ବ୍ରହ୍ମପୁର: ବନ୍ଧୁକ ମୁନରେ ATM ଟଙ୍କା ଭର୍ତ୍ତି କରିବାକୁ ଯାଇଥିବା ଏକ ଘରୋଇ କମ୍ପାନୀର ଗାଡିକୁ ଅପହରଣ କରି ୨୪ ଲକ୍ଷ ଟଙ୍କା ଲୁଟ କରାଯାଇଥିବା ଅଭିଯୋଗ ହୋଇଛି । ଘଟଣାର କିଛି ଘଣ୍ଟା ପରେ ଅନ୍ୟଏକ ସ୍ଥାନରୁ ମୁର୍ମୂଷୁ ଅବସ୍ଥାରେ ଗାଡିର ଡ୍ରାଇଭରକୁ ଉଦ୍ଧାର କରାଯାଇ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଗାଡିଟି ଉଦ୍ଧାର କରାଯାଇଥିବା ବେଳେ ସେଥିରୁ ୨୪ ଲକ୍ଷ ଟଙ୍କା ଲୁଟ ହୋଇଥିବା ଜଣାପଡିଛି । ଏପରି ଅଭବନୀୟ ଘଟଣା ଦେଖିବାକୁ ମିଳିଛି ବ୍ରହ୍ମପୁର ସହରରେ ।
ମିଳିଥିବା ସୂଚନା ଅନୁସାରେ, ବୁଧବାର ବ୍ରହ୍ମପୁର ସହରର ବିଭିନ୍ନ ATMରେ ଟଙ୍କା ଭର୍ତ୍ତି କରିବା ପାଇଁ ICICI ବ୍ୟାଙ୍କର ଏହି ସୁରକ୍ଷା ଗାଡିରେ ମୋଟ ୨୬ ଲକ୍ଷ ଟଙ୍କା ନେଇ ୪ ଜଣ କର୍ମଚାରୀ ବାହାରିଥିଲେ । ସହରର ଆସିକା ରୋଡସ୍ଥିତ ATMରେ ଟଙ୍କା ଭର୍ତ୍ତି କରିବା ପାଇଁ ସୁରକ୍ଷା ଗାଡି ପହଞ୍ଚିବା ପରେ ଗାଡିରେ ଥିବା ବନ୍ଧୁକଧାରୀ ସୁରକ୍ଷାକର୍ମୀଙ୍କ ସହ ଅନ୍ୟ ୨ଜଣ କର୍ମଚାରୀ ଗାଡିରୁ ୨ଲକ୍ଷ ଟଙ୍କା ନେଇ ATMରେ ଜମା କରିଥିଲେ । ମେସିନରେ ଟଙ୍କା ଜମା କରି ଫେରିବା ପରେ ଟଙ୍କା ରହିଥିବା ସୁରକ୍ଷା ଗାଡି ନଥିବା ଦେଖିବାକୁ ମିଳିଥିଲା ।
ଗାଡିର ଚାଳକ ଜଣଙ୍କ ଟଙ୍କା ଭର୍ତ୍ତି ଗାଡିକୁ ନେଇ କେଉଁଆଡେ ଚାଲିଯାଇଥିବା ନେଇ ପ୍ରଚାରିତ ହେବା ପରେ କର୍ମଚାରୀମାନେ ସମ୍ପୃକ୍ତ ସଂସ୍ଥା ସହିତ ପୋଲିସକୁ ଘଟଣା ନେଇ ଅବଗତ କରାଇଥିଲେ । ଏହାର କିଛି ଘଣ୍ଟା ପରେ ଗୋଳନ୍ଥରା ପୋଲିସ ଗିରିସୋଲା ନିକଟରେ ସୁରକ୍ଷା ଗାଡି ସହିତ ଅଚେତ ଅବସ୍ଥାରେ ଡ୍ରାଇଭର୍ ଜଣଙ୍କୁ ଉଦ୍ଧାର କରିବାରେ ସଫଳ ହୋଇଥଲା ।
ଚିକିତ୍ସା ପରେ ଗାଡି ଚାଳକ ଜଣଙ୍କ ମେଡିକାଲରେ ଚାଞ୍ଚଲ୍ୟକର ବୟାନ ଦେଇଛନ୍ତି । ATMରେ ଟଙ୍କା ଭର୍ତ୍ତି କରୁଥିବା ସମୟରେ ସହରର ଆସିକା ରୋଡ ଏକ୍ସିସ୍ ବ୍ୟାଙ୍କ ATM ସମୁଖରୁ ୨ଜଣ ବନ୍ଧୁକ ମୁନରେ ତାଙ୍କୁ ଟଙ୍କା ଭର୍ତ୍ତି ଗାଡି ସହ ଅପହରଣ କରି ନେଇଥିବା କହିଛନ୍ତି ଡ୍ରାଇଭର । ହେଲେ ଜନଗହଳିପୂର୍ଣ୍ଣ ରାସ୍ତାରେ କିପରି ଗାଡି ଚାଳକଙ୍କୁ ଅପହରଣ କଲେ ଏବଂ ପରବର୍ତ୍ତୀ ସମୟରେ ନିଶା ଦେଲେ ତାକୁ ନେଇ ପୋଲିସ ତଦନ୍ତ ଆରମ୍ଭ କରିଛି ।
ଅନ୍ୟପଟେ ଏହି ଅପହରଣରେ ଅନ୍ୟ ଏକ ସ୍କ୍ରପିଓ ଗାଡି ବ୍ୟବହାର ହୋଇଥିବା ନେଇ ଗାଡି ଚାଳକଜଣଙ୍କ କହିଥିବାବେଳେ ଏହାକୁ ନେଇ ନାନା ସନ୍ଦେହ ପ୍ରକାଶ ପାଇଛି । ଅନ୍ୟପଟେ ଗାଡିରେ ରହିଥିବା ୨୪ ଲକ୍ଷ ଟଙ୍କାକୁ ସୁରକ୍ଷା ତାଲା ଭଙ୍ଗାଯାଇ ଲୁଟ ହୋଇଥିବା କମ୍ପାନୀର କର୍ମଚାରୀ କହିଛନ୍ତି । ତଦନ୍ତ ପରେ ପ୍ରକୃତ ଘଟଣା ସମ୍ନାକୁ ଆସିବ ବୋଲି ପୋଲିସ କହିଛି ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
