ବ୍ରହ୍ମପୁର: ଲଗାଣ ବର୍ଷା ଆରମ୍ଭ ହେବା ପୂର୍ବରୁ ଚିନ୍ତାରେ ବିପଦସଙ୍କୁଳ ଘରେ ରହିଥିବା ଅନେକ ପରିବାର । ବ୍ରହ୍ମପୁର ସହରର ବିଭିନ୍ନ ବସ୍ତିରେ ରହିଥିବା ବ୍ୟକ୍ତିବିଶେଷଙ୍କ ଠାରୁ ଆରମ୍ଭ କରି ପୁରୁଣା ଘରେ ରହୁଥିବା ବ୍ୟକ୍ତିବିଶେଷଙ୍କ ଲଗାଣ ବର୍ଷାର ନାଁ ଶୁଣିଲେ ମନରେ ଭୟ ସୃଷ୍ଟି ହେଉଛି ।
ଗୋଟିଏ ପଟେ ଗରିବୀ ସାଙ୍ଗକୁ ପକ୍କା ଘର ନଥିବା ଯୋଗୁଁ ଯେନତେନ ପ୍ରକାରେ ପରିବାର ପତିପୋଷଣ କରି ଆସୁଥିବା ପରିବାର ଏବେ ଚିନ୍ତାରେ । ପୂର୍ବରୁ ହୋଇଥିବା ଅନେକ ବର୍ଷା ଏବଂ ଲଘୁଚାପର ପ୍ରଭାବରେ ବ୍ରହ୍ମପୁର ସହର ସମେତ ଗଞ୍ଜାମ ଜିଲ୍ଲାରେ ରହିଥିବା ଏଭଳି ବିପଦସଙ୍କୁଳ ଗୃହ ଗୁଡିକ ପଡି ଅନେକଙ୍କ ଜୀବନ ଯାଇଥିବା ବେଳେ ଧନସମ୍ପତ୍ତି ନଷ୍ଟ ହୋଇଥିବା ଦେଖାଯାଇଛି । ସେପଟେ ପ୍ରଶାସନ ପକ୍ଷରୁ ଯୋଗାଇ ଦିଆଯାଉଥିବା ଆବାସ ଯୋଜନାର ଗୃହ ନିର୍ମାଣ ପ୍ରତି ଅନେକ ପରିବାର ନାପସନ୍ଦ କରିବା ସହିତ ସେମାନେ ରହୁଥିବା ସ୍ଥାନରେ ହିଁ ସ୍ଥାୟୀ ଗୃହ ଯୋଗାଇଦେଲେ ଅନେକ ସୁବିଧା ହୋଇପାରନ୍ତା ବୋଲି କୁହାଯାଇଛି ।
ଅନ୍ୟପଟେ ସହରରେ ଅନେକ ପୁରୁଣା କୋଠା ରହିଥିବା ବେଳେ ସେଥିମଧ୍ୟରୁ କେତେକ ସରକାରୀ କାର୍ଯ୍ୟାଳୟ କିମ୍ବା କ୍ବାର୍ଟର ହୋଇଥିଲେ ମଧ୍ୟ ସେଥିମଧ୍ୟରୁ କେଉଁଗୁଡିକ ବିପଦସଙ୍କୁଳ ଅବସ୍ଥାରେ ରହିଛି ତାହର ସ୍ଥିତି ମଧ୍ୟ ନିୟମିତ ବ୍ୟବଧାନରେ ଅନୁଧ୍ୟାନ କରାଯାଉନଥିବା କୁହାଯାଇଛି । ସେପଟେ ବ୍ରହ୍ମପୁର ମହାନଗର ନିଗମ ପକ୍ଷରୁ ବର୍ଷା ଦିନ ଆସିବା ପୂର୍ବରୁ ସହରର ୧୩ ଟି ସ୍ଥାନକୁ ଚିହ୍ନଟ କରାଯାଇ ସତର୍କତା ରଖାଯାଇଥିବା ମହାନଗର ନିଗମର କମିଶନର ସୂଚନାଦେଇଛନ୍ତି । ଅନ୍ୟପଟେ ଜିଲ୍ଲାପ୍ରଶାସନ ପକ୍ଷରୁ ଏ ନେଇ ସମସ୍ତ ପ୍ରକାର ସତର୍କ ରହିଥିବା କହିଛନ୍ତି ଜିଲ୍ଲାପାଳ ।
ଗତ କିଛି ବର୍ଷର ଜିଲ୍ଲାପ୍ରଶାସନର ରିପୋର୍ଟ ଅନୁଧ୍ୟାନ କଲେ ଜଣାପଡେ ଜିଲ୍ଲାରେ ବାତ୍ୟା ଓ ବନ୍ୟା ସହ ଲଗାଣ ବର୍ଷା ଯୋଗୁଁ ଅନେକ ଗୃହ ଭାଙ୍ଗିଥିବା ସହ ବହୁ ବ୍ୟକ୍ତିବିଶେଷ ଙ୍କ ଜୀବନ ଯାଇଛି। ବିଶେଷତଃ ୨୦୦୬ -୨୦୧୫ ମସିହା ମଧ୍ୟରେ ବନ୍ୟା ଯୋଗୁଁ ୩୭୦୯ ଘର ଭାଙ୍ଗିଥିବା ବେଳେ 16ଜଣଙ୍କ ମୃତ୍ୟୁ ହୋଇଥିଲା । ବାତ୍ୟା ଯୋଗୁଁ ପ୍ରାୟ ୩ଲକ୍ଷ ୮୯ ହଜାର ୩୨ ଗୋଟି ଘର ଭାଙ୍ଗିଥିବା ବେଳେ ଓ 17 ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି। ୨୦୧୮ରେ ବାତ୍ୟା ତିତିଲି ଯୋଗୁଁ ୨୪ହଜାର ୭୦ ଗୋଟି ଘର ଆଶିଂକ ଓ ସଂପୂର୍ଣ ଭାଙ୍ଗିବା ସହ ୧୧ ଜଣଙ୍କ ମୃତ୍ୟୁ ଘଟିଥିଲା ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
