ଭଞ୍ଜନଗର: ହତ୍ୟାକାଣ୍ଡର ପର୍ଦ୍ଦାଫାସ କଲା ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ପୋଲିସ। ଗତ ଡିସେମ୍ବର 2 ତାରିଖରେ ଜଗନ୍ନାଥପ୍ରସାଦ ଥାନା ଭୂଷଣ୍ଡପାଳ ଗାଁ ନିକଟସ୍ତ ଜମିରୁ ଜଣେ ଯୁବତୀଙ୍କ ମୃତଦେହ ଉଦ୍ଧାର କରିଥିଲା ପୋଲିସ। ଏହି ମାମଲାକୁ ନେଇ ପୋଲିସ ଜୋରଦାର ଛାନଭିନ ଚଳାଇଥିଲା। ତଦନ୍ତ ବେଳେ ଯୁବତୀଙ୍କୁ ଜଣେ ସ୍ବାମୀ ସ୍ତ୍ରୀ ହତ୍ୟା କରିବା ଏଠାରେ ଫୋପାଡ଼ି ଦେଇଥିବା ଜଣାପଡ଼ିଛି।
ଯୁବତୀ ଜଣକ ବାଲେଶ୍ବର ଜିଲ୍ଲା ବାସିନ୍ଦା ବୋଲି ଜଣା ପଡ଼ିଥିଲା। ଖାଲି ସେତିକି ନୁହେଁ ମୃତ ଯୁବତୀ ରାଜଧାନୀ ଭୁବନେଶ୍ବରରେ ଜଣଙ୍କ ଘର କାମ କରୁଥିଲେ। କାମରେ ଅବହେଳା ଅଭିଯୋଗ କରି ଘର ମାଲିକ ଓ ଯୁବତୀଙ୍କ ମଧ୍ୟରେ ବଚସା ହୋଇଥିଲା। ଏହାପରେ ଘର ମାଲିକ ଦୁଇଜଣ ମିଶି ଯୁବତୀଙ୍କୁ ହତ୍ୟା କରିଥିଲେ।
ହତ୍ୟାପରେ ସ୍ବାମୀ ସ୍ତ୍ରୀ ଭୁବନେଶ୍ବରରୁ ଏକ ଓଲା କାରରେ ଯୁବତୀଙ୍କ ମୃତଦେହକୁ ଆଣି ଭୂଷଣ୍ଡପାଳ ଗାଁ ନିକଟସ୍ତ ଜମିରେ ଫୋପାଡ଼ି ଦେଇଥିଲେ। ପୋଲିସ ପରିବାର ଲୋକଙ୍କୁ ଡକାଇ ଯୁବତୀଙ୍କ ପରିଚୟ ପାଇଥିବା ବେଳେ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତଙ୍କ ନିକଟରୁ 6ଟି ମୋବାଇଲ ଓ ଗୋଟିଏ କାର ଜବତ ହୋଇଛି। ଏନେଇ ଏକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ଗଞ୍ଜାମ ପୋଲିସ ଏସପି ବ୍ରିଜେଶ ରଏ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
