ବ୍ରହ୍ମପୁର: ଜୋର ଧରିଲା ବ୍ରହ୍ମପୁରରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା ଦାବି । ବୁଧବାର ଦକ୍ଷିଣ ଓଡିଶାର ପ୍ରାଣକେନ୍ଦ୍ର ବ୍ରହ୍ମପୁରଠାରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ଦାବିରେ ଜାରି ରହିଥିବା ଆନ୍ଦୋଳନକୁ ଆହୁରି ବ୍ୟାପକ କରାଯିବାକୁ ନିଷ୍ପତ୍ତି ନିଆଯାଇଛି ।
ଗଞ୍ଜାମ ଓକିଲ ସଂଙ୍ଘ ପକ୍ଷରୁ ବର୍ଷ ବର୍ଷ ଧରି ଏହି ଦାବିରେ ଆନ୍ଦୋଳନ ଚାଲିଥିବା ବେଳେ ପୁଣିଥରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରସଙ୍ଗକୁ ଯେଭଳି ଅଧିକ ଲୋକାଭିମୁଖି କରାଯାଇପାରିବ ସେ ନେଇ କାର୍ଯ୍ୟପନ୍ଥା କରାଯିବ ବୋଲି ସ୍ଥିର କରାଯାଇଛି ।
ବ୍ରହ୍ମପୁରଠାରେ ଆଇନଜୀବୀମାନେ ପ୍ରତେକ ମାସର ଶେଷ ଚାରି ଦିନ କାର୍ଯ୍ୟବନ୍ଦ ଆନ୍ଦୋଳନ କରି ଆସୁଥିବା ବେଳେ ଏହାକୁ ଆହୁରୀ ତୀବ୍ରତର କରି ପ୍ରତ୍ୟେକ ସ୍ତରରେ ଏହି ଆନ୍ଦୋଳନକୁ ପହଞ୍ଚାଇବାକୁ ବିଭିନ୍ନ କାର୍ଯ୍ୟପନ୍ଥା ଗ୍ରହଣ କରାଯାଇଥିବା ସଙ୍ଘ ପକ୍ଷରୁ କୁହାଯାଇଛି ।
ବ୍ରହ୍ମପୁରରେ ହାଇକୋର୍ଟର ବେଞ୍ଚ ନଥିବା ଯୋଗୁଁ ଜନସାଧାରଣ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏଭଳି ପରିସ୍ଥିତିରେ ବ୍ରହ୍ମପୁରରେ ହାଇକୋର୍ଟର ବେଞ୍ଚ ପ୍ରତିଷ୍ଠା ଏକମାତ୍ର ବିକଳ୍ପ ରହିଥିବାରୁ ଏଥିପ୍ରତି ସରକାର ଦୃଷ୍ଟି ଦେବାକୁ ଆୟୋଜିତ ସାମ୍ବାଦିକ ସମ୍ମିଳନୀରେ ଦାବି ହୋଇଛି ।
ପ୍ରକାଶ ଯେ, ମୁଖ୍ୟତଃ ଦକ୍ଷିଣ ଓଡିଶାରେ ଦୂର ଦୂରାନ୍ତରରେ ବାସ କରୁଥିବା ଜନସାଧାରଣ ନ୍ୟାୟ ପାଇବା ପାଇଁ କଟକ ଯିବା ଏକ ପ୍ରକାର କଷ୍ଟକର ବିଷୟ । କାରଣ ଓଡିଶା ପ୍ରଶାସନିକ ନ୍ୟାୟାଧିକରଣ ତଥା ଏହାର ବେଞ୍ଚ ଉଚ୍ଛେଦ ହୋଇଯାଇଛି । ତେବେ ହାଇକୋର୍ଟ ନିକଟରେ ଏହି ଟ୍ରିବ୍ୟୁନାଲ କ୍ଷମତା ରହିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
