ବ୍ରହ୍ମପୁର: ବ୍ରହ୍ମପୁରର ପ୍ରସିଦ୍ଧ ବୁଢ଼ୀ ଠାକୁରାଣୀ ଯାତ୍ରା । ଏନେଇ ଶୁଭ ଖୁଣ୍ଟି ସ୍ଥାପନ ପାଇଁ ତାରିଖ ଚୁଡାନ୍ତ ହୋଇଛି । ଚଳିତ ମାସର ୧୭ ଏବଂ ୧୯ ତାରିଖକୁ ମାଁଆଙ୍କ ବାପଘର କୁହାଯାଉଥିବା ଦେଶୀ ବେହେରାଙ୍କ ମୁଖ୍ୟ ପୂଜକଙ୍କ ପକ୍ଷରୁ ଚୟନ କରାଯାଇଛି । ତେଣୁ ପ୍ରଶାସନ ଏବଂ ଅନ୍ୟାନ୍ୟ ସୁବିଧାକୁ ଦୃଷ୍ଟିରେ ରଖି ଏହି ଦୁଇଟି ତାରିଖ ମଧ୍ୟରୁ ଗୋଟିଏ ତାରିଖକୁ ଚୁଡାନ୍ତ କରାଯିବ ।
ପ୍ରତି 2ବର୍ଷକୁ ଥରେ ଆୟୋଜିତ ହେଉଥିବା ବ୍ରହ୍ମପୁରର ପ୍ରସିଦ୍ଧ ମା ବୁଢ଼ୀ ଠାକୁରାଣୀଙ୍କ ଯାତ୍ରା ଚଳିତ ବର୍ଷ ଆୟୋଜିତ ହେବାକୁ ଯାଉଛି । ଏନେଇ ମାଙ୍କ ଯାତ୍ରା ପାଇଁ ଶୁଭଖୁଣ୍ଟି ସ୍ଥାପନ ପାଇଁ ତାରିଖ ଧାର୍ଯ୍ୟ ହୋଇଛି । ମାଆଙ୍କ ବାପଘର କୁହାଯାଉଥିବା ଦେଶୀ ବେହେରାଙ୍କ ସାହିରେ ଯାତ୍ରାର ଆୟୋଜନ ପୂର୍ବରୁ ଶୁଭଖୁଣ୍ଟି କେବେ ସ୍ଥାପନ ହେବ ତାହା ନିର୍ଦ୍ଧାରିତ ହୋଇଥାଏ । ଶୁଭଖୁଣ୍ଟି ସ୍ଥାପନ ଦିନ ମାଙ୍କ ଯାତ୍ରା କେବେ ଆରମ୍ଭ ହେବ ଏବଂ କେବେ ଶେଷ ହେବ ତାହା ଦେଶୀ ବେହେରାଙ୍କ ମୁଖ୍ୟ ପୂଜକ ପକ୍ଷରୁ ସେଠାରେ ଆୟୋଜିତ ହେଉଥିବା ସାଧାରଣ ସଭାରେ ସ୍ଥିର କରିଥାଆନ୍ତି । ସଭାରେ ଯାତ୍ରା ସମ୍ପର୍କରେ ଏକ ଲିଖିତ ଚିଠା ପାଠ ପରେ ଶୁଭଖୁଣ୍ଟି ପୂଜା କରାଯିବା ପାଇଁ ମାଁଆଙ୍କ ପୀଠକୁ ସମସ୍ତେ ଏକ ବିରାଟ ଶୋଭାଯାତ୍ରାରେ ଯାଇ ସେଠାରେ ପାରମ୍ପରିକ ରୀତିନୀତିରେ ପୂଜା କରିଥାଆନ୍ତି । ଏହାପରେ ଶୁଭଖୁଣ୍ଟିକୁ ଆଣି ନିର୍ମାଣ ହେବାକୁ ଥିବା ଅସ୍ଥାୟୀ ମନ୍ଦିର ନିକଟରେ ସ୍ଥାପନ କରାଯିବାର ପରମ୍ପରା ରହିଛି ।
ପ୍ରତ୍ୟେକ ବର୍ଷ ଦୋଳପୂର୍ଣ୍ଣିମା ପରେ ମାଙ୍କ ଦ୍ବିବାର୍ଷିକ ଯାତ୍ରା ଏବଂ ଶୁଭଖୁଣ୍ଟି କେବେ ସ୍ଥାପନ ହେବ ସେ ନେଇ ଚୁଡାନ୍ତ କରିଥାଆନ୍ତି ସିଦ୍ଧାନ୍ତି । ବ୍ରହ୍ମପୁର ପ୍ରସିଦ୍ଧ ମା ବୁଢୀ ଠାକୁରାଣୀଙ୍କ ଯାତ୍ରା ପରମ୍ପରା ଅନୁଯାୟୀ କାହିଁ କେଉଁ କାଳରୁ ଆୟୋଜିତ ହୋଇ ଆସୁଅଛି । ମା ଜଗତ ଜନନୀ ନିଜ ବାପ ଘରକୁ ଆସିଥାନ୍ତି । ଏହାକୁ ନେଇ ରେଶମ ସହର ହୋଇଯାଇଥାଏ ଉତ୍ସବ ମୁଖର । ପ୍ରାୟତଃ ଏକ ମାସ ଧରି ମାଆଙ୍କ ଯାତ୍ରା ଆୟୋଜିତ ହୋଇଥାଏ । ଯେଉଁଥିରେ ପ୍ରତ୍ୟେକ ସାହିରେ ଆକର୍ଷଣୀୟ ରଥ, କଳାକୁଞ୍ଜ ଠାରୁ ଆରମ୍ଭ କରି ଚିତ୍ତାକର୍ଷକ ଆଲୋକ ମାଳାରେ ଝଲସି ଉଠିଥାଏ ସାରା ସହର । ଗତଥର କୋଭିଡ କାରଣରୁ ମାଆଙ୍କ ଯାତ୍ରା ବହୁତ କମ ଦିନ ଧରି ନିରାଡମ୍ବରର ସହକାରେ ଆୟୋଜିତ ହୋଇଥିବା ବେଳେ ଚଳିତ ବର୍ଷ ଯାତ୍ରାକୁ ବେଶ ଧୁମଧାମର ସହକାରେ ପାଳନ କରିବା ପାଇଁ ସହରବାସୀ ଅପେକ୍ଷା କରି ରହିଛନ୍ତି । ବର୍ତ୍ତମାନ ଶୁଭଖୁଣ୍ଟି ସ୍ଥାପନ ପାଇଁ ତାରିଖ ଘୋଷଣା ପରେ ଚଳଚଞ୍ଚଳ ହୋଇ ଉଠିଛି ସାରା ସହର ।
ଇଟିଭି ଭାରତ, ବ୍ରହ୍ମପୁର
