ବ୍ରହ୍ମପୁର: ବିପଦରେ ବନ୍ୟଜନ୍ତୁଙ୍କ ଜୀବନ । ଦିନକୁ ଦିନ ମଣିଷର ମନୋରଞ୍ଜନ ପାଇଁ ବ୍ୟବହାର ହୋଇ ଅସୁରକ୍ଷିତ ହେବାରେ ଲାଗିଛନ୍ତି ଏହି ବନ୍ୟଜନ୍ତୁ । ଗଞ୍ଜାମ ଜିଲ୍ଲାରେ ଦୋଳ ପୂର୍ଣ୍ଣିମା ଓ ହୋଲି ଅବସରରେ ଦେଖିବାକୁ ମିଳିଛି ଏହାର ଏକ ନଜିର । ବିଭିନ୍ନ ସ୍ଥାନରେ ଆୟୋଜିତ ହୋଇଥିବା ଯାତ୍ରା ସମୟରେ ଦେଖିବାକୁ ମିଳିଥିଲା ବିଷଧର ସାପ ସହ ବିପଦପୂର୍ଣ୍ଣ ଷ୍ଟଣ୍ଟର ଦୃଶ୍ୟ । ଯାହା ଏବେ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ଯାତ୍ରା ପାର୍ଟିରେ ଏହି ବନ୍ୟଜନ୍ତୁ କେଉଁଠୁ ଆସିଲା ତାହାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିବାବେଳେ ବନବିଭାଗ ଏନେଇ ଇଟିଭି ଭାରତ ଦ୍ବାରା ଅବଗତ ହୋଇଥିବା ଜଣାପଡିଛି ।
ସେପଟେ ବିଷଧର ସାପକୁ ନେଇ ରଖିବା ଏବଂ ସର୍ବସମ୍ମୁଖରେ ଏହାକୁ ନେଇ ବିପଦପୂର୍ଣ୍ଣ ଷ୍ଟଣ୍ଟ ପ୍ରଦର୍ଶନ କରିବା, ବନ୍ୟଜନ୍ତୁ ସଂରକ୍ଷଣ ଆଇନ-1972ର ଖୋଲାଖୋଲି ଉଲ୍ଲଙ୍ଘନ ବୋଲି ଅଭିଯୋଗ ହୋଇଛି ।
କିନ୍ତୁ ଜିଲ୍ଲାରେ କଳାକାରମାନେ ବନ୍ୟଜନ୍ତୁଙ୍କ ସହ ଖେଳି ଟଙ୍କା ଆଦାୟ କରୁଥିବାବେଳେ ବନ ବିଭାଗର ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ଅନ୍ୟପଟେ ଯାତ୍ରା ଜରିଆରେ ଏହାକୁ ଦର୍ଶକମାନେ ଦେଖି ମନୋରଞ୍ଜନ କରୁଛନ୍ତି କିନ୍ତୁ ଉପସ୍ଥିତ ଦର୍ଶକମାନଙ୍କ ଜୀବନ ପ୍ରତି ଏହା ବିପଦ ସୃଷ୍ଟି କରୁଛି । ବାରମ୍ବାର ଜିଲ୍ଲାରେ ସମାନ ଘଟଣା ଘଟୁଥିବା ବେଳେ ସମ୍ପୃକ୍ତ ବିଭାଗ ସେପରି ଆଖି ଦୃଶିଆ ପଦକ୍ଷେପ ଗ୍ରହଣ କରିନାହିଁ ।
ଏନେଇ ଇଟିଭି ଭାରତ ଟିମ୍ ଦ୍ବାରା ଖବର ପାଇବା ପରେ ଆଗାମୀ ଦିନରେ ଏଭଳି ଘଟଣାର ପୁନରାବୃତ୍ତି ନହେବା ପାଇଁ ନୋଟିସ ଦିଆଯିବ ବୋଲି ପ୍ରତିକ୍ରିୟାରେ କହିଛନ୍ତି ବ୍ରହ୍ମପୁର ରେଞ୍ଜର ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
