ବ୍ରହ୍ମପୁର: ପୁଣି ଭିଜିଲାନ୍ସ ଜାଲରେ ସରକାରୀ ବାବୁ । ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଦିଗପହଣ୍ଡି ରେଞ୍ଜର କାହ୍ନୁ ଚରଣ ପଟ୍ଟନାୟକଙ୍କ ଘରେ ଚଢ଼ାଉ କରିଛି ଭିଜିଲାନ୍ସ । ଘର ସମେତ ଦିଗପହଣ୍ଡି ସରକାରୀ କାର୍ଯ୍ୟାଳୟ ଏବଂ ସରକାରୀ ବାସଭବନରେ ଭିଜିଲାନ୍ସ ଚଢାଉ କରିବା ସହ ମୋଟ ୫ ଲକ୍ଷ ୩୯ ହଜାର ୭୫୦ ଟଙ୍କା ଜବତ କରାଯାଇଛି । ଏଥିସହ ଫରେଷ୍ଟ ରେଞ୍ଜରଙ୍କ ଗିରଫ କରି କୋର୍ଟ ଚାଲାଣ କରାଯାଇଛି ।
ସୂଚନା ମୁତାବକ, ଗଞ୍ଜାମ ଜିଲ୍ଲାର ଦିଗପହଣ୍ଡି ବନାଞ୍ଚଳ ରେଞ୍ଜରେ କାର୍ଯ୍ୟରତ ରହିଥିବା କାହ୍ନୁ ଚରଣ ପଟ୍ଟନାୟକ ଗତ ୨୬ ତାରିଖ ରାତିରେ ଏକ ଯୋଗେ କାରରେ ଦିଗପହଣ୍ଡିରୁ ବ୍ରହ୍ମପୁର ଅଭିମୁଖେ ଯାଉଥିଲେ । ପିତାମ୍ୱରପୁର ନିକଟସ୍ଥ ଇଣ୍ଡିଆନ୍ ଅଏଲ୍ ପେଟ୍ରୋଲ ପମ୍ପ ନିକଟରେ ଭିଜିଲାନ୍ସର ଏକ ଟିମ୍ ତାଙ୍କୁ ଅଟକାଇ ଥିଲା । ଯାଞ୍ଚ ବେଳେ ତାଙ୍କ କାରରୁ ନଗଦ ଦେଢ଼ ଲକ୍ଷ ଟଙ୍କା ମିଳିଥିଲା । ଏହି ଟଙ୍କା ସେ କେଉଁଠାରୁ ଆଣିଲେ ଓ କେଉଁ ଉଦ୍ଦେଶ୍ୟରେ ନେଇ ଯାଉଥିଲେ ବୋଲି ଭିଜିଲାନ୍ସ ପକ୍ଷରୁ ତାଙ୍କୁ ପଚରା ଯାଇଥିଲା । କିନ୍ତୁ ଉକ୍ତ ଟଙ୍କାକୁ ନେଇ ଭିଜିଲାନ୍ସର କୌଣସି ପ୍ରଶ୍ନର ସେ ସନ୍ତୋଷଜନକ ଉତ୍ତର ଦେଇ ନଥିଲେ । ଏହା ପରେ ଭିଜିଲାନ୍ସ ଉକ୍ତ ଦେଢ଼ ଲକ୍ଷ ଟଙ୍କାକୁ ଜବତ କରିଥିଲା ।
ଏଥିସହ ରେଞ୍ଜରଙ୍କ ଦିଗପହଣ୍ଡି ସ୍ଥିତ ସରକାରୀ କାର୍ଯ୍ୟାଳୟ ସମେତ ବ୍ରହ୍ମପୁର ସହରର ବ୍ୟାଙ୍କ କଲୋନୀ ଦ୍ୱିତୀୟ ଲାଇନରେ ରହିଥିବା ବାସଭବନରେ ଚଢାଉ କରି ଖୋଳତାଡ କରିଥିଲେ । ଏହି ସମୟରେ ପୋଲିସ ବ୍ରହ୍ମପୁର ବାସଭବନରୁ ୩ ଲକ୍ଷ ୪୬ ହଜାର ୫୦୦ ଟଙ୍କା ଏବଂ ଦିଗପହଣ୍ଡି ସରକାରୀ ବାସଭବନରୁ ୪୧ ହଜାର ୨୫୦ ଟଙ୍କା ଜବତ କରିଥିବା ବେଳେ ମୋଟ ମୋଟ ୫ ଲକ୍ଷ ୩୯ ହଜାର ୭୫୦ ଟଙ୍କାର କୌଣସି ହିସାବ ଦେଇପାରିନଥିଲେ ରେଞ୍ଜର । ଯାହାକୁ ନେଇ ବ୍ରହ୍ମପୁର ଭିଜିଲାନ୍ସ ବିଭାଗ ପକ୍ଷରୁ ଏକ ମାମଲା ରୁଜୁ କରି ସଂପୃକ୍ତ ରେଞ୍ଜରଙ୍କୁ ଗିରଫ କରି କୋର୍ଟଚାଲାଣ କରାଯାଇଛି ।
ପ୍ରକାଶ ଥାଉକି, ଗତ ୨୩ ତାରିଖରେ ନବରଙ୍ଗପୁର ଅତିରିକ୍ତ ଜିଲ୍ଲାପାଳ ପ୍ରଶାନ୍ତ ରାଉତଙ୍କ ଘରେ ଚଢାଉ କରି ବେନାମୀ ଆକାଉଣ୍ଟ ଠାବ କରିଥିଲା ଭିଜିଲାନ୍ସ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ନବରଙ୍ଗପୁର ଉପଜିଲ୍ଲାପାଳଙ୍କ ବାସଭବନରେ ଚଢାଉ କରିଥିଲା ଭିଜିଲାନ୍ସ ଟିମ୍ l ଗତ ଶୁକ୍ରବାର ସକାଳୁ ଭିଜିଲାନ୍ସର ଟିମ୍ ଭାରପ୍ରାପ୍ତ ନବରଙ୍ଗପୁର ଉପଜିଲ୍ଲାପାଳଙ୍କ ସରକାରୀ ବାସଭବନରେ ଚଢାଉ କରିଥିଲେ । ନବରଙ୍ଗପୁର, ଭଦ୍ରକ, ଭୁବନେଶ୍ବର ସମେତ ୯ଟି ସ୍ଥାନରେ ଏକକାଳୀନ ଚଢାଉରେ ମିଳିଛି ନବରଙ୍ଗପୁର ଅତିରିକ୍ତ ଜିଲ୍ଲାପାଳ ପ୍ରଶାନ୍ତ ରାଉତଙ୍କ ବେନାମୀ ଆକାଉଣ୍ଟ । ଭୁବନେଶ୍ୱର ଇଣ୍ଡସଇଣ୍ଡ ବ୍ୟାଙ୍କରେ ୨୬ଲକ୍ଷ ୨୭ହଜାର ଟଙ୍କା ଠାବ କରିଥିଲା ଭିଜିଲାନ୍ସ । ଯେଉଁ ଆକାଉଣ୍ଟରେ ୨୦୧୯ ମସିହାରୁ ଟଙ୍କା ଡିପୋଜିଟ ହୋଇ ଆସୁଥିଲା ।
ଇଟିଭି ଭାରତ, ବ୍ରହ୍ମପୁର
