ବ୍ରହ୍ମପୁର: ଆଗାମୀ ଜୁନ ୩୦ ଯାଏଁ ଗଞ୍ଜାମ ଜିଲ୍ଲାରେ ଲକଡାଉନ୍ ନିୟମକୁ କଡାକଡି କରାଯିବା ନେଇ ନିଷ୍ପତ୍ତି ନେଇଛି ଗଞ୍ଜାମ ଜିଲ୍ଲା ପ୍ରଶାସନ । ଏହାସହ ଦୈନିକ ୧୮ ଘଣ୍ଟିଆ ସଟଡାଉନ ମଧ୍ୟ କରାଯିବାକୁ ନିଷ୍ପତ୍ତି ନିଆଯାଇଥିବା ବେଳେ ପୋଲିସ ପ୍ରଶାସନ ପକ୍ଷରୁ ଏହାକୁ କଡାକଡି ଭାବରେ ପାଳନ କରାଯିବ ବୋଲି ସୂଚନା ଦେଇଛନ୍ତି ଗଞ୍ଜାମ ଆରକ୍ଷୀ ଅଧିକ୍ଷକ ।
ବର୍ତ୍ତମାନର ସମୟରେ ବହୁ ବ୍ୟକ୍ତି ସାମାଜିକ ଦୂରତାକୁ ମାନୁ ନଥିବାବେଳେ ମାସ୍କ ପରିଧାନ ଏବଂ ହାତ ଧୋଇବାର ସମସ୍ତ କାର୍ଯ୍ୟ ପାଳନ କରିବାକୁ ଜନସାଧାରଣଙ୍କୁ ପରାମର୍ଶ ଦେଇଛନ୍ତି ଗଞ୍ଜାମ ଆରକ୍ଷୀ ଅଧିକ୍ଷକ ବ୍ରିଜେଶ କୁମାର ରାୟ । ସେହିପରି ମୋଟର ସାଇକେଲର କୌଣସି ଆବଶ୍ୟକତା ନଥାଇ ଅନ୍ୟାବଶ୍ୟକ ବ୍ୟବହାର କରିବା ଉପରେ ନଜର ରଖାଯିବା ସହ କୋଭିଡ ଠାରୁ ସମସ୍ତଙ୍କୁ ଯେପରି ଦୂରେଇ ରଖାଯିବ ଏନେଇ ପଦକ୍ଷେପ ନିଆଯିବାକୁ କୁହାଯାଇଛି । ସେହିପରି ମାସ୍କ ପରିଧାନ ନକଲେ ଏଥିପାଇଁ ୫୦୦ ଶହ ଜୋରିମାନା ଗଣିବାକୁ ପଡିବ ।
ଗଞ୍ଜାମର ଦୁଇ ଜଣ ପୋଲିସ ଅଧିକାରୀ କୋରୋନା ପଜିଟିଭ ଚିହ୍ନଟ ହୋଇଥିବାବେଳେ ସରକାରଙ୍କ ଏସଓପି ଅନୁଯାୟୀ ସେମାନଙ୍କ କଣ୍ଟାକ୍ଟ ଟେସିଂ ଜାରି ରହିଛି । ତେବେ ଦିନକୁ ଦିନ ସଂକ୍ରମଣ ସଂଖ୍ୟା ବଢୁଥିବାରୁ ଲକଡାଉନ ନିୟମକୁ କଡାକଡି କରାଯିବ । ଏଥିପାଇଁ ଜିଲ୍ଲାରେ ମୋଟ ୫୨ ମୋବାଇଲ୍ ପାର୍ଟି ସହିତ ପୋଲିସ ଅଧିକାରୀଙ୍କୁ ନେଇ ଗଠିତ ହୋଇଥିବା ସମସ୍ତ ଟିମ ଏହାକୁ ଅନୁଧ୍ୟାନ କରିବେ ବୋଲି ଗଞ୍ଜାମ ଆରକ୍ଷୀ ଅଧିକ୍ଷକ କହିଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
