ଗଞ୍ଜାମ:ପୂର୍ବ ଶତୃତାକୁ କେନ୍ଦ୍ର କରି ହତ୍ୟା ଉଦ୍ୟମ ହୋଇଥିବା ଏକ ଘଟଣା ସାମ୍ନାକୁ ଆସିଛି । ଗଞ୍ଜାମ ଜିଲ୍ଲା ଗାଙ୍ଗପୁର ଥାନା ଅନ୍ତର୍ଗତ ପଣିବନ୍ଧ ଗ୍ରାମରେ ପୁର୍ବ ଶତ୍ରୁତାକୁ କେନ୍ଦ୍ରକରି ଟୁକୁନା ସ୍ବାଇଁ ନାମକ ଯୁବକଙ୍କ ଗ୍ରିଲରେ ବିଦ୍ୟୁତ୍ ତାର କାଟି ସଂଯୋଗ କରାଯାଇ ହତ୍ୟା ଉଦ୍ୟମ କରାଯାଇଥିବା ଅଭିଯୋଗ ହୋଇଛି ।
ଗତ ଗୁରୁବାର ରାତିରେ କେହି ଟୁକୁନାଙ୍କୁ ହତ୍ୟା ଉଦ୍ୟମ କରି ତାଙ୍କ ଘର ଗ୍ରିଲରେ ବିଦ୍ୟୁତ୍ ତାର କାଟି ସଂଯୋଗ କରିଥିବା ବେଳେ ଶୁକ୍ରବାର ସକାଳେ ଟୁକୁନା ଘରକୁ ତାଲା ଖୋଲିବା ସମୟରେ ବିଦ୍ୟୁତ ସଂସ୍ପର୍ଶରେ ଆସି ଛିଟିକି ପଡ଼ିଥିଲେ । ଏହାପରେ ଟୁକୁନା ଏହା ଦେଖିବା ପରେ ସଙ୍ଗେ ସଙ୍ଗେ ବିଦ୍ୟୁତ୍ ବିଭାଗକୁ ଫୋନ୍ କରିଥିଲେ । ତୁରନ୍ତ ବିଦ୍ୟୁତ୍ ବିଭାଗ କର୍ମଚାରୀ ଆସି ପୋଲରୁ ବିଦ୍ୟୁତ ସଂଯୋଗ ବିଛିନ୍ନ କରିଥିଲେ । ତେବେ ଏହି ଘଟଣା ଜଣାପଡିବା ପରେ ଟୁକୁନାଙ୍କ ଘରେ ଗ୍ରାମବାସୀ ରୁଣ୍ଡ ହୋଇ ଯାଇଥିଲେ ।
ତେବେ ଏନେଇ ଟୁକୁନା କହିଛନ୍ତି, ତାଙ୍କ ବାପା କାମରାଜ ସ୍ବାଇଁ ଝାଡ଼ବନ୍ଧ ପଞ୍ଚାୟତର ନ୍ୟାୟ ସରପଞ୍ଚ ଥିବାବେଳେ ରାଜନୈତିକ ଶତ୍ରୁତା କାରଣରୁ ପୂର୍ବରୁ ମଧ୍ୟ କେହି ଦୋକାନ କ୍ୟାବିନ ପୋଡିବା ସହ ଗୋରୁ ହଳକୁ ଚୋରି କରି ନେଇଯାଇଛନ୍ତି । ଏପଟେ ଭାଗ୍ୟବଶତଃ ଟୁକୁନା ଚପଲ ପିନ୍ଧିଥିବାରୁ ସେ ମୃତ୍ୟୁମୁଖରୁ ବଞ୍ଚିଯାଇଥିବା ନେଇ ବିଦ୍ୟୁତ୍ ବିଭାଗ କର୍ମଚାରୀ କହିଛନ୍ତି ।
ଏପଟେ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
