ବ୍ରହ୍ମପୁର: ଗୁଣିଗାରେଡି ସନ୍ଦେହରେ ବୃଦ୍ଧଙ୍କୁ ହତ୍ୟା କରିବା ଅଭିଯୋଗରେ ଗଞ୍ଜାମ ଜିଲ୍ଲା ପାଟପୁର ଥାନା ପୋଲିସ ତିନି ଜଣଙ୍କୁ ଗିରଫ କରି କୋର୍ଟଚାଲାଣ କରିଛି । ଏହାସହ ହତ୍ୟାରେ ବ୍ୟବହୃତ ହୋଇଥିବା ମାରଣାସ୍ତ୍ର ଜବତ କରିଥିବା ଆୟୋଜିତ ସାମ୍ବାଦିକ ସମ୍ମିଳନୀରେ ପୋଲିସ ପକ୍ଷରୁ ସୂଚନା ଦିଆଯାଇଛି ।
ଗିରଫ ଅଭିଯୁକ୍ତମାନେ ପାଟପୁର ଥାନା ଅଞ୍ଚଳର ଜୟପୁର ଗ୍ରାମର ଟୁନା ନାୟକ, ପ୍ରତାପଗିରି ଗ୍ରାମର ମୁନା ନାଇକ ଏବଂ ଖାରିଗୁଡା ଗ୍ରାମର ଜିତୁ ବେହେରା ବୋଲି ଜଣାପଡିଛି । ଗତ ନଭେମ୍ବର ୩୦ ତାରିଖ ସନ୍ଧ୍ୟା ୫ ଟା ସମୟରୁ ପାଟପୁର ଥାନା ଅନ୍ତର୍ଗତ ବଗୁଆପଲ୍ଲୀ ଗ୍ରାମର ୬୦ ବର୍ଷୀୟ ଅଙ୍ଗଦ ମଲ୍ଲିକ ନିଖୋଜ ଥିବା ନେଇ ତାଙ୍କ ପତ୍ନୀ ବାଙ୍କୀ ମଲ୍ଲିକ ଏକ ଲିଖିତ ଅଭିଯୋଗ କରିଥିଲେ । ଏହି ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା ୨୬୧/୧୯ ଅନୁଯାୟୀ ତଦନ୍ତ ଚଳାଇଥିବା ବେଳେ ଗତ ଶୁକ୍ରବାର ଦିନ ନିକଟସ୍ଥ ଜଙ୍ଗଲରୁ ଅଙ୍ଗଦଙ୍କ ଗଳିତ ମୃତଦେହକୁ ଠାବ କରିଥିଲା । ମୁଖ୍ୟତଃ ଗୁଣିଗାରେଡିକୁ କେନ୍ଦ୍ର କରି ଏପରି ହୋଇଥିବା କୁହାଯାଇଛି ।
ହତ୍ୟାର ଶିକାର ହୋଇଥିବା ଅଙ୍ଗଦ ଗ୍ରାମରେ ଚେରମୂଳି ଔଷଧ ଦେବା ସହ ଝଡ଼ାଫୁଙ୍କା କରିଆସୁଥିଲେ । ଗିରଫ ଟୁନା ନାୟକଙ୍କ ସମ୍ପର୍କୀୟଙ୍କ ଭାଣିଜିର ମୃତ୍ୟୁ ଘଟିଥିବାରୁ ସେମାନେ ଅଙ୍ଗଦ ଗୁଣି କରିଥିବା ସନ୍ଦେହ କରି ଅନ୍ୟ ଦୁଇ ଜଣଙ୍କୁ ନେଇ ଏଭଳି ହତ୍ୟା କରି ବାଘୁଆପଲି ନିକଟସ୍ଥ ଜଙ୍ଗଲରେ ଫୋପାଡ଼ି ଦେଇଥିଲେ ବୋଲି ପୋଲିସ ପକ୍ଷରୁ କୁହାଯାଇଛି । ତେବେ ଆୟୋଜିତ ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି ପିକେ ଚୌଧୁରୀ, ଆସ୍କା ଏସଡିପିଓ ସୂର୍ଯ୍ୟମଣୀ ପ୍ରଧାନ, ସ୍ଥାନୀୟ ଥାନା ଅଧିକାରୀ ଅଜୟ ବାରିକ ସମେତ ସମସ୍ତ କର୍ମଚାରୀ ଉପସ୍ଥିତ ଥିଲେ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
