ବ୍ରହ୍ମପୁର:ଗଞ୍ଜାମ ଜିଲ୍ଲା କେ. ନୂଆଗାଁ ଥାନା ଅନ୍ତର୍ଗତ ରାଧାମୋହନପୁର ରାସ୍ତାରେ ସଡକ ଦୁର୍ଘଟଣା । ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଦୁଇଜଣ ଗୁରୁତର ଭାବରେ ଆହତ ହୋଇଛନ୍ତି ।
ସୂଚନାଅନୁଯାୟୀ, ପି.ନାରାୟଣ ନାୟକ ନାମକ ବ୍ୟକ୍ତି ନିଜ ଗାଁ ନିମ କୁଡିଆରୁ ଚିକିଟି ଅଭିମୁଖେ ବାଇକ(ନଂOD07Z9305) ଯୋଗେ ଯାଉଥିଲେ । ଚିକିଟିରୁ ବ୍ରହ୍ମପୁର ଅଭିମୁଖେ ଦ୍ରୁତ ଗତିରେ ଆସୁଥିବା ଗୋଟିଏ ଟ୍ରକ (ନଂ-OD07D3455 ) ମୋଟର ସାଇକେଲକୁ ଧକ୍କା ଦେଇଥିଲା । ଫଳରେ ମୋଟର ସାଇକେଲ ଚାଳକ ପି. ନାରାୟଣଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା ।
ଏପଟେ ଦୁର୍ଘଟଣାରେ ୫୦ ବର୍ଷୀୟ ପି.କାମରାଜୁ ଏବଂ ୧୩ ବର୍ଷୀୟ ପି.ଅଶାନ୍ତୁ ଗୁରୁତର ଭାବରେ ଆହତ ହୋଇଛନ୍ତି । ଆହତମାନଙ୍କୁ ବ୍ରହ୍ମପୁର ଏମ୍.କେ.ସେ.ଜି ମେଡିକାଲରେ ଭର୍ତ୍ତି କରାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ସହିତ ତଦନ୍ତ ଆରମ୍ଭ କରିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
