ବ୍ରହ୍ମପୁର: ଭୁଲି ଯାଇଥିଲେ ନିଜ ନାଁ ଆଉ ହଜାଇ ଦେଇଥିଲେ ଠିକଣା । ଦଇବ ଦେଲା ସାଥ୍, ଶେଷରେ ଦୀର୍ଘ ୪୦ ବର୍ଷ ପରେ ଗାଁକୁ ଫେରିଛନ୍ତି ଜଣେ ୬୬ ବର୍ଷିୟ ବୃଦ୍ଧ । ମହାରାଷ୍ଟ୍ର ଓ ମଧ୍ୟପ୍ରଦେଶରେ ଯାଯାବର ଜୀବନ ବିତାଇ ଆସିଥିବା ଏହି ବୃଦ୍ଧ ଜଣକ ଶେଷରେ ଦୀର୍ଘ ବର୍ଷ ପରେ ଘର ବାହୁଡ଼ା ହେବା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ ଗଞ୍ଜାମ ଜିଲ୍ଲା ବ୍ରହ୍ମପୁର ପରିବର୍ତ୍ତେ ମହାରାଷ୍ଟ୍ରର ମୁମ୍ବାଇ ନିକଟବର୍ତ୍ତୀ ବ୍ରହ୍ମପୁରକୁ ଚାଲିଯାଇ ନିଜ ଠିକଣା ହଜାଇ ଦେଇଥିବା ଏହି ବୃଦ୍ଧ ସେଠାରେ ରହୁଥିବା ଏକ ବୃଦ୍ଧାଶ୍ରମରୁ ସ୍ଥାନୀୟ ପୋଲିସ ଓ ପ୍ରଶାସନର ସହଯୋଗରେ ନିଜ ଘରକୁ ଫେରିଛନ୍ତି । ଗଞ୍ଜାମ ଜିଲ୍ଲାର କେ.ନୂଆଗାଁ ଥାନା ଅନ୍ତର୍ଗତ ଦିଗପହଣ୍ଡି ବ୍ଲକ ସହଦେବ ଟିକରପଡା ଗ୍ରାମର ସୀମାଞ୍ଚଳ ରଣା ୨୬ ବର୍ଷ ବୟସରେ ପାଟପୁର ନିକଟ ପଳାସପୁର ଗ୍ରାମରେ ବିବାହ କରିଥିଲେ । ମାତ୍ର ସୀମାଞ୍ଚଙ୍କର ନିଜ ଶ୍ବଶୁର ଘର ସହ ତିକ୍ତତା ଲାଗି ରହିଥିଲା ।
ଏହି ସମୟରେ ଦିନେ ଶ୍ୱଶୁର ଘର ପକ୍ଷରୁ ତାଙ୍କୁ ନିଶାଯୁକ୍ତ ଆଳୁଚପ ଖୁଆଇ ଚେତାଶୂନ୍ୟ ଅବସ୍ଥାରେ ଟ୍ରେନରେ ବସାଇ ଦେଇଥିଲେ ବୋଲି କୁହାଯାଉଛି । ତେବେ ଚେତା ଫେରିବାବେଳକୁ ସେ ମହାରାଷ୍ଟ୍ରରେ ପହଞ୍ଚି ସାରିଥିଲେ । ଗଞ୍ଜାମ ବ୍ରହ୍ମପୁର ବଦଳରେ ସେ ମହାରାଷ୍ଟ୍ରର ମୁମ୍ବାଇ ନିକଟ ବ୍ରହ୍ମପୁରରେ ରହିବା ସହିତ ଘର ଠିକଣା ଭୁଲିଯାଇ ଦୀର୍ଘ ୨୬ ବର୍ଷ ଧରି କୁଲିମଜୁରୀ କରି ସେଠାରେ ଚଳି ଆସୁଥିଲେ ।
ଏପରିକି କିଛିଦିନ ପାଇଁ ସେଠାରୁ ସେ ଆନ୍ଧ୍ରପ୍ରଦେଶର ଇଚ୍ଛାପୁରକୁ ଚାଲି ଆସିଥିଲେ । ପୁଣି ସେଠାରୁ ମଧ୍ୟପ୍ରଦେଶ ଯାଇଥିଲେ । ମଧ୍ୟପ୍ରଦେଶର ବିଭିନ୍ନ ସ୍ଥାନରେ ଯାଯାବର ଜୀବନ ଅତିବାହିତ କରୁ କରୁ ପହଞ୍ଚିଥିଲେ ଲେଣ୍ଡିପୁରା ବୃଦ୍ଧାଶ୍ରମରେ । ସେଠାରେ ରହୁଥିବା ସମୟରେ କୌଣସି କାରଣରୁ ପୋଲିସ ତାଙ୍କୁ ଧରିବା ସହ ଠିକଣା ପଚାରି ବୁଝିଥିଲା । ସହଦେବ ଟିକରପଡା ଗ୍ରାମର ପାଟପୁର ଥାନା, ଭୀଷ୍ମଗିରି ନିକଟ ସହଦେବ ଟିକରପଡାରେ ତାଙ୍କର ଘର ବୋଲି ସେ ମନେ ପକାଇ ପୋଲିସକୁ ଜଣାଇଥିଲେ ।
ପରେ ପୋଲିସ ଠିକଣା ବାବଦରେ ବୁଝିବା ପରେ ସ୍ଥାନୀୟ ପୋଲିସ ଓ ପ୍ରଶାସନର ସହଯୋଗରେ ଘରକୁ ଫେରିଛନ୍ତି ସୀମାଞ୍ଚଳ । ବୟସ ଅଧିକ ହୋଇ ଯାଇଥିବାରୁ ସୀମାଞ୍ଚଳ ରୋଗାଗ୍ରସ୍ତ ହୋଇପଡିଛନ୍ତି । ଆସିବା ସମୟରେ ସେଠାକାର ଜିଲ୍ଲାପାଳ ୧୦ ହଜାର ଓ ବୃଦ୍ଧାଶ୍ରମ ପକ୍ଷରୁ ସୀମାଞ୍ଚଳଙ୍କୁ ୫ ହଜାର ଟଙ୍କା ଦିଆଯାଇଛି । ସେ ଗ୍ରାମରେ ପହଞ୍ଚିଥିବା ପରେ ପରିବାରର ଅନ୍ୟ ସଦସ୍ୟଙ୍କ ମଧ୍ୟରେ ଖୁସିର ଲହର ଖେଳିଯାଇଛି । ଅନ୍ୟପଟେ ସୂଚନା ମୁତାବକ ସୀମାଞ୍ଚଳଙ୍କ ସ୍ତ୍ରୀ ନିଜ ବାପଘର ପଳାସପୁରରେ ରହୁ ଥିବାବେଳେ ତାଙ୍କର ଏକମାତ୍ର ଝିଅର ମୃତ୍ୟୁ ହୋଇସାରିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
