ଗଜପତି: କିନ୍ନରଙ୍କୁ ନେଇ ସମାଜରେ ଏକ ଭିନ୍ନ ଦୃଷ୍ଟିକୋଣ ରହିଛି । ସୁସ୍ଥ ସମାଜରେ ବଞ୍ଚିବାକୁ ଆଜି ବି ସଂଘର୍ଷ କରୁଛନ୍ତି ଏମାନେ । କିନ୍ନରମାନଙ୍କୁ ଆଇନ ସମସ୍ତ ପ୍ରକାର ସୁବିଧା ସୁଯୋଗ ଦେଇଥିଲେ ମଧ୍ୟ ସମାଜ ସେମାନଙ୍କୁ ସହଜରେ ଗ୍ରହଣ କରିପାରୁନାହିଁ । ତେଣୁ ସେମାନେ ଏକ ପ୍ରକାର ସମାଜିକ ବାସନ୍ଦ ଭାବେ ଜୀବନ ଅତିବାହିତ କରୁଛନ୍ତି । ଗଜପତି ଜିଲ୍ଲା ପାରଳାଖେମୁଣ୍ଡିରେ ମଧ୍ୟ ଏଭଳି କିଛି କିନ୍ନର ରହିଛନ୍ତି ଯେଉଁମାନେ ଆଜି ବି ଅବହେଳିତ । ଏପରିକି ସେମାନଙ୍କ ପରିବାର ମଧ୍ୟ କିନ୍ନରମାନଙ୍କୁ ଗ୍ରହଣ କରିପାରିନାହିଁ । ଫଳସ୍ବରୂପ ସେମାନେ ଏକ ଅନିଶ୍ଚିତ ଭବିଷ୍ୟତକୁ ନେଇ ବଞ୍ଚି ରହିଛନ୍ତି । କିନ୍ତୁ ଏବେ ସମୟ ବଦଳିଛି, ସମାଜରେ ସେହି କୁଦୃଷ୍ଟିକୋଣ ରୂପକ କଣ୍ଟାକୁ ଏଡାଇ ଆଗକୁ ବଢ଼ିଛନ୍ତି । ଆଜି କୌଣସି କ୍ଷେତ୍ରରେ ପଛରେ ନାହାଁନ୍ତି ତୃତୀୟ ଲିଙ୍ଗ। କିନ୍ନରଙ୍କୁ ଥଇଥାନ କରିବା ପାଇଁ ଗଜପତି ପ୍ରଶାସନ ପକ୍ଷରୁ ଆରମ୍ଭ ହୋଇଛି ଟେରାକୋଟା ତାଲିମ ଶିବିର ।
ପାରଳାଖେମୁଣ୍ଡି ସ୍ଥିତ ଗଜପତି ଷ୍ଟାଡିୟମ ପରିସରରେ କିନ୍ନରମାନଙ୍କୁ 6 ମାସିଆ ତାଲିମ ପ୍ରଦାନ କରିବା ପାଇଁ ବ୍ୟବସ୍ଥା କରାଯାଇଛି । ଏହି ଶିବିରରେ ପ୍ରାୟ 10ଜଣ କିନ୍ନର ଯୋଗଦେଇ ତାଲିମ ଗ୍ରହଣ କରୁଥିବା ବେଳେ ସେମାନଙ୍କୁ ଏକ ଟୋରାକୋଟା କଳା ଶିକ୍ଷକ ତାଲିମ ପ୍ରଦାନ କରୁଛନ୍ତି । ଯେଉଁ ହାତ ଦିନେ ଭିକ୍ଷାବୃତ୍ତି କରୁଥିଲା । ଆଜି ସେ ହାତ ସୁନ୍ଦର କଳାକୃତିରେ ବ୍ୟସ୍ତ ରହିଛି । ମାଟିରେ ଚଢ଼େଇ, ମଣିଷ ଗଛଲତା ଭଳି ଆକର୍ଷଣୀୟ କଳାକୃତି କରୁଛନ୍ତି । ଏନେଇ ତାଲିମ ନେଉଥିବା କିନ୍ନର କହିଛନ୍ତି," ପ୍ରଶାସନର ଏଭଳି ଉଦ୍ୟମ ନିଶ୍ଚିତ ଭାବେ ନିଜର ଭବିଷ୍ୟତ ଗଠନ ପାଇଁ ରାସ୍ତା ଖୋଲି ଦେଇଛି । ଦିଆଯାଉଥିବା ତାଲିମ ଅତି ଭଲ ଲାଗୁଛି ଏବଂ ଏହାକୁ ଶିଖିବା ପାଇଁ ଆଗ୍ରହ ଆସୁଛି।" ତାଲିମ ପରେ ଏହି ବୃତ୍ତିକୁ ଆପଣାଇ ଦୁଇ ପଇସା ରୋଜଗାର କରିବେ ବୋଲି କହିଛନ୍ତି ।
