ବ୍ରହ୍ମପୁର: ଗୋଳନ୍ଥରା ଥାନା ଅନ୍ତର୍ଗତ ସୋରଳ ଗ୍ରାମରେ ଗତ ୨୮ ତାରିଖ ଦିନ ଦ୍ବୀପ୍ରହରରେ ଘଟିଯାଇଥିବା ସାତବର୍ଷର ନାବାଳିକାକୁ ଅପହରଣ କରି ଗଣଦୁଷ୍କର୍ମ ଏବଂ ହତ୍ୟା ଉଦ୍ୟମ ମାମଲାରେ ପୋଲିସ ଦୁଇ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ।
ଘଟଣା ଦିନ ପିଡିତା ଜଣଙ୍କ ଏହାକୁ ବିରୋଧ କରିବା ପରେ ଗିରଫ ଦୁଇ ଅଭିଯୁକ୍ତ ମାନେ ଅତ୍ୟନ୍ତ ନିର୍ମମ ଭାବରେ ତାର ମୁଣ୍ଡ, ମୁହଁ, କାନକୁ ଆକ୍ରମଣ କରିଥିଲେ । ଶିଶୁଟିକୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରାଯାଇଥିବା ବେଳେ ପୋଲିସ ଘଟଣା ସ୍ଥଳରୁ ଭଙ୍ଗା ଇଟା ,ରକ୍ତର ଦାଗ , ତିନୋଟି ଭଙ୍ଗା ଦାନ୍ତ ସମେତ ବିଭିନ୍ନ ସାମଗ୍ରୀ ଜବତ କରିବା ସହିତ ଘଟଣାର ତଦନ୍ତ ଆରମ୍ଭ କରିଥିଲେ ।
ନାବାଳିକାକୁ ପ୍ରଥମେ ବ୍ରହ୍ମପୁର ଏମ୍.କେ.ସି.ଜି ଏବଂ ପରେ କଟକ ଏସସିବି ମେଡିକାଲ କଲେଜକୁ ପଠାଯାଇଥିଲା । ନାବାଳିକାର ଅବସ୍ଥା ଗୁରୁତ୍ତର ରହିଥିବା ବେଳେ ଡାକ୍ତରୀ ମାଇନା କରାଯିବା ପରେ ଘଟଣା ପର ଠାରୁ ଅଟକ ରହିଥିବା ଦୁଇ ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି । ଗୋଳନ୍ଥରା ଥାନା କେସ୍ ନଂ 27/21 u / s365 / 366 / 376 DB / 307/34 IPC / 6 ପକ୍ସୋ ଆକ୍ଟ ଲଗାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବ୍ରହ୍ମପୁର ଅତିରିକ୍ତ ଏସ୍.ପି ପ୍ରଭାବ ରାଉତରାୟ ସୂଚନା ଦେଇଛନ୍ତି ।
ନାବାଳିକା ଜଣଙ୍କ ଘଟଣାସ୍ଥଳରୁ ରକ୍ତାକ୍ତ ଅବସ୍ଥାରେ ଉଦ୍ଧାର ହେବାପରେ ସ୍ଥାନୀୟ ଗ୍ରାମବାସୀ ଦୁଇ ଅଭିଯୁକ୍ତଙ୍କୁ କାବୁକରି ମାଡ ମାରିବା ସହ ପୋଲିସକୁ ହସ୍ତାନ୍ତର କରିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ ,ଇଟିଭି ଭାରତ
