ବ୍ରହ୍ମପୁର: ବୁର୍ଲା ଭୀମସାର ମେଡିକାଲ କଲେଜ ଛାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କଲେ ଏମକେସିଜି ମେଡ଼ିକାଲ ଛାତ୍ର । ଇଣ୍ଟର ମେଡି-ଫେଷ୍ଟରେ ଅଂଶ ଗ୍ରହଣ କରିବାକୁ ଯାଇଥିବା ବ୍ରହ୍ମପୁର ଏମକେସିଜି ମେଡ଼ିକାଲ ଛାତ୍ରଛାତ୍ରୀଙ୍କ ଉପରେ ଆକ୍ରମଣ ପରେ କଲେଜ ବିରୋଧରେ ଅଶାଳୀନ ମନ୍ତବ୍ୟ ଦିଆଯାଇଥିବା ଅଭିଯୋଗ ହୋଇଛି । ଏହି ଘଟଣାକୁ ନେଇ ପ୍ରଥମ ଥର ପାଇଁ ଏମକେସିଜି ଛାତ୍ର ମୁହଁ ଖୋଲିଥିବା ବେଳେ ଆକ୍ରମଣ ଘଟାଇଥିବା ଛାତ୍ରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ।
ଗତ ଜୁଲାଇ ୪ ତାରିଖରେ ବୁର୍ଲା ସ୍ଥିତ ଭୀମସାର ମେଡ଼ିକାଲ କଲେଜରେ ଆୟୋଜିତ କାର୍ଯ୍ୟକ୍ରମ ଇଣ୍ଟର ମେଡି-ଫେଷ୍ଟରେ ଅଂଶ ଗ୍ରହଣ କରିବାକୁ ବ୍ରହ୍ମପୁର ଏମକେସିିଜି ମେଡ଼ିକାଲର ପ୍ରାୟ ୬୫ ଜଣ ବିଦ୍ୟାର୍ଥୀ ଯାଇଥିଲେ । ସକାଳ ସମୟରେ ସେଠାରେ ପହଞ୍ଚିବା ପରେ ଷ୍ଟେସନରେ ପ୍ରାୟ ଦୁଇ ଘଣ୍ଟା ଧରି ଅପେକ୍ଷା କରିବା ପରେ ବୁର୍ଲା ମେଡିକାଲ କଲେଜରେ ପହଞ୍ଚିଥିଲେ । କୌଣସି ଏକ ଘଟଣାକୁ ନେଇ ଉଭୟ କଲେଜର ଛାତ୍ରଛାତ୍ରୀଙ୍କ ମଧ୍ୟରେ ପାଟିତୁଣ୍ଡ ହେବା ପରେ ଘଟଣାସ୍ଥଳରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ଭୀମସାର ଛାତ୍ରଙ୍କ ଆକ୍ରମଣରେ ଏମକେସିଜିର ୬ ଜଣ ଛାତ୍ର ଆହତ ହୋଇଥିଲେ । ଏହାପରେ ଏମକେସିଜି ମେଡିକାଲର ଆଥଲେଟିକ୍ ଟିମ୍ ଫେରି ଆସିଥିଲେ । ଏହି ଛାତ୍ର ସଂଘର୍ଷ ପରେ ଭୀମସାର ନିର୍ଦ୍ଦେଶକ, ଡିନ ଏବଂ ଅନ୍ୟ ପ୍ରମୁଖ ବିଭାଗୀୟ ଅଧିକାରୀଙ୍କୁ ନେଇ ଏକ ଗୁରୁତ୍ବପୂର୍ଣ୍ଣ ବୈଠକ ବସିଥିଲା । ଏହାପରେ ଏମକେସିଜି ମେଡିକାଲର ଅଧ୍ୟକ୍ଷ ମଧ୍ୟ ଭୀମସାର ମେଡିକାଲର ଅଧ୍ୟକ୍ଷ ଓ ନିର୍ଦ୍ଦେଶକଙ୍କ ସହିତ ଆଲୋଚନା କରିଥିଲେ । ମାତ୍ର ଏ ଘଟଣାରେ ସମ୍ପୃକ୍ତ ଥିବା ଛାତ୍ରଙ୍କ ବିରୋଧରେ ଏପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଏମକେସିଜି ବିଦ୍ୟାର୍ଥୀ ଅଭିଯୋଗ କରିଛନ୍ତି ।
