ଭଞ୍ଜନଗର: ଉତ୍ତରାଖଣ୍ଡରେ ଓଡ଼ିଆ ଯବାନଙ୍କ ମୃତ୍ୟୁ । କାର୍ଯ୍ୟରତ ସମୟରେ ତାଙ୍କର ମୃତ୍ୟୁ ହୋଇଥିବା ନେଇ ପରିବାର ଲୋକଙ୍କୁ ଖବର ମିଳିଥିଲା । ମୃତ ଯବାନ ଜଣକ ଗଞ୍ଜାମ ଜିଲ୍ଲା ଭଞ୍ଜନଗର ବ୍ଳକ ଗୁଣ୍ଡୁରିବାଡି ପଞ୍ଚାୟତ ଗୋହିରିବାଡି ଗ୍ରାମର ଅମ୍ବିକା କୁମାର ପ୍ରଧାନ ହୋଇଥିବା ଜଣାପଡ଼ିଛି । ଜନ୍ମମାଟିରେ ତାଙ୍କ ମୃତ ଶରୀର ପହଞ୍ଚିବା ପରେ ରାଷ୍ଟ୍ରୀୟ ମର୍ଯ୍ୟାଦା ସହ ଶେଷକୃତ୍ୟ ସମ୍ପନ୍ନ ହୋଇଛି ।
ଅମ୍ବିକା କୁମାର ପ୍ରଧାନ ଉତ୍ତାରଖଣ୍ଡର ଚମ୍ପାୱତ ଜିଲ୍ଲାର ଜେନେରାଲ ରିଜର୍ଭ ଇଞ୍ଜିନିୟରିଂ ଫୋର୍ସ ଭାବେ କାର୍ଯ୍ୟରତ ଥିଲେ । ଗତ ଗୁରୁବାର ମଧ୍ୟାହ୍ନ ସମୟରେ ଖାଇବା ବାଣ୍ଟୁଥିବାବେଳେ ହଠାତ ଛାତିରେ ଯନ୍ତ୍ରଣା ଅନୁଭବ କରିଥିଲେ । ତୁରନ୍ତ ତାଙ୍କୁ ଚମ୍ପାୱତ ଜିଲ୍ଲା ସ୍ବାସ୍ଥକେନ୍ଦ୍ରକୁ ନିଆଯାଇଥିଲା । ଡାକ୍ତର ସେଠାରେ ଅମ୍ବିକାଙ୍କୁ ମୃତ ଘୋଷଣା କରିଥିଲେ । ସେଠାରେ ମୃତଦେହ ବ୍ୟବଚ୍ଛେଦ ପରେ ତାଙ୍କ ପାର୍ଥିବ ଶରୀରକୁ ସ୍ବତନ୍ତ୍ର ବିମାନରେ ଭୁବନେଶ୍ବର ଅଣାଯାଇଥିଲା । ଏହାପରେ ଆମ୍ବୁଲାନ୍ସ ଯୋଗେ ଜନ୍ମମାଟିକୁ ଅଣାଯାଇଥିଲା ।
ଏହା ମଧ୍ୟ ପଢ଼ନ୍ତୁ: ସେନା ଟ୍ରକକୁ ପିଟିଲା ଆଉ ଏକ ଟ୍ରକ: 2 BSF ଯବାନ ମୃତ, 5 ଆହତ
ପରିବାର ଲୋକେ ବର୍ତ୍ତମାନ ସହର ଉପକଣ୍ଠ ଲଣ୍ଡେଇ ସାହିରେ ରହୁଥିବାରୁ ପ୍ରଥମେ ପରିବାର ଲୋକଙ୍କ ନିକଟକୁ ନିଆଯାଇଥିଲା । ଏହାପରେ ଏକ ବିରାଟ ଶୋଭାଯାତ୍ରାରେ ନିଆଯାଇଥିଲା । ବୀର ଯବାନ ଅମର ରହେ ସ୍ଲୋଗାନରେ ପୁରା ପରିବେଶ କମ୍ପି ଉଠିଥିଲା । ଜିଲ୍ଲା ପୋଲିସ ପକ୍ଷରୁ ରାଷ୍ଟ୍ରୀୟ ମର୍ଯ୍ୟାଦା ପ୍ରଦାନ କରିବା ପରେ ଶେଷ କୃତ୍ୟ ସମ୍ପନ୍ନ ହୋଇଥିଲା । ଅମ୍ବିକାଙ୍କ ମୃତ୍ୟୁ ନେଇ ସମଗ୍ର ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ଇଟିଭି ଭାରତ, ଭଞ୍ଜନଗର
