ଖୋଳଖାଳି ସମବାୟ ସମିତିରେ ଅଧିକାରୀଙ୍କ ଅବହେଳା ଯୋଗୁଁ ଅନେକ ଦିନ ହେଲା ମଣ୍ଡିରେ ଚାଷୀଙ୍କ ଧାନ ପଡି ରହିଛି । କେତେକ ଚାଷୀ ବାରମ୍ବାର ମଣ୍ଡିକୁ ଧାନ ଆଣି ଫେରି ଯାଉଛନ୍ତି । ସେପଟେ ଅଧିକାରୀମାନେ ମଣ୍ଡିର ଟାର୍ଗେଟ ପୂରଣ ହୋଇଥିବା କହି ନିଜ ଉପରୁ ଦୋଷ ହଟାଇ ଦେଉଥିବା ଅଭିଯୋଗ ହୋଇଛି ।
ଆଉ ପ୍ରଶାସନର ଏହି ଟାଳଟୁଳ ନୀତିରେ ପେଷି ହୋଇଯାଉଛନ୍ତି ବୁଗୁଡା ବ୍ଲକରେ ଶତାଧିକ ଚାଷୀ । ଶେଷରେ ନିରାଶ ହୋଇ ଗୁରୁବାର ଚକରାପଲ୍ଲୀ, ତାଳସାକର, ବେଲପୁର, ଖୋଳଖାଳି ଏହିପରି ଅନେକ ଗ୍ରାମର ଚାଷୀ ଆନ୍ଦୋଳନକୁ ଓହ୍ଲାଇଛନ୍ତି । ସେମାନେ ଅମଳ କରିଥିବା ଧାନବସ୍ତାକୁ ରାଜରାସ୍ତାରେ ରଖି ରାସ୍ତାରୋକ କରିଛନ୍ତି ।
ଚାଷୀଙ୍କ ଏହି ଆନ୍ଦୋଳନ ଯୋଗୁଁ ଆସିକା-ଭୁବନେଶ୍ବର ଗାଡି ଚଳାଚଳ ବାଧାପ୍ରାପ୍ତ ହୋଇଛି । ବୁଧବାର ବ୍ଲକ ପ୍ରଶାସନକୁ ସମସ୍ୟାର ସମାଧାନ ପାଇଁ ଚାଷୀମାନେ କହିଥିଲେ । ଯଦି ସମସ୍ୟା ସମାଧାନର ବାଟ ନ ବାହାରେ, ତେବେ ଆନ୍ଦୋଳନ କରିବେ ବୋଲି ଚେତାବନୀ ମଧ୍ୟ ଦେଇଥିଲେ । କିନ୍ତୁ ପ୍ରଶାସନ କୌଣସି ପଦକ୍ଷେପ ନ ନେବାରୁ ସେମାନେ ରାଜରାସ୍ତାରେ ଧାନବସ୍ତା ପକାଇ ରାସ୍ତାରୋକ କରିଛନ୍ତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
