ବ୍ରହ୍ମପୁର: କାଶୀବିଶ୍ୱନାଥପୁର ମନ୍ଦିର ପଛପଟ ଜଙ୍ଗଲରୁ ପ୍ରେମୀଯୁଗଳଙ୍କ ସନ୍ଦେହଜନକ ଅବସ୍ଥାରେ ମୃତଦେହ ଉଦ୍ଧାର । ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ କମଳାପୁର ଗାଁର ଘଟଣା । ଘଟଣାସ୍ଥଳରେ ଦିଗପହଣ୍ଡି ଥାନା ଅଧିକାରୀ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ସୂଚନାଥାଉକି, ଦିଗପହଣ୍ଡି ଥାନା ଅନ୍ତର୍ଗତ ବି.ତୁରୁଗୁଡି ପଞ୍ଚାୟତର ଝରିପଦର ଗାଁର ଦିବାନା ରେଡ୍ଡିଙ୍କ ସହ ଚୈତନ୍ୟପୁର ଗାଁର ଆର୍ ଲକ୍ଷ୍ମୀ ରେଡ୍ଡିଙ୍କ ସହ ପ୍ରେମସମ୍ପର୍କ ଗଢି ଉଠିଥିଲା । ଏହାପରେ ଦୁହିଁଙ୍କ ପରିବାରବର୍ଗ ଉଭୟଙ୍କ ନିର୍ବନ୍ଧ କରିଥିଲେ । କିନ୍ତୁ ଶନିବାର ଦିନ ଜଙ୍ଗଲ ମଧ୍ୟରେ ଦୁହିଁଙ୍କର ମୃତଦେହ ପଡିଥିବା ସ୍ଥାନୀୟ ବାସିନ୍ଦା ଦେଖିଥିଲେ । ଏହାପରେ ସ୍ଥାନୀୟ ବାସିନ୍ଦା ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଦିଗପହଣ୍ଡି ଥାନା ଅଧିକାରୀ ଗୌରାଙ୍ଗ ଚରଣ ସାହୁ ଓ ଚିକିଟି ଏସ୍.ଡି.ପି.ଓ ଏସ୍.ଏନ୍.ମୂର୍ମୁ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ହଠାତ୍ ପ୍ରେମୀଯୁଗଳଙ୍କ ମୃତ୍ୟୁ ଘଟଣା ସ୍ଥାନୀୟ ବାସିନ୍ଦାଙ୍କ ମନରେ ନାନା ସନ୍ଦେହ ସୃଷ୍ଟି କରିଛି । ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରେମୀଯୁଗଳଙ୍କ ହତ୍ୟା ନା ଆତ୍ମହତ୍ୟା ହୋଇଛି ତାହା ସ୍ପଷ୍ଟ ହୋଇଯିବ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