କିନ୍ନରମାନେ ଭିକ୍ଷାବୃତ୍ତି କରି ବଞ୍ଚିବା ଦେଖି ତତକାଳୀନ ଏସ୍ପି ସାରା ଶର୍ମା ଉଦ୍ଧାର କରି ରୋଜଗାରକ୍ଷମ କରାଇବାକୁ ପ୍ରୟାସ କରିଥିଲେ । ସେମାନଙ୍କ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଏକ ଓମ୍ଫେଡ ପାର୍ଲର କରାଇଥିଲେ । ହେଲେ ସେ ଏଠାରୁ ବଦଳି ହୋଇ ଚାଲିଯିବା ପରେ ଏହି ଦୋକାନରୁ ସେମାନଙ୍କୁ ବେଦଖଲ କରି ଦିଆଯାଇଥିଲା । ବର୍ତ୍ତମାନ ଜିଲ୍ଲାପାଳ ଏହାକୁ ଦେଖିବା ପରେ ସେମାନଙ୍କୁ ପୁଣିଥରେ ଏକାଠି କରାଇ ରୋଜଗାରକ୍ଷମ କରିବାକୁ ପ୍ରୟାସ କରିଛନ୍ତି । କିନ୍ନରମାନଙ୍କୁ ଟେରାକୋଟା ତାଲିମ ଦେଇ ସେମାନଙ୍କୁ କଳାକୃତି କାରିଗର ଭାବେ ଗଢି ତୋଳିବାକୁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି ।
ଏହା ମଧ୍ୟ ପଢ଼ନ୍ତୁ: ସ୍ୱାବଲମ୍ବୀ କିନ୍ନର: ପ୍ରଶାସନ ସହାୟତାରେ ଖୋଲିଛି ଦୋକାନ, ଜମୁଛି ଚା' ପ୍ରେମୀଙ୍କ ଭିଡ
ଏନେଇ ଗଜପତି ଜିଲ୍ଲାପାଳ କହିଛନ୍ତି," ଆକାଂକ୍ଷୀ ଜିଲ୍ଲାର ବିଭିନ୍ନ କାର୍ଯ୍ୟକ୍ରମ ମଧ୍ୟରୁ ଏହା ଅନ୍ୟତମ । ଏହାଦ୍ବାରା ଜଣେ ବ୍ୟକ୍ତି ନିଜ ଭବିଷ୍ୟତ ନିଜେ ଗଢିବା ପାଇଁ ପ୍ରସ୍ତୁତ ହୋଇପାରିବେ ।" ତେଣୁ ଏଭଳି ପଦକ୍ଷେପ ଗ୍ରହଣ କରାଯାଇଥିବା ସେ କହିଛନ୍ତି । ଆଧୁନିକତାର ଛାପରେ ଯେତେ ଆଗେଇଥିବା ପରେ ମଧ୍ୟ ଆଜି ବି କିନ୍ନରଙ୍କୁ ସମାଜ ଏକ ଭିନ୍ନ ଦୃଷ୍ଟିରେ ଦେଖି ଆସୁଛି । ଏଭଳି ସ୍ଥିତିରେ ସେମାନଙ୍କୁ ସ୍ବାବାଲମ୍ବୀ କରିବା ପାଇଁ ପ୍ରଶାସନର ଏହି ପଦକ୍ଷେପ ନିଶ୍ଚିତ ଭାବେ ସ୍ବାଗତ ଯୋଗ୍ୟ ।
ଇଟିଭି ଭାରତ,ଗଜପତି
