ବ୍ରହ୍ମପୁର: ବିଶ୍ବର ଅଧିକାଂଶ ଦେଶରେ ଦ୍ବିତୀୟ ଏବଂ ତୃତୀୟ କୋଭିଡ୍ ସଂକ୍ରମଣ ପ୍ରବାହ ଆରମ୍ଭ ହୋଇଯାଇଛି । ଯାହାକି ଭିନ୍ନ ଧରଣର ପ୍ରବାହ ଏବଂ ଏହି ପ୍ରବାହ ସଂକ୍ରମିତ ହେଲେ ଜୀବନ ପ୍ରତି ବିପଦ ଦେଖା ଦେଉଛି । ଯଦି ଏହି ପ୍ରବାହ ଗଞ୍ଜାମ ଜିଲ୍ଲାରେ ଆରମ୍ଭ ହୁଏ ତେବେ ତାହାକୁ ସମ୍ଭାଳିବା କଷ୍ଟକର ହୋଇପଡିବ । ବର୍ତ୍ତମାନ ଉନ୍ନୟନ କାର୍ଯ୍ୟ କରିବାର ସମୟ ଆସୁଛି । ଏହି ସମୟରେ ଯଦି ଦ୍ବିତୀୟ ପ୍ରବାହ ଯୋଗୁଁ ସଂକ୍ରମିତଙ୍କ ସଂଖ୍ୟା ବଢେ ତେବେ ଏହାକୁ ପରିଚାଳନା କରିବା ଦିଗରେ ପୁଣି ସମସ୍ତ ପ୍ରଶାସନିକ ଶକ୍ତି ବିନିଯୋଗ ହେବ । ଉନ୍ନୟନ କାର୍ଯ୍ୟରେ ବାଧା ଉପୁଜିବ । ଏଣୁ ପ୍ରବାହକୁ ରୋକିବା ଦିଗରେ ସତର୍କତା ହିଁ ମୁଖ୍ୟ ଆୟୁଧ ।
ଗଞାମ ଜିଲ୍ଲାବାସୀଙ୍କୁ ସତର୍କତା ଏବଂ ସଚେତନତା ସୃଷ୍ଟି କରିବା ନେଇ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ସମସ୍ତ ବ୍ଲକ୍ ସ୍ତରୀୟ ଅଧିକାରୀ ଓ ଜିଲ୍ଲା ସ୍ତରୀୟ ଅଧିକାରୀଙ୍କ ସହ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଛନ୍ତି । ଯେଉଁ ମାନଙ୍କ ଦେହରେ ଆଣ୍ଟିବଡି ସୃଷ୍ଟି ହୋଇଛି ସେମାନେ ମଧ୍ୟ ଏହି ନୂତନ ଭାଇରସ୍ ଦ୍ବାରା ସଂକ୍ରମିତ ହେବାର ସମ୍ଭାବନା ରହିଛି । ସଂକ୍ରମଣରୁ ରକ୍ଷା ପାଇବା ପାଇଁ ଯେ ପର୍ଯ୍ୟନ୍ତ ଟୀକା କିମ୍ବା ଔଷଧ ସାଧାରଣ ଲୋକଙ୍କ ନିକଟରେ ପହଞ୍ଚିନାହିଁ । ସେ ପର୍ଯ୍ୟନ୍ତ ପ୍ରଥମେ ସଚେତନତା କରାଯିବ ଏବଂ ଦ୍ବିତୀୟରେ ଚଢାଉ କାର୍ଯ୍ୟ ଜାରି ରଖିବାକୁ ନିର୍ଦ୍ଦେଶ ଦିଆଯାଇଛି । ସାମାଜିକ ଦୂରତ୍ବ, ମାସ୍କ ପରିଧାନ, ହାତ ଧୋଇବା ସାନିଟାଇଜର୍ ବ୍ୟବହାର କରିବା ଅଭ୍ୟାସ ଦ୍ବାରା ହିଁ ଜିଲ୍ଲାବାସୀ ସଂକ୍ରମଣରୁ ବର୍ତ୍ତି ପାରିଛନ୍ତି । ଏହି ଅଭ୍ୟାସ ଜାରି ରଖିବାକୁ ହେବ, ସେଥି ସକାଶେ ସତର୍କ କରାଇବାକୁ ସମସ୍ତ ଅଧିକାରୀଙ୍କୁ ଜିଲ୍ଲାପାଳ ଜଣାଇଛନ୍ତି । ପଞ୍ଚସୂତ୍ରୀ ବିରକ୍ତିକର ଲାଗୁଛି କିନ୍ତୁ ତାହାଦ୍ବାରା ଜନ ଜୀବନ ବିପଦମୁକ୍ତ ହେଉଛି । ଟେଷ୍ଟିଂ ସଂଖ୍ୟା ବୃଦ୍ଧି, ସୁପର ସ୍ପ୍ରେଡର୍ ଚିହ୍ନଟ, ସଂକ୍ରମିତ ବ୍ୟକ୍ତିଙ୍କ କଣ୍ଟ୍ରାକ୍ଟ ଟ୍ରେସିଂ, ଗ୍ରାମ ପଞ୍ଚାୟତ ସ୍ତରରେ ବାହାରୁ ଆସୁଥିବା ବ୍ୟକ୍ତିଙ୍କ ତଥ୍ୟ ସଂଗ୍ରହ, ବଡ ଦୋକାନ କିମ୍ବା ମଲ୍ ଗୁଡିକରେ ଅକ୍ସି ମିଟର ଓ ଥର୍ମାଲ୍ ସ୍କ୍ରିନିଂ ସୁନିଶ୍ଚିତ କରିବା, କୋଭିଡ୍ ମନିଟର୍ ଓ କୋଭିଡ୍ ସଖୀ ପ୍ରଶିକ୍ଷଣ ଏବଂ ସେମାନଙ୍କୁ କାର୍ଯ୍ୟରେ ନିୟୋଜିତ କରିବା ଇତ୍ୟାଦି ସମସ୍ତ ବିଷୟକୁ ପାଳନ ଦିଗରେ ଜିଲ୍ଲାପାଳ କଡା ନିର୍ଦ୍ଦେଶ ଦେଇଛନ୍ତି । ଡିସେମ୍ବର ପହିଲା ପର୍ଯ୍ୟନ୍ତ ମନ୍ଦିର ଗୁଡିକ ଖୋଲାଯିବ ନାହିଁ ।
ସେହିପରି ବର୍ତ୍ତମାନ ପିକନିକ୍ ବା ବଣଭୋଜି ସମୟ ଏଣୁ ପିକନିକ୍ ସ୍ଥାନ ଗୁଡିକରେ ଗହଳିପୂର୍ଣ୍ଣ ବଣଭୋଜି, ମ୍ୟୁଜିକ୍ କୁ ଜିଲ୍ଲା ପ୍ରଶାସନ ଦ୍ବାରା ବାରଣ କରାଯାଇଛି । ପିକନିକ୍ ସ୍ଥାନକୁ ସ୍ବଳ୍ପ ଲୋକଯାଇ ସେଠାକାର ସୌନ୍ଦର୍ଯ୍ୟ ଉପଭୋଗ କରିପାରିବେ । ଏହି କାର୍ଯ୍ୟରେ ତହସିଲଦାରମାନେ ତଦାରଖ କରିବାକୁ ନିର୍ଦ୍ଦେଶ ଦିଆଯାଇଛି । ଗୋଟିଏ ଫୋନ୍ ନମ୍ବର ଜାରି କରାଯିବ ଯଦି ପିକନିକ୍ ସ୍ପଟରେ ଗହଳିପୂର୍ଣ୍ଣ ବାତାବରଣ ଦେଖାଯାଉଛି, କୋଭିଡ୍ ନିୟମର ପାଳନ ହେଉ ନାହିଁ ତେବେ ଜନ ସାଧାରଣ ଉକ୍ତ ନମ୍ବରକୁ ଫୋନ୍ କରି ଜଣାଇପାରିବେ । ସରକାରୀ ଅଧିକାରୀଗଣ ୫୦ ପ୍ରତିଶତ ସମୟ କାର୍ଯ୍ୟାଳୟରେ ରହି ୫୦ ପ୍ରତିଶତ ସମୟ ଉନ୍ନୟନମୂଳକ କାର୍ଯ୍ୟ ତଦାରଖ କରିବା ସକାଶେ ଫିଲ୍ଡ ଭିଜିଟ୍ କରିବାକୁ କୁହାଯାଇଛି । ଉନ୍ନୟନମୂଳକ କାର୍ଯ୍ୟ କରାଯାଇ ତାହାର ଉପଯୋଗ ଯେପରି ଶତପ୍ରତିଶତ ହେବ ତାହାକୁ ନେଇ ପରିଚାଳନା କରିବାକୁ ଜିଲ୍ଲାପାଳ ଜଣାଇଛନ୍ତି । ସେହିପରି ଜିଲ୍ଲାରେ ଥିବା ୨୪ ଗୋଟି ଆହାର କେନ୍ଦ୍ର ଆରମ୍ଭ କରାଯାଇଛି । ଆହାର କେନ୍ଦ୍ର ନିକଟରେ ଜଣେ ସ୍ବାସ୍ଥ୍ୟ କର୍ମୀ ମୁତୟନ କରି ତଥ୍ୟ ସଂଗ୍ରହ ନିମନ୍ତେ ରେଜିଷ୍ଟର୍, ଅକ୍ସି ମିଟର, ଥର୍ମାଲ୍ ସ୍କ୍ରିନିଂ ଯନ୍ତ୍ର ରଖିବାକୁ କୁହାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
