀ ଦିଲୀପ ମହାରଣାଙ୍କ ଦ୍ବାରା ପ୍ରସ୍ତୁତ କରାଯାଇଥିବା ମା’ଦୁର୍ଗାଙ୍କ କ୍ଷୁଦ୍ରତମ ପ୍ରତିମୂର୍ତ୍ତି ବିଶ୍ବ ରେକର୍ଡରେ ସ୍ଥାନ ପାଇଛି । ନିଜର କଳା ମାଧ୍ୟମରେ ପୁଣି ଥରେ ବ୍ରହ୍ମପୁର ସମେତ ସାରା ରାଜ୍ୟକୁ ଗୌରବାନ୍ବିତ କରିଛନ୍ତି ଦିଲ୍ଲୀପ ।
ମାତ୍ର 18 ବର୍ଷ ବୟସ୍କ ଦିଲ୍ଲୀପ ନିଜର କଳାକୃତି ପାଇଁ ବର୍ତ୍ତମାନ ସୁଧା ୩ଟି ଇଣ୍ଡିଆ ବୁକ ଅଫ ରେକର୍ଡ୍ସ , ୨ଟି ଏସିଆ ବୁକ ଅଫ ରେକର୍ଡ୍ସରେ ପୂର୍ବରୁ ସ୍ଥାନ ପାଇ ସାରିଥିବାବେଳେ ବର୍ତ୍ତମାନ ନିଜକୁ ବିଶ୍ୱ ରେକର୍ଡ୍ସରେ ସ୍ଥାନିତ ହେବାର ଗୌରବ ହାସଲ କରିଛି । ଦଶହରା ସମୟରେ ଦିଲ୍ଲୀପ ମା’ଙ୍କର ଏହି କ୍ଷୁଦ୍ର ପ୍ରତିମା ନିର୍ମାଣ କରିଥିଲେ । ଏହି ମୂର୍ତ୍ତିର ଆକାର ମାତ୍ର ଅଧା ଇଞ୍ଚ ବିଶିଷ୍ଠ କାଠରେ ପ୍ରସ୍ତୁତ ହୋଇଛି । ମା’ ଦୁର୍ଗାଙ୍କ ଅବିକଳ ଏହି ମୂର୍ତ୍ତିକୁ ସମ୍ପୁର୍ଣ୍ଣ ଗମ୍ଭାରୀ କାଠରେ ପ୍ରସ୍ତୁତ କରିବା ସହ ମା’ ଦଶଭୁଜାଙ୍କୁ ଅସ୍ତ୍ରଶସ୍ତ୍ରରେ ସୁସଜିତ କରିଛନ୍ତି ଦିଲ୍ଲୀପ ।
ସେହିପରି ନିଜ ବାହନ ସିଂହ ଉପରେ ବିରାଜମାନ କରି ମା’ ଦୁର୍ଗା ତ୍ରୀଶୂଳରେ ମହିଷାସୁରକୁ ବଦ୍ଧ କରିଥିବା ଏହି କ୍ଷୁଦ୍ର ପ୍ରତିମାକୁ ଦେଖିଲେ ଏକ ବିସ୍ମୟ ଭଳି ଅନୁଭବ ହେଉଛି । ଦିଲ୍ଲୀପଙ୍କ ଏଭଳି ଏକ ସଫଳତା ପାଇଁ ବାପା ଭଗବାନ ମହାରଣା ଏବଂ ମା ଝୁନୁ ମହାରଣାଙ୍କ ସମେତ ପରିବାର ବର୍ଗ ବେଶ ଖୁସି । ସେହିପରି ଏପରି ସଫଳତା ପରେ ସ୍ଥାନୀୟ ଅଞ୍ଚଳରୁ ମଧ୍ୟ ଦିଲ୍ଲୀପଙ୍କୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
