ଭଞ୍ଜନଗର: ଗଞ୍ଜାମ ଜିଲ୍ଲା ଭଞ୍ଜନଗର ଉପଜିଲ୍ଲାପାଳ ଶ୍ରୀ ରାଜେନ୍ଦ୍ର ମିଞ୍ଜଙ୍କ ଅଧ୍ୟକ୍ଷତାରେ ଉପଖଣ୍ଡର ସମସ୍ତ ବସ, ଅଟୋ ରିକ୍ସା ସଙ୍ଘ ସହିତ କୋଭିଡ ପରିଚାଳନା ନେଇ ବିସ୍ତୃତ ଆଲୋଚନା କରାଯାଇଛି | ଯାତ୍ରା ସମୟରେ ଯାତ୍ରୀ ମାନେ କିଭଳି ସତର୍କତା ଅବଲମ୍ବନ କରିବେ ଏଵଂ ଉଭୟ ବସ କର୍ମଚାରୀ ଓ ଯାତ୍ରୀ କିପରି କୋଭିଡ ନିୟମ କଡାକଡି ପାଳନ କରିବେ ସେଥିପ୍ରତି ମୁଖ୍ୟ ଆଲୋକପାତ କରାଯାଇଛି |
ଯେଉଁ ଯାତ୍ରୀ ମାନେ ବିନା ମାସ୍କରେ ଆସିବେ ସେମାନଙ୍କୁ ବସରେ ଯାତ୍ରା କରିବାରୁ ବଞ୍ଚିତ କରାଯିବ | ଯାତ୍ରୀ ମାନେ ଯାତ୍ରା ସମୟରେ ମାସ୍କ ଏଵଂ ସାନିଟାଇଜର ବ୍ୟବହାରକୁ ବାଧ୍ୟତା ମୂଳକ କରାଯାଇଛି | ବସର ପ୍ରବେଶ ପଥରେ ବସ ମାଲିକ ମାନେ "ନୋ ମାସ୍କ ନୋ ଏଣ୍ଟ୍ରି" ପୋଷ୍ଟର ଲଗେଇବେ | ପ୍ରତ୍ୟେକ ବସ ମାଲିକ ମାନେ ବସରେ ସାନିଟାଇଜରର ସୁନିଶ୍ଚିତ କରିବେ | ଯଦି କୌଣସି ଯାତ୍ରୀ ବିନା ମାସ୍କରେ ଯାତ୍ରା ସମୟରେ ଧରା ପଡ଼ନ୍ତି ତେବେ ଜୋରିମାନା ଆକାରରେ ଏକ ଶହ ଟଙ୍କା ଆଦାୟ କରାଯିବ |
ବର୍ତ୍ତମାନ ଖୋର୍ଦ୍ଧା ଜିଲ୍ଲାରେ କୋରୋନା ସଂକ୍ରମଣ ହାର ଦ୍ରୁତ ଗତିରେ ବୃଦ୍ଧି ପାଉଛି | ଏହାକୁ ଦୃଷ୍ଟିରେ ରଖି ଭୁବନେଶ୍ବର ଯାଉଥିବା ବସ ଗୁଡ଼ିକକୁ ଅଧିକ ସତର୍କତା ଅଵଲମ୍ବନ ସହ ସମସ୍ତ କୋଭିଡ ନିୟମ ସୁଚାରୁରୂପେ ପାଳନ ପାଇଁ ବୈଠକରେ ଗୁରୁତ୍ବାରୋପ କରାଯାଇଛି | ବସ ଯାତ୍ରୀ ସହ ବସ କର୍ମଚାରୀ ଯଦି ସତର୍କତା ଅବଲମ୍ବନ କରିବେ ତେବେ ଯାଇ କୋରୋନାକୁ ଗଞ୍ଜାମ ଜିଲ୍ଲାରୁ ଦୂରେଇ ପାରିବା ବୋଲି ଉପଜିଲ୍ଲାପାଳ ଶ୍ରୀ ମଞ୍ଜ କହିଛନ୍ତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
